Aniceto Sela Sampil

Aniceto Sela Sampil (13 de setiembre de 1863, Mieres – 9 de mayu de 1935, Uviéu) foi un xurista asturianu, rector de la Universidá d'Uviéu, miembru del Grupu d'Uviéu, y padre del tamién xurista Luis Sela Sampil.

Aniceto Sela Sampil
caderalgu d'universidá
Vida
Nacimientu	Mieres, 13 de setiembre de 1863
Nacionalidá	España
Muerte	Uviéu, 9 de mayu de 1935 (71 años)
Estudios
Llingües falaes	castellanu
Oficiu	xurista
Miembru de	Instituto de Derecho Internacional (es)

Biografía

Estudió Derechu na Universidá d'Uviéu, doctorándose n'Internacional na Central de Madrid. Foi designáu profesor de la Institución Llibre d'Enseñanza. En 1888 algamó plaza de catedráticu de Derechu Internacional Públicu y Priváu, na Universidá de Valencia. Treslladóse a la d'Uviéu, na que se xubiló en 1933. Foi rector de la mesma en 1900, secretariu de la so Xunta d'Estensión Universitaria dende 1898. Representó a la universidá asturiana nel Congresu Pedagóxicu Hispanoamericanu de Madrid y nos conceyos universitarios de Valencia, n'ochobre de 1902, y presidió la de Barcelona, en 1905. Foi direutor xeneral d'Enseñanza Primaria en 1919. En 1911 foi elixíu asociáu del Institutu de Derechu Internacional, y en 1921 miembru del mesmu. Presidió densde 1929 l'Asociación Francisco de Vitoria. Collaboró na Enciclopedia jurídica Seix y nel Boletín de la Institución Libre de Enseñanza.

En 1919 pronunció en Burdeos la conferencia: Concepción Arenal et le droit de la guerre, en Madrid: La Sociedad de las Naciones, y en 1929: Vitoria y los medios d'adquirir la soberanía territorial. Realizó unos brillantes comentarios al Rapport sur les mandats internationaux, de Henri Rolin. Tamién tradució del alemán el manual de Neumann Derecho Internacional Público Moderno. Foi maestru de notables discípulos, como Camilo Barcia Trelles, Adolfo Miaja de la Muela, el so fíu Luis Sela Sampil o César G.F. Castañón. Nel Boletín de la Institución Llibre d'Enseñanza asoleyó: Los procedimientos d'enseñanza en la Facultad de Derecho de la Universidad de Oviedo, Derecho Internacional Público y Derecho Internacional Privado, La misión moral de la Universidad, etc. Dellos de los sos postulaos fueron revolucionarios pal so tiempu. El so pacifismu tuvo mui influidu pol pensamientu de Concepción Arenal. Foi hermanu del escritor Inocencio Sela Sampil.

Obres

• (1910) La Educación Nacional: hechos e ideas.
• (1911) Manual de Derecho Internacional.
• (1912) Curso popular de Derecho Internacional.

Referencies

• El Tesoro de Oviedo, Aniceto Sela Sampil

Enllaces esternos

• Datos: Q8199740
• Multimedia: Aniceto Sela Sampil