Alministración llocal nos Estaos Xuníos

El términu alministración o gobiernu llocal nos Estaos Xuníos abarca'l conxuntu de xurisdicciones alministratives de nivel soestatal. La mayoría de los estaos y territorios tienen polo menos dos niveles de gobiernu llocal: los condaos (counties), sodividíos en conceyos (townships) en dellos estaos, y municipalidaes (municipalities). A nivel municipal, amás, hai estremaos tipos d'entidaes de gobiernu: la ciudá (city), la villa (town), el distritu (borough) y el pueblu (village). La naturaleza y competencies d'estos tipos d'entidaes municipales varíen d'un estáu a otru.

Munches fasteres rurales, ya inclusive dalgunes árees suburbanes de munchos estaos, nun tienen dengún tipu de gobiernu más que'l del condáu. Notros llugares esiste la figura de la ciudá-condáu consolidada, na que les funciones y competencies de la ciudá y el condáu son desempeñaes por un únicu gobiernu municipal. En sitios como Nueva Inglaterra les villes (towns) son la única unidá de gobiernu llocal, y los condaos esisten únicamente a nivel nominal y pa propósitos estremaos del gobiernu del territoriu (por exemplu como xunidá d'encuadramientu de la población pa los datos censales).

A estos tipos xenerales de gobiernu llocal superpónense delles veces entidaes de gobiernu llocales o rexonales creaes con un propósitu específicu, como los distritos escolares o los distritos de bomberos, alcantarilláu, tresporte públicu, biblioteques, parques públicos, viesques...

En total, según los datos de la Oficina del Censu, en 2012 había nel país 89.004 entidaes alministratives de nivel llocal nos Estaos Xuníos.

Conceptu d'incorporación

Los países con sieglos de tradición na sodivisión del territoriu con propósitu alministrativu, d'organización y xestión del territoriu, tán dividíos en xunidaes alministratives de distintu rangu qu'abarquen tol territoriu. Sicasí, hai otros, ente los que rescamplen Estaos Xuníos, Canadá y Australia, que foron organizando alministrativamente'l territoriu mientres que progresaba la ocupación del espaciu de los sos respeutivos socontinentes. A lo primero eses tierres ocupaes por colonos nun taben encuadraes en denguna xunidá alministrativa. Asina por exemplu, nos Estaos Xuníes el gobiernu federal exercía, inclusive enantes de que s'escribiera la so constitución, la so soberanía sobre'l territoriu que nun formaba parte de dengún estáu. La forma de convertir formalmente a un territoriu en parte de los Estaos Xuníos yera al traviés del procesu nomáu incorporación: un territoriu solicitaba al gobiernu federal el derechu a poder formar un estáu, y esto daba a los sos ciudadanos la ciudadanía plena y tolos derechos sociales y políticos que lleva apareyada.

De la mesma forma, los habitantes d'una fastera d'un estáu que nun taba organizada a nivel municipal aconceyaben y solicitaben al gobiernu estatal la so incorporación como xunidá alministrativa menor dientru del estáu; esti concedía-y una carta o estatutu municipal al territoriu, que pasaba a ser una villa incorporada (incorporated town). Si corriendo'l tiempu el llugar medraba y convertíase nuna ciudá, el gobiernu solicitaba otra vuelta a les autoridaes estatales la so incorporación con esi nuevu nivel alministrativu, y otorgábase-y una nueva carta.

Historia

Cuando América del Norte foi colonizada polos europeos, de magar el sieglu XVII, los gobiernos europeos teníen perpocu control sobre la organización territorial de les sos nueves posesiones. Munchos asentamientos nacieron de la iniciativa de compañíes privaes, y magar que'l rei de Gran Bretaña yera téoricamente'l so soberanu, na mayoría d'ellos «toa l'autoridá gubernamental taba en manes de la compañia». Los colonos tuvieron que defendese por ellos mesmos, y crearon villes compactes organizaes como corporaciones llegales nún procesu que dellos autores describen como de «democracia pura».

«La xente, debido a la so necesidá de protexese de los indios y de los animales xabaces y al deseyu d'acudir a la mesma ilesia, asentáronse'n comunidaes pequeñes y compactes, que nomaron towns. La villa yera una corporación llegal, una xunidá política que taba representada na Corte Xeneral. Yera una democracia pura. Varies vegaes al añu los homes adultos aconceyaben pa discutir los problemes del asentamientu, pa poner impuestos, pa facer lleis llocales y pa escoyer a los sos cargos publicos. Los principales d'ente ellos, los homes selectos (selectmen), en númberu d'ente trés y nueve, yeren los responsables del funcionamientu de los asuntos públicos: el secretariu municipal, el tesoreru, l'alguacil, los asesores y los supervisores de los pobres. A día de güei esta forma de gobiernu caltiénse en bona parte en delles zones de Nueva Inglaterra. Henry William Elson, historiador, 1904.»

Namái podíen votar los propietarios de terrenos: nun hebo sufraxu universal en denguna colonia.La fundación de la colonia de la badea de Massachusetts (Massachusetts Bay Colony) en 1629 por un grupu de puritanos dirixíos por John Winthrop fízose cola intención declarada de que la xestión de la iniciativa tenía que «tar basada nel Nuevu Mundu más qu'en Londres». Les pequeñes villes de Massachusetts son comparaes por dellos autores a les ciudaes-estáu griegues, dominaes por una especie d'oligarquía, pero basada non na riqueza o'l nacimientu sinón na consideranza de los vecinos. La noción d'autogobiernu foi aceptada poles colonies, pero nun se desarrolló ensin problemes. Asina, na década del 1670 l'organismu real que regulaba'l comerciu mercantil nes colonies (Lords of Trade and Plantations) tentó d'anular la carta de fundación de la colonia de la badea de Massachusetts. Sicasí, pa 1691 toles colonies de Nueva Inglaterra recuperaran los sos gobiernos previos.

Ordenances que recueyen el funcionamientu de la corporación municipal del conceyu de Filadelfia, a entamos del sieglu XIX.

El vezu de votar establecióse bien ceo; convocar eleiciones foi, dafechu, una de les primeres coses que ficieron los colonos que fundaron Jamestown. En xeneral los votantes yeren homes de raza blanca descritos como «propietarios» y mayores de 21 años; sicasí, en dellos llugares los requisitos pa votar yeren entá mayores, y na práctica yeren pocos los colonos que teníen derechu a participar nes eleiciones. Les muyeres, sacante en perpocos llugares, foron excluyíes del votu, y tamién los homes de raza negra. Los colonos enxamás pensaben de sigo que taben embaxu l'autoridá de Londres, sinón que consideraben que teníen una especie d'asociación cola metrópolis. Los gobiernos representativos surdieron espontáneamente en delles colonies, y les cartes posteriores reconociéronlos y ratificáronlos. Les asamblees coloniaes aprobaben poques resoluciones y teníen poques competencies, y amás les sos sesiones duraben selmanes, un tiempu que munchos llexisladores nun podíen pasar ensin atender les sos propiedaes. Esto fizo que los colonos más ricos concentráranse nel control de los gobiernos llocales, nos que los cargos públicos ocupábense por xente que sacaba d'ello la satisfacción del cumplimientu del deber y prestixu más que beneficiu económicu.

«Los candidatos facíen campaña de forma distinta a como se fai anguaño. Nun había medios de comunicación nin publicidá. Los candidatos abordaben a los votantes personalmente pa pidí-yos el votu, esperábase d'ellos que tuvieren na mesa eleutoral el día de les eleiciones y chufaben de que teníen saludao a tolos votantes. Si ún nun se presentaba na mesa o nun yera cortés con toos nun tenía nada que facer na eleición. En delles zones, inclusive, los candidatos ofrecíen a los votantes comida y bebida, festeyando non solo a los sos partidarios sinón tamién a los de los otros candidatos.»

Los impuestos basábense xeneralmente na propiedá de la tierra, porque yera una riqueza inmueble con un valor conocíu pol públicu.

Tres de la Revolución de les Trece Colonies los gobiernos municipales yeren elixíos democráticamente na gran mayoría de les municipalidaes del nuevu país, y los diferentes gobiernos estatales entamaron a emitir cartes municipales que dotaron, demientres el sieglu XIX, a munches municipalidaes d'un gobiernu municipal oficial. La responsabilidá de les decisiones de gobiernu entamó a ser repartida, de forma variable según los estaos, ente los condaos, los conceyos y les municipalidaes. La medría del país, en tamañu y complexidá, fizo que les competencies en regulación económica, imposición o regulación mediuambiental concentráranse nos gobiernos estatales y federal, dexando a los gobiernos llocales les competencies, ente más otres, d'urbanismu, gravamen de la propiedá y xestión de los parques públicos. Rescampla ente elles la nomada zonificación, un conceptu surdíu na década de 1920, pol que les lleis estatales tresferíen a determinaes entidaes de gobiernu llocal la competencia de determinar los usos (residencial, industrial, forestal) del suelu del so territoriu. Un decretu típicu de zonificación incluí un mapa d'una fastera de tierra del conceyu o municipiu y un testu nel que s'especifique pa qué puede usase la tierra, cómo han de construyise les cases o edificios...

Tipos d'entidaes llocales

La décima enmienda de la Constitución de los Estaos Xuníos considera que la organización del gobiernu llocal ye competencia estatal, y non federal, sacante los casos especiales que son el distritu de Columbia y los territorios non estatales alministraos por Estaos Xuníos. De magar la so promulgación los distintos estaos tienen desarrollao caún la so propia estructura de gobiernu llocal. P'axudanos a entendela ye útil la clasificación ellaborada, con propósitos estadísticos, pola Oficina del Censu, qu'ellabora quinquenalmente un censu de gobiernos llocales (Census of Governments) nos que recueye datos sobro la so organización, sobro los sos emplegaos y sobro les sos cuentes. Les categoríes recoyíes nesti censu de gobiernos municipales son les que vienen darréu:

1. Condaos (County Governments)
2. Conceyos (Town o Township Governments)
3. Municipalidaes (Municipal Governments)
4. Estructures de gobiernu llocal con una finalidá específica (Special-Purpose Local Governments): distritos especiales, distritos escolares.

Condaos

Los condaos son, como norma xeneral, el primer nivel de sodivisión alministrativa de los estaos. En 2017 había n'Estaos Xuníos 3.031 condaos colos sos respectivos gobiernos. Al traviés d'ellos organízase'l territoriu na mayoría los estaos: namái nel distritu de Columbia, los estaos de Connecticut y Rhode Island y delles partes menores d'otros estaos nun hai un gobiernu condal. Los condaos nómense oficialmente, en Louisiana, como gobiernos parroquiales (parish), y n'Alaska como gobiernos distritales (borough), y, pa la Oficina del Censu, son condaos a efectos estadísticos.

Hai tamién dellos llugares nos que s'axuntaron nuna única entidá alministrativa una municipalidá, xeneralmente una ciudá, col so condáu. La Oficina del Censu considera a estes ciudaes-condáu como municipalidaes a efectos estadísticos. Son, ente más otres, la ciudá y distritu de Juneau, n'Alaska, la ciudá y condáu de San Francisco, en California, la ciudá y condáu de Denver, en Colorado, y el gobiernu xunificáu del condáu de Wyandotte y la ciudá de Kansas City, nel estáu de Kansas.

Hai, finalmente, ciudaes allugaes fora de la estructura de condaos qu'exercen les funciones de gobiernu que correspuenden a los condaos nel restu del territoriu. Son, por exemplu, Baltimore o Saint Louis, que tienen una estructura alministrativa separtada de los sos condaos axacentes homónimos. Carson City, en Nevada, ye una ciudá independiente con llendes con trés condaos, y en Virxinia hai 38 ciudaes independientes que nun formen parte de dengún condáu.

Conceyos y municipalidaes

Mapa del condáu de Cattaraugus, en Nueva York, cola so sodivisión en condaos (xunidaes de base geográfica) y municipalidaes (xunidaes de base poblacional).

Hai dos tipos de gobiernu de rangu inferior al del condáu, los conceyos (town o township) y les municipalidaes (municipality). El censu de gobiernos de 2017 inclúi un total de 19.495 gobiernos municipales y 16.253 gobiernos de conceyu nel país. Les diferencies ente los dos tipos d'entidaes de gobiernu vienen marcaes tantu poles circunstancies históriques qu'arrodiaron la so incorporación como a factores xeográficos. Asina, los llugares incorporaos xeneralmente tomen la forma de municipalidá, mentantu que les nomaes divisiones civiles menores asóciense con una organización de calter conceyil. Según la propia definición de la Oficina del Censu, «los llugares incorporaos establécense pa proporcionar servicios alministrativos pa una concentración de población, mentantu que la división civil menor créase, xeneralmente, pa proporcionar servicios o alministrar un área territorial, ensin tener en cuenta necesariamente a la so población.»

Según el censu de gobiernos el términu gobiernu municipal fai referencia a les sodivisiones polítiques nes que hai establecida una corporación municipal qu'organiza alministrativamente, y da serviciu, a una población específica concentrada nún área determinada. Los gobiernos municipales, autorizaos nes respeutives constituciones estatales, proporcionen y xestionen los servicios públicos d'un área definida, correspondiente de forma xeneral a un nucleu de población. Esta definición inclúi toles unidaes de gobiernu designaes oficialmente como ciudaes, distritos (boroughs), sacante los d'Alaska, villes (towns), sacante les de los seis estaos que formen Nueva Inglaterra y los de Minnesota, Nueva York y Wisconsin, y pueblos (villages). Estes xunidaes son, con calter xeneral, les mesmes qu'inclúi el censu de llugares incorporaos del censu xeneral de población, magar que nel censu de gobiernos esclúinse aquelles que nun tienen actualmente un gobiernu municipal activu.

Los gobiernos de conceyu son gobiernos llocales organizaos esistentes en venti estaos del Noreste y Mediu Oeste del país. Aú esisten establécense pa prestar los servicios xenerales de gobiernu nún área, xeneralmente nuna sodivisión xeográfica d'un condáu, non asociada a una concentración de población concreta. En función de la respeutiva llei estatal y de les sos circunstancies específiques un conceyu puede tar o non incorporáu, y hai tamién grandes diferencies ente unos estaos y otros na cantidá de servicios públicos que xestionen. Asina, les towns de Nueva Inglaterra controlen munchos más servicios que les d'otres fasteres del país, y en Connecticut y Rhode Island especialmente, son, a efeutos práuticos, l'equivalente, en cuanto a competencies, de les ciudaes, una y bones nestos dos estaos exercen el conxuntu de competencies que notros repártense ente los condaos, les villes y les ciudaes. Sicasí, y pese a qu'en dellos estaos reciben el nome oficial de corporación municipal y inclusive delles vegaes atienden los servicios d'árees perpoblaes, estrémense de les municipalidaes en que la so base territorial ye puramente xeográfica, territorial, y non venceyada a concentraciones concretes de población que solicitaran la so incorporación.

Distritos especiales y distritos escolares

El censu de gobiernos de 2017 recueye la esistencia de 38.542 distritos especiales. Estos son xunidaes gubernamentales independientes, creaes pa un oxetivu específicu, y qu'esisten como entidaes separtaes con un grau importante d'independencia fiscal ya alministrativa con respeutu a les otres entidaes de gobiernu llocal. Créanse pa proporcionar determináu serviciu, o dellos rellacionaos, a la población: dende asistencia hospitalaria o estinción de quemes a otros menores como la eliminación de mosquitos o'l mantenimientu de los cementerios.

Los distritos escolares recuéyense nuna estadística aparte. De los 14.061 qu'había nos Estaos Xuníos en 2017 12.754 eran independientes, esto ye, non dependientes d'otru gobiernu, municipal, conceyil, condal o estatal. La forma d'organizar la educación primaria y secundaria ye competencia estatal. En 30 estaos fáese al traviés de distritos escolares independientes, mentantu que nos notros estaos, sacante en 4 y nel distritu de Columbia, nos que nun hai distritos estatales independientes y toles escueles encuádrense dientru del sistema municipal o condal de gobiernu, amiéstense estos colos dependientes d'otros niveles de l'alministración. Hai, por últimu, 109 distritos escolares, allugaos en 16 estaos, que nun xestionen escueles, y namái s'ocupen de procurar tresporte o beques de matrícula notros llugares a los estudiantes que viven na so xurisdicción, o bien de proporcionar dellos servicios especiales a los sistemes que xestionen escueles.

Conseyos o asociaciones de gobiernu

Ye normal que los residentes nes principales árees metropolitanes del país vivan embaxu la xurisdicción de seis o más distritos especiales amás de la de la ciudá (city o town) y de la del condáu. Un área metropolitana típica abarca, na mayoría los casos, dellos condaos, varies docenes de ciudaes y cien o más distritos especiales. En California el problema de la fragmentación yera tan abegosu que'l congresu estatal creó, en 1963, una axencia gubernamental (Local Agency Formation Commission) pa supervisar el desarrollu ordenáu de les demás axencies gubernamentales en 57 de los sos 58 condaos.

Sicasí, como esti tipu d'esfuerzos de coordinación directa impuesta pol estáu nun suel funcionar, munchos gobiernos llocales formen por iniciativa propia conseyos de gobiernos, conseyos metropolitanos o asociaciones de gobiernos, organizaciones qu'actúen como axencies de planificación rexonal y foru de debate de cuestiones d'interés rexonal pero que tienen menos poder que'l de los sos miembros individuales. De magar finales de la década de 1990 un movimientu, al que aveza a nomase Nuevu Rexonalismu, fáese cargu de la inutilidá d'intentar consolidar competencies n'instituciones de gobiernu rexonales y busca la creación d'estructures rexonales que nun suplanten a los gobiernos llocales yá esistentes.

Referencies

• Datos: Q516156
• Multimedia: Local government in the United States