RZ Tauri

RZ Tauri (RZ Tau / HD 285892 / HIP 21467)[1] ye una estrella variable na constelación de Tauru. Foi reconocida en fotografíes per vegada primer por Schilt (1925) y clasificada como variable W Ursae Majoris por Oosterhoff en 1930. Alcuéntrase a 717 años lluz de distancia del Sistema Solar.[2]

RZ Tauri
Constelación Tauru
Ascensión reuta α 04h 36min 37,66s
Declinación δ +18º 45’ 17,8’’
Distancia 717 ± 10 años lluz
Magnitú visual +10,28 (media)
Magnitú absoluta +4,06
Lluminosidá 6,19 / 2,60 soles
Masa 1,70 / 0,64 soles
Radiu 1,56 / 1,04 soles
Tipu espectral A7V
Velocidá radial +5,0 km/s

RZ Tauri ye una binaria de contautu, esto ye, los sos componentes tán tan cerca ente sigo que se tán tocando y esiste tresferencia de masa ente elles; amás, el grau de «sobrecontautu» d'esta binaria ye fondu (56%). Ye una binaria eclipsante, al igual que W Ursae Majoris, prototipu d'esta clase de variables, bazcuyando'l so rellumu ente magnitú +10,08 y +10,71 nun periodu de 0,4157 díes.[3] Dichu periodu aumenta de cutio a un ritmu de 9,67 × 10−8 díes per añu, lo que puede debese a tresferencia de masa dende la estrella menos masiva a la más masiva. De la mesma, la asimetría reparada na so curva de lluz puede esplicase pola presencia d'un llurdiu fríu na componente secundaria.[4]

El tipu espectral de RZ Tauri ye A7V (F0V según otres fontes). La estrella más masiva tien una masa de 1,70 mases solares y un radiu de 1,56 radios solares, siendo la so lluminosidá 6,19 vegaes la del Sol. El so acompañante, 2,60 vegaes más lluminosa que'l Sol, tien una masa de 0,64 mases solares y un radiu de 1,04 radios solares.[4]

Una tercer estrella, visualmente a 0,8 segundos d'arcu, completa'l sistema estelar. Piénsase que ye una nana colorada de tipu espectral M5V o mayor, con una masa inferior a 0,2 mases solares. La so separación cola binaria de contautu ye de siquier 139 UA.[5]

ReferenciesEditar

Coordenaes:   4h 36m 37.661s, 18° 45 17.794