Batiente

El batiente ye una modalidá de bolos tradicional d'Asturies na que se llanza una bola grande d'ente 20 y 30 cm que se tien entre la palma la mano y l'antebrazu. La bola llánzase contra los bolos qu'han saltar dos parapetos a distintes altures.

Batiente
[editar datos en Wikidata]

La carrera ye'l nome que se-y da al sitiu per onde cuerre'l xugador. Les carreres son amplies, hailes de mas de 20 m pero'l llargu la carrera dependi del xugador. Nel llanzamientu apéase la bola a la carrera nel tabla: polo xeneral una tablona que ye mediu tochu de castañu enterráu al ras del suelu, la tabla tien mas d'un metru de llargu por mediu d'anchu. El xugador tien qu'agachase en plena carrera p'apear la bola na tabla y que nun dea botes.

El rodáu o batiente anguaño faise de tablines de madera pero antaño facíenlu de barru roxu. Ésti daba muncho trabayu; cribábase'l barru, regábase y llueu pisonábenlu con un pisón pa dexalu llisu. El rodáu pue dir de 15 a 20 metros y tien un sucu d'una cuarta a manzorga, la bola tien que rodar apegau a esti sucu. Anguaño hai boleres que tienen el mesmu sucu a mandrecha cola sola misión de que la bola nun escape. Al final del rodáu ta la solera. Ye una piedra plana d'unos 50 por 30 cm. La solera plántase cruzao al sen del tiru, entiérrase al ras pero álzase pela parte d'atrás. Na solera escárbense quince furacos en tres files de cinco. Los furacos nun se reparten igual na solera, tán mas apiñaos al llau del sucu pa beneficiu de les boles bien tiraes.

Los bolos fainse con palos d'ablanu descorteyao y d'unos 3 ó 3,5 cm de diámetru, son d'altu como dos cuartes. Pembaxo déxense tal cual y perriba táxense un poco pa estrenchalos. El bolu afíncase nos furacos con barru blanco. El barru ye pa que nun caya porque'l bolu enclínase p'alantre, pa que la bola lu faiga saltar.

Hai dos parapetos, el primeru ye'l catorce, nun llega al metru d'altu y dista de 2 a 3 metros de la solera. L'otru parapetu ye'l caba, dista otro tanto del catorce y tien tres metros d'altu.

Les tiraes puntúen asina: cúntense los bolos que salten el caba, nun suelen ser más de cinco y puntúen 55 puntos caún. Cúntense los bolos que cayeron al llau de la solera; d'habelos, el primer suma 5 puntos y los demás ún, Los bolos que resten del total de quince son los que pasen el catorce, d'ellos sumen 10 puntos y 14 el primeru.

El batiente xuégase a partíes de 1.000 puntos, de 2.000 puntos, etc. Les partíes son d'ún contra ún, o por pareyes. L'armador ye'l qu'arma los bolos, colócalos na solera y cunta la puntuación de cada bola. Cuando algamen la puntuación dizse “partió” y el que pierde paga al armador y dexa'l xuegu o pide turnu pa tornar xugar. Cuando nuna bolera hai muncha xente tamién xueguen rayes que permiten xugar a tol mundu por un preciu fixu, cada xugador tira dos boles y el que saque más puntos lleva un premiu, que pon l'armador, tradicionalmente una pita o un llacón.

Enllaces esternos

• Federación Asturiana de Bolos
• Bolu batiente na páxina del Principáu (enllaz rotu disponible n'Internet Archive; ver l'historial y la última versión).

• Datos: Q5731601