Bandera d'Estonia

Bandera d'Estonia
Datos
Entidá	Estonia
Fecha d'adopción	21 de payares de 1918 (106 años)
Proporción	11:7
Usu
Colores	azul, negru y blancu
Elementos representaos	campo (es) (azul, negru, blancu)

La bandera d'Estonia (n'estoniu: Eesti lipp, lliteralmente "bandera nacional" n'asturianu) ye una bandera tricolor formada por tres bandes horizanteles del mesmu tamañu de color azul, negru y blancu. N'Estonia ye coloquialmente llamada sinimustvalge (que traducíu lliteralmente ye "azul-negru-blancu") en referencia a los sos colores. La bandera foi adoptada el 21 de payares de 1918 tres la independencia del país. Durante la ocupación de la Xunión Soviética, la bandera dexó d'usase oficialmente, pero'l gobiernu estoniu nel exiliu siguió usándola. La bandera foi reestablecida el 7 d'agostu de 1990.

Historia

La bandera actual apaeció nos años 1880 como la bandera de l'Asociación d'Estudiantes Universitarios Estonios de la Universidá de Tartu (fundada en 1632) y foi consagrada'l 4 de xunu de 1884.^[1] Darréu, la bandera venceyose col nacionalismu estonio y foi utilizada como bandera nacional (riigilipp) cuando Estonia declaróse independiente'l 24 de febreru de 1918: la bandera foi adoptada formalmente'l 21 de payares de 1918.^[2]

Primer bandera de la RSS d'Estonia (1940-1953).

Bandera de la RSS d'Estonia (1953-1980, 1980-1990)

En 1980 añadióse una parte trasera a la bandera diferente a la delantera, que siguió siendo la mesma (1980-1990).

Tres la ocupación por parte de la Xunión Soviética en xunu de 1940 prohibióse l'usu de la bandera. Foi arriada de los llugares más simbólicos, como la torre de Pikk Hermann en Tallín (el 21 de xunu de 1940) cuando Estonia inda yera, formalmente, independiente. Al otru día volvió ser izada xunto cola bandera collorada. La tricolor sumió dafechu de la torre'l 27 de xunetu de 1940 y foi reemplazada por una nueva bandera creada para l'apocayá fundada República Socialista Soviética d'Estonia.

La nueva bandera yera colorada cola foz y el martiellu nel cantón y enriba llevaba la inscripción ENSV, dambos en color oru. ENSV (Eesti Nõukogude Sotsialistlik Vabariik, República Socialista Soviética d'Estonia n'asturianu) yera l'equivalente estoniu para la sigla RSSE del nome oficial del Estáu.

Mientres la ocupación d'Estonia pola Alemaña nazi (1941–1944), la tricolor foi aceptada como la bandera de la etnia estonia, pero non como bandera nacional, y la bandera collorada foi prohibida. Dempués de la retirada alemana, la bandera tricolor foi izada una vegada más. El 22 de setiembre, la bandera collorada remaneció y pocu tiempu dempués la tricolor foi retirada.

En 1953, cola normalización vexilológica de toles banderes de les repúbliques soviétiques, aprobóse un nuevu diseñu, que consistía nun fondu colloráu con foles azules y nel cantón la foz y el martiellu y la estrella colorada. En 1980 se reglamentó que la foz y el martiellu y la estrella colorada de les banderes soviétiques nun teníen d'apaecer nel aviesu de les banderes.

La bandera tricolor tuvo prohibida hasta los díes de la Perestroika, a finales de la década de los años 1980, cuando'l 24 de febreru de 1989, la bandera azul-negra-blanca (sinimustvalge n'estoniu) ondeó nuevamente na Torre Pikk Hermann en Tallín. Foi nuevamente declarada como la bandera nacional el 7 d'agostu de 1990, poco más d'un añu dempués de qu'Estonia independizárase de la XRSS.

Simbolismu

Una versión de la interpretación de la bandera a traviés d'una fotografía d'un paisaxe d'Estonia.

El poeta Martin Lipp fizo una interpretación símbólica de la bandera que ye mui popular nel país. Según él, la bandera representa el cielu azul d'Estonia, mientres qu'l negru repensenta l'arraigu a la tierra y el destinu de los estonios. El blancu sería la pureza el trabayu duru y compromisu.^[3]

Propuestes de cambéu

Modelu de bandera propuesta que inclúi la cruz escandinava.

En 2001, el politicu Kaarel Tarand suxirió un cambéu a la bandera d'Estonia pa añadile la cruz d'estilu escandinavu colos mesmos colores que la actual bandera.^[4] Los sos defensores dicen que la nueva bandera daría una imaxe más moderna al país y simbolizaría los llazos ente Estonia y los países escandinavos. Ya en 1919, cuando s'adoptó la bandera tricolor, ficiéronse varies propuestes q'incluyíen la cruz escandinava.