Yerba

(Redirixío dende Yerbácea)

En botánica, una yerba ye una planta que nun presenta órganos decididamente maderizos. Los tarmos de les yerbes son verdes y muerren xeneralmente al acabar la bona estación, y sustitúyense por otros nuevos si la yerba ye viviega.

Yerba.

Munches yerbes son añales, naciendo de grana al empiezu de la estación favorable y nun dexando al acabar ésta sinón granes nueves nel suelu. Esisten tamién yerbes viviegues, que retoñen dende tarmos soterraños o asitiaos a ras de suelu. Los órganos soterraños implicaos son rizomes (tarmos horizontales) y bulbos. Munches yerbes biañales formen una roseta de fueyes pegada al suelu nel so primer añu, nel que nun se reproducen, y un tarmu altu y floríu, l'escapu floral, nel so segundu añu.

Llámense megaforbies (yerbes xigantes) a plantes que respondiendo formalmente al conceutu anterior, algamen un porte considerable, inclusive de dellos metros. Ésti ye'l casu, por exemplu, de les diverses especies de bananes (xéneru Musa).

Nel llinguaxe común aplícase tamién a cualquier planta que tien valor culinariu (yerbes arumoses) o melecinal (yerbes medicinales), con independencia del so calter yerbal o arbóreu, cuando la parte de la planta que s'usa son les fueyes o tallos tienros. Otra manera, les especies son les granes, bayes, corteyes, raigaños o otres partes de la planta.

"Yerba" o "la yerba" ye tamién un términu de la xíriga emplegada pa denominar al cannabis.


Referencies editar

Enllaces esternos editar