Ron Weasley

Ronald Bilius Weasley (1 de marzu de 1980), más conocíu como Ron Weasley, ye ún de los principales personaxes de la saga Harry Potter, siendo'l meyor amigu del protagonista y Hermione Granger. Creáu pola británica J. K. Rowling, Ron apaeció per primer vegada en Harry Potter y la piedra filosofal (1997) y ye descritu como un roxu altu y delgáu, con manes y pies grandes y una cara cubierta de peques. Tien, amás, güeyos azules y una ñariz llarga. Na gran pantalla foi interpretáu, a lo llargo de diez años, pol actor Rupert Grint.

Ron Weasley
Personaxe de Harry Potter
Universu	universu de Harry Potter
Creador/a/es	J. K. Rowling
Información
Sexu	masculín
Nacimientu	Devon, 1 de marzu de 1980 (44 años)
Ocupación	Quidditch player (en) , mago (es) , estudiante, entamador y auror (es)
Conexones	familia Weasley (es)
Cónxuxe	Hermione Granger
Padres	Arthur Weasley (es) Molly Weasley (es)
Fíos	Hugo Granger-Weasley (es) y Rose Granger-Weasley (es)
Familiares	Ginny Weasley (es) , Bill Weasley (es) , Charlie Weasley (es) , Percy Weasley (es) , Fred Weasley (es) y George Weasley (es)
Residencia	The Burrow (en) y Castillo de Hogwarts (es)
Nacionalidá	Reinu Xuníu
[editar datos en Wikidata]

Historia

Asiste al so primer cursu n'Hogwarts, onde conoz a Harry y Hermione, y ayuda a Harry a salvar la Piedra Filosofal, probando'l so inxeniu nel Axedrez Máxicu xigante. Los años siguientes permanez bien xuníu a los dos amigos, Harry y Hermione, por diversos peligros que surden en Hogwarts y fuera d'él. Probablemente una de les mayores aventures colos sos amigos ye na que s'embarquen en busca de los Horrocruxes de Voldemort, que consiguen destruyir. Tamién participó na batalla final de Hogwarts, onde pierde a ún de los sos hermanos.

Familia

Ye'l sestu de los siete fíos de los Weasley. Ye fíu d'Arthur y Molly Weasley y hermanu de Bill, Charlie, Percy, los ximielgos Fred y George y la pequeña Ginny

So padre trabaya nel Ministeriu de Maxa, mentes que so madre ye ama de casa. Bill trabaya pal bancu de magos n'Exiptu y Charlie cría dragones en Rumanía. Percy ye asistente del ministru de maxa y los ximielgos acaben abriendo la tienda de chancies Sortilegios Weasley. A lo último, la so hermana pequeña Ginny acaba siendo la capitana del equipu de quidditch Les Arpíes de Holyhead.

Probes pero honraos, los hermanos Weasley siempre adquirieron coses de segunda mano, magar que tía Muriel ta perbién económicamente, yá que tien una casona na qu'acaben escodiéndose de Voldemort y los sos secuaces. Los güelos paternos son Septimus Weasley y Cedrella Black, mentes que los maternos son Ignatius Prewett y Lucretia Black.

Casáu cola so amiga Hermione, el matrimoniu tien dos fíos: Rose y Hugo Weasley.

Personalidá

Personalidá: Fiel, honráu, astutu, prudente, risonderu, celosu, chanciosu, rebalbu, sarcásticu, daqué cascarrabies… Pero primero de too amigu de los sos amigos. Présta-y pola vida l'axedrez, el quidditch, les chancies y tar con Harry y Hermione. Repúnen-y les arañes, a dellos Slytherin (por exemplu Draco Malfoy), la ropa de segunda mano que tien que poner y qu'Hermione lu corrixa. Dáse-y bien l'axedrez máxicu, culpar a los demás, acubiciar a Ginny, poner nerviosa a Hermione y volar n'escoba. Dáse-y mal ser el centru d'atención, caltener la calma, esculpase, estudiar demasiao y aguantar los celos.

Ron ye bien optimista y hasta ciertu puntu despreocupáu, anque dacuando cuésta-y sobrellevar el fechu de que la so familia nun tenga abondes perres. Esto fai que munches de les sos coses tean usaes y vieyes, yá que les herieda de los sos hermanos mayores, y que dellos alumnos de Hogwarts lu desprecien por ello, sobre manera Draco Malfoy y los de Slytherin. Dacuando ye bien inseguru d'él mesmu anque en delles ocasiones amuesa más seguridá que munchos. Harry vese obligáu nel añu sestu a xubi-y la moral enantes d'un partíu de quidditch, faciéndo-y creyer que tomó un fervidiellu, "Felix Felicis", cosa que dio resultaos faciendo un llabor espectacular como guardador.

Munches de les sos cualidaes actúen en contraposición coles de Harry. Mentes que Harry ye güérfanu y tien más dineru del que precisa, Ron vien d'una familia grande y que lu quier, pero que ye bien probe. Tamién el fechu de que Harry seya famosu causa que Ron dacuando sienta celos de l'atención que recibe'l so amigu, yá qu'él mesmu quixera sobresalir de dalguna manera. Nel llibru cuartu, esto causa que tengan una engarradiella, cuando Ron piensa enquivocadamente que Harry siempre busca ser el centru d'atención. Los sos complexos d'inferioridá, al ser menos destacáu que los sos hermanos (por nun ser nin un estudiante brillante, nin un escelente xugador de quidditch, nin la fía que so madre siempre deseó) son la fuercia principal que lu motiva a desarrollase a sigo mesmu.

Ye sarcásticu, celosu cuando se trata d'Hermione Granger anque él nunca nun quiera reconocelo, ye bien lleal, confiable y sobre manera bon amigu.

Un datu curiosu ye que'l so apellíu "Weasley" paez provenir del animal "weasel", que n'inglés significa papalbina, carauterística pol so pelame acoloratao, neto que la familia Weasley. Amás, esto tamién fai referencia a que'l patronus de so padre adopta la forma d'una papalbina.

Enllaces esternos

• Wikimedia Commons acueye conteníu multimedia sobre Ron Weasley.

• Datos: Q173998
• Multimedia: Ron Weasley