Baxu Nalón

Baxu Nalón
Alministración
Xeografía
Superficie	146.36 km²
Demografía

El Baxu Nalón ye una de les contornes turístiques nes que ta estremáu'l territoriu del Principáu d'Asturies. Ta formáu por trés conceyos, Pravia, Sotu'l Barcu y Muros, siendo la capital comarcal o cabecera la Villa de Pravia. Los consistorios pertenecientes a la mancomunidá collaboren ente sigo pa potenciar la economía na zona, basada nel turismu y l'agricultura de manera xeneral.

Situación xeográfica

La contorna asítiase nel cursu baxu del ríu Nalón y engloba los conceyos de Pravia, Sotu'l Barcu y Muros. Llinda al norte col mar Cantábricu, al oeste con Cuideiru, al sur con Salas y al este con Candamu y con Castrillón.

La ría de San Esteban atópase íntegramente nel territoriu comarcal y amás d'esti ríu pueden atopase otros cursos fluviales importantes como'l ríu Narcea o'l ríu Aranguín. Estos ríos escurren per valles bien marcaos que moldien el relieve de la zona. El más conocíu ye'l Valle d'Arango, aniciáu pel ríu Aranguín, famosu poles sos casones señoriales y la ganadería. Arrodiando los valles atópense un conxuntu de sierres de medianu altor como la Sierra de Fontebona, onde s'atopen visos como'l Picu Mirabeche, Picu Casafría y Alto del Marqués; la Sierra de Sandamías col Altu del Monxagre de 655 metros d'altitú y la Sierra de los Vientos na llende con Cuideiru, onde atopamos el techu de la contorna, Llan de Cubel, cume de 678 metros d'altitú.

Turismu

Trátase d'una zona turística tantu pol so encantu natural como pola so importancia na historia d'Asturies. Per un sitiu son bien frecuentaes les rutes de senderismu que percuerren los conceyos de Muros y Pravia, como la Sienda de la Sablera d'Aguilar o la Sienda Verde de Santianes de Molenes. Nesti últimu pueblu, Santianes de Molenes, atopábase la monarquía asturiana allá pol sieglu VIII y podemos reparar na ilesia de San Xuan Evanxelista, de planta basilical, que ye una auténtica xoya del prerrománicu asturianu. La zona tamién ye conocida poles sos sableres y pol antiguu puertu industrial de San Esteban. Pa terminar, la Colexata de Santa María La Mayor de Pravia y el Conceyu pravianu presiden la cabecera de la contorna.^[1]^[2]

Comunicaciones

La contorna ta perfectamente comunicada coles principales ciudaes asturianes. Per un llau, Avilés atópase a apenes 20 km, Uviéu a unos 50 km y Xixón a 40 km. L'aeropuertu d'Asturies alcúentrase en tierres del vecín conceyu de Castrillón. L'autovía A-8 traviesa el conceyu d'este a oeste, al igual que la N-432. Toles capitales de conceyu tienen estaciones de ferrocarril de FEVE y Pravia una estación d'autobuses con 4 dársenes. Sicasí, hay una plataforma vecinal que esixe la constucción de una pasarela enriba'l Nalón pa xunir los pueblos de San Esteban con San Xuan^[3]

Deportes

El deporte ye una actividá importante na zona, yá que esisten bastantes clubes deportivos. El más importante de toos ellos ye'l CD Praviano, club de fútbol de Pravia que na temporada 2018/19 xugaba na Tercer División d'España y xuega nel Estadiu Santa Catalina, con capacidá pa 3000 espectadores. Tien más de 400 socios.^{[ensin referencies]} Otros clubes de fútbol del baxu Nalón son el CD Villa de Pravia, el Rey Silo FS, la SD Agones, el CD Soto del Barco, l'Atlético Arenesco y el Muros Balompié. Tocantes a otros deportes, destaquen clubes de tenis como la Villa de Pravia o'l CT Pravia; el Club Los Cuervos en piragüismu; el Club Remeros del Nalón en remu; el Club Ciclista Lin de Cubel BTT o'l Grupo de Monte Monteagudo.

Referencies

[1] ttps://www.turismoasturias.es/descubre/donde-ir/comarcas/bajo-nalon

[2] ttp://www.bajonalon.es/comarca-bajo-nalon/

[3] ttps://www.20minutos.es/noticia/3474952/0/plataforma-por-pasarela-bajo-nalon-pregunta-al-principado-por-proyecto-al-cumplirse-ano-compromiso/

[1]

[2]

[3]