Viet Minh
El Viet Minh (tamién Việt Nam Ðộc Lập Ðồng Minh Hội, "Lliga pa la independencia de Vietnam") foi formau nuna conferencia en mayu de 1941 p'algamar la independencia de Francia. La lliga foi dirixía por Nguyen Tat Thanh - conocíu como Ho Chi Minh, "El qu'Enseña". Esti, Le Duan, Vo Nguyen Giap y Pham Van Dong formaron parte del grupu fundador.
Durante la Segunda Guerra Mundial, Xapón ocupó la Indochina francesa, afitando bases en 1941. En marzu de 1945 ocuparíen tou el territoriu. Ensin embargu el Viet Minh centrose nos ataques a guarniciones franceses, cayendo la primera n'avientu de 1944, cuando Giap había fecho les primeres brigades. Cola rindición de Xapón n'agostu de 1945, la lliga garró'l control del país y Ho Chi Minh aproclamó la independencia el 2 de setiembre. Tres varies negociaciones fallíes, n'avientu de 1946 l'armada francesa bombardió la ciudá d'Haiphong provocando miles de muertos.
Aquella aición dio entamu a la Guerra d'Indochina. Nel aniciu Ho Chi Minh nun quería utilizar al so exércitu escontra les tropes coloniales; ensin embargu, al vese cuasi ensin apoyos, tuvo d'alcuerdu con Giap en llanzar un ataque.
