Xuacu Amieva

Luis Joaquín Amieva Celorio (12 d'ochobre de 1954, El Mazucu), más conocíu como Xuacu Amieva, ye un gaiteru asturianu nacíu n'El Mazucu, Llanes. Maestru de gaiteros, distínguese pol so llabor de recobramientu del patrimoniu cultural y musical asturianu, siendo fundador d'abondos grupos folklóricos y bandes de gaites. Tamién destaca la so creación musical, que ye reconocía a nivel mundial con premios de prestixu como'l Troféu Macallan del Festival Intercélticu de Lorient o'l Grammy.

Xuacu Amieva
Vida
Nacimientu	El Mazucu, 12 d'ochobre de 1954 (70 años)
Nacionalidá	España
Estudios
Llingües falaes	castellanu asturianu
Oficiu	escritor, gaiteru

Biografía

La so vocación musical vien-y de familia, yá que so madre yera cantante de tonada y tenía parientes que tocaben la gaita. En 1974 entró a formar parte del grupu «Urogallos». Interesáu na música tradicional asturiana participa en delles agrupaciones folklóriques como «Raigañu», «Urogallos» y «Andecha Folklor d'Uviéu». Nellos fai un importante llabor de recobramientu tanto de músiques como d'instrumentos populares como la bandurria, la gaita de rabil, la trompa o arpa de boca, la flauta travesera de madera, ...

Nel añu 1980 crea n'Uviéu la «Escuela de música tradicional», de la que más tarde tendría qu'abrir delegaciones n'otros puntos del Principáu debido a la gran demanda. Nestes escueles naceríen delles de les primeres bandes de gaites d'Asturies, como la Banda de los Ḷḷumerinos o la Banda Gaites Naranco.

Arriendes d'esi trabayu d'enseñanza funda los grupos folk Beleño y Ubiña. En 1990 formó el grupu folk «Xuacu Amieva». En 1995 collabora colos irlandeses The Chieftains nel so discu Santiago tocando'l tema "El besu". El discu obtendría nel añu 1997 el premiu Grammy.

Nel añu 2006 convirtióse nel presidente de la Xuntanza de Gaiteros Asturianos (XUGA), asociación na que s'amestaron les dos asociaciones de gaiteros que nesi momentu funcionaben n'Asturies.

Discografía

• Método de gaita (1984)
• Onde l'agua ñaz (1986)
• Ubiña (1988)
• Xostrando (1989)
• Collaboración en Las cornamusas de Europa (1991)
• Lluna caldia (1992)
• La gaita asturiana (1993)
• Collaboración col tema El besu nel álbum Santiago de The Chieftains (1995)
• Tiempo de mitos (1999)
• al son del fueu (2003)
• Seis (2006)

Llibros

• Método de gaita (1984)
• Método de gaita asturiana (1998)
• La gaita asturiana. Método interactivo de enseñanza (2003)

Curtiumetraxes

• Mitos astures (1997)

Enllaces esternos

• Datos: Q9096754