Área estadística metropolitana

Nos Estaos Xuníos nómase área estadística metropolitana (Metropolitan Statistical Area, MSA) a una rexón xeográfica con una densidá de población relativamente alta nel so centru y que forma una entidá con llazos económicos importantes. Estes rexones nun formen una ciudá per sigo mesmes, nin son divisiones alministratives afitaes como los condaos nin entidaes separtaes como los estaos. Esto fai que la definición de cualisquiera d'elles pueda variar según qué entidá la faga. Los criterios estadísticos pa un área metropolitana estándar foron definíos en 1949, y revisaos como área estadística metropolitana en 1983[1]. Un área metropolitana típica tien como centru una gran ciudá qu'exerce una influyencia sustancial sobre la so rodiada (como Chicago o Atlanta). Por embargu, delles árees metropolitanes contienen más d'una gran ciudá y nun hai preeminencia de denguna d'elles; asina asocede, por exemplu, na metroplex Dallas-Fort Worth o na Minneapolis-Saint Paul.

Les árees estadístiques metropolitanes son definíes pola Oficina d'Alministración y Presupuestu (Office of Management and Budget, OMB), y utilizaes pola Oficina del Censu (U.S. Census Bureau) y otres axencies gubernamentales federales pa la ellaboración de les sos estadístiques[2].

MapaEditar

 
Mapa de les árees estadístiques metropolitanes d'Estaos Xuníos y Puertu Ricu en marzu de 2020. Les 392 árees estadístiques metropolitanes apaecen en color verde escuru. Les 547 árees estadístiques micropolitanes apaecen en color verde claro.

DefinicionesEditar

Les estadístiques de la Oficina del Censu referíes a les árees metropolitanes ellabórense acordies coles siguientes definiciones.

La Oficina d'Alministración y Presupuestu define un conxuntu d'árees estadístiques basaes nún nucleu (Core Based Statistical Areas, CBSAs) al traviés de tol país. Les CBSAs defínense sobro la base d'un área urbana central o d'una agrupación urbana, esto ye, d'un área contigua con una densidá de población relativamente alta. Les CBSAs tán formaes por condaos y entidaes equivalentes a ellos[3]. Los condaos incluyíos nel área urbana central nómense condaos centrales de la CBSA; sonlo los que tienen polo menos un 50% de la so población viviendo n'árees urbanes de más de 10.000 habitantes[4]. Los demás condaos de la rodiada, nomaos condaos periféricos, inclúyense na CBSA si caltienen llazos sociales y económicos fuertes colos condaos centrales, dalgo que s'oxetiva estudiando la cantidá de los sos habitantes que viaxen a ellos pa trabayar. Un condáu periféricu inclúyese na CBSA si la midida del intercambiu d'empléu, esto ye, el porcentaxe de xente emplegao que se desplaza a los condaos centrales a trabayar ye del 25% o más, magar qu'esto faise de forma estimao y almítense esceiciones a esta cifra, porque, por exemplu, puede haber fasteres d'esos condaos periféricos que seyan, por paisaxe y distribución de la población, totalmente rurales. Les CBSA axacentes fúndense núna única cuando'l condáu o condaos centrales d'una son al tiempu condaos periféricos de la otra. D'otra banda, una o más CBSA agrúpense o combínense pa formar una entidá estadística mayor, nomada área estadística combinada, cuando la midida del intercambiu d'empléu[5] ye del 15% o superior.

Les CBSA sodivídense n'árees estadístiques metropolitanes, que son les que se formen alredor d'árees urbanes de polo menos 50.000 habitantes, y árees estadístiques micropolitanes (Micropolitan Statistical Area, μSAs), cuando'l clúster central del área tien ente 10.000 y 50.000 habitantes. El 19 de xineru de 2021 la Oficina d'Alministración y Presupuestu sacó a información públicu un proxectu p'aumentar la población mínima pa considerar un área urbana como área estadística metropolitana de 50.000 a 100.000. Sicasí, posteriormente decidió caltener el mínimu actual demientres el ciclu censal de 2020[6].

Nos estaos de Nueva Inglaterra les ciudaes (towns) tienen más preponderancia alministrativa que los condaos, y ellí les árees estadístiques defínense en términos d'unidaes que tomen como base les ciudaes: son les nomaes NECTAs (New England City and Town Areas).

Ver tamiénEditar

ReferenciesEditar

  1. Caves, RW, Encyclopedia of the City, p. 459. Routledge, 2004. ISBN 9780415252256.
  2. Nussle, Jim. "Update of Statistical Area Definitions and Guidance on Their Uses" (PDF). Office of Management and Budget. pp. 1–2. (20 de payares de 2008).
  3. Census Geographic Glossary, na web de la Oficina del Censu de los Estaos Xuníos.
  4. "Office of Management & Budget, 2010 Standards for Delineating Metropolitan and Micropolitan Statistical Areas; Notice" (PDF). U.S. Government Publishing Office. National Archives and Records Administration.
  5. La midida d'intercambiu d'empléu (Employment Interchange Measure, EIM) ye un indicador de los llazos esistentes ente dos entidaes (CBSA) axacentes. Ye la suma del porcentaxe de trabayadores de la entidá de menor tamaño que trabayen na más grande y el porcentaxe y el porcentaxe d'empléu na más pequeña que correspuende a trabayadores que viven na mayor. (Metro-Micro, glossary, na web de la Oficina del Censu).
  6. The White House (July 13, 2021). "Office of Management and Budget Announces 2020 Standards for Delineating Core Based Statistical Areas" (Comunicáu de prensa del 13 de xunetu de 2021).

Enllaces esternosEditar