Wuhua Quan

El Wuhua Quan (Boxéu de les Cinco Flores, “gokaken” en xaponés) ye ún de los estilos de kung fu o boxéu chinu que’l fundador del Shorinji Kempo, Doshin So, dicía qu'aprendiera en China col maestru Wen Taizong (Wen Laoshi).

Doshin So dicía qu'esta forma de llucha caltenía los principios de la práutica en pareya, sopelexando d'esta miente que nesti sistema o forma’l trabayu facíase sobre too a dos, o que polo menos asina lu deprendiera él. Tratábase quiciabes d'un tipu d'exerciciu en pareya (como los denominaos en chinu "tuishou", "sanshou" o "duilian"), o bien una forma de dos homes. Sicasí Doshin So fala d'estes téuniques como maniobres que tenten d'esllir selemente la fuercia del adversariu, controlándolu o proyeutándolu al suelu.

Conque nun somos pa pescanciar si’l "Wuhua" yera una forma incluyida nel estilu Yihe Quan o yera puralmente un estilu aparte.

Según Rogelio Casero [1], conocíu investigador sobre’l Shorinji Kempo, hai dos sistemes chinos que faen referencia a les "flores". El más nomáu ye’l Hua Quan (Boxéu de la Flor), estilu norteñu, esquivu, cambiante y esconcertante, al paecer ensin “formes” (taolu). Esti estilu poseye 89 métodos, munchos d'ellos de proyeición. El so estudiu inclúi 120 formes de "sanshou" (exercicios en pareya), 72 téuniques de garrar y escordar, 36 téuniques de pataes, etc. De mano nun se pue escartar qu'una forma o riestra de téuniques d'esti estilu, col nome de "Wuhua", pudieren inxertase nel bagax de conocimientos de Wen Taizong, y qu'esti les tresmitiera a Doshin So.

Per otra parte ta l'estilu Wuhua Pao Quan (Boxéu Cañón de les Cinco Flores), tamién llamáu Wuhua Bagua Quan (Boxéu de les Cinco Flores y los Ocho Trigrames). Anque hai poca información sobre esti estilu, sábese que tien cinco formes, y estudia los “cinco elementos” y los “ocho trigrames” pal desendolcu d'eses formes. El so estudiu inclúi la práutica interna y esterna. La so principal carauterística ye la flexibilidá, dominando la durez cola combinación de flexibilidá y fuercia. Tien formes individuales y exercicios de dos persones (tuishou).

Resalvando lo anterior, nel Kung Fu chinu repítese’l términu “Wuhua” (cinco flores) dientro d'estilos estremaos, denominándose asina diverses formes d'una o dos persones. La opinión de Rogelio Casero ye más favoratible a que quiciabes Doshin So deprendió dalguna d'eses formes, anque nun ye l'investigador quien a albridar de cuál de los estilos. Tamién, pol mesmu fechu de pertenecer a diversos estilos, muncho bien pudiera’l de “Cinco Flores” ser un conceutu incluyíu con esti sen nel estilu del maestru Wen.

Mesmamente hai nel estilu Xingyiquan una forma denominada “Wuhua Pao” (Cañón de Cinco Flores). Pue que’l maestru Wen conociera esta forma y la tresmitiera a Doshin So. Ye una forma de puños en pareya, na que se trabaya llixero y alternen dambos n’ataque y defensa. Esti fechu de trabayase en pareya aumenta la posibilidá de dalguna rellación col Shorinji Kempo. N’efeutu paezse enforma al mou de golpiar del Shorinji Kempo, pero ye en cambéu chocante que nun tenga que ver coles téuniques que nesti arte xaponés formen la familia “Gokaken”, homónima del Wuhua Quan, darréu que les téuniques d'esta familia Gokaken, conteníes en cinco grupos tamién con nomes de flores (Flor Colorada, Flor de Cirolar, Orquídea, Flor de Pescal y Peonía), consisten en maniobres de control y proyeición del adversariu.

Per otra parte, nel práuticamente desconocíu estilu Mien Quan (Puñu d'Algodón) hai dos formes colos nomes “Wuhua Pao” (Cañón de les Cinco Flores) y “Wuhua Chui” (Golpáu de les Cinco Flores). Nun paez de toes maneres qu'esti estilu s’asemeye nin punta al Shorinji Kempo.

Tamién nel estilu del águila, Yingzhao Fanzi Quan, hai una forma denominada “Wuhua Pao” (traducida unes veces como “Pantera de Cinco Flores” y otres como “Cañón de Cinco Flores”), anque tampoco les carauterístiques atlétiques y acrobátiques d'esta forma nun paecen tener rellación denguna col Gokaken o con cualesquier otru aspeutu del Shorinji Kempo.

Finalmente dellos prauticantes de Shaolin Kung Fu conocen, ente les decenes de formes y programes diferentes qu'esisten, una forma denominada Shaolin Wuhua Quan.

ReferenciesEditar

Enllaces esternosEditar