Beluchistán

Beluchistán
Situación
Tipu	rexón xeográfica
Asitiáu en	Mar Arábigu
Coordenaes	28°53′00″N 64°25′00″E / 28.88333°N 64.41667°E
	Beluchistán Beluchistán (Irán)
Datos
Noamáu por	Etnia Baluchi

Beluchistán (en llingua balochi بلوچستان, la tierra los baloch) ye una rexón desértica y montañosa de la meseta iranina, nel suroeste d'Asia. Abarca'l suroeste de Paquistán, el sureste d'Irán y una pequeña parte del suroeste d'Afganistán. La parte meridional de Beluchistán ye conocida pol so nome históricu, Makrán. Ocho millones de balochi viven en Paquistán, y otru millón n'Irán, en tierres mayormente desértiques; unos 100.000 viven n'Afganistán, y unos 30.000 más en Turkmenistán.

Beluchistán recibe'l so nome de les tribus Baloch qu'habiten la rexón y tienen el balochi como la so llingua nativa. El persa, el pashtu y l'urdu son usaes como segundes llingües en delles zones, mentanto que la llingua brahui ye falada pola minoría Brahui.

Xeografía

Les llendes xeográficos de Beluchistán son:

Al nordeste los montes de Sulaimán, que-y faen de llende col Punjab. Esta cordelera montañosa, en forma d'arcu, tien el so cumal nel picu Kalifat (3.497 m), al este de Quetta, y ábrese dempués, al traviés del puertu de Bolan, llugar tradicional de pasu de les caravanes que viaxaben d'Oriente Mediu al subcontinente indiu, hacia la llanada de Kacchi.
Al sureste la cordelera de Khistar, que s'estiende hasta'l desiertu de Makrán, qu'ocupa la zona costera del golfu d'Omán.
Al este Karachi, ciudá que foi la primer capital de Paquistán.

Historia

Les evidencies más antigües d'ocupación humana no qu'anguaño ye Beluchistán remóntense al paleolíticu, representáu por campamentos de cazadores y ferramientes de piedra. Los asentamientos más antiguos remóntense al neolíticu cerámicu (7000-6000 e.C.), y inclúin l'asentamientu de Mehrgarh, na llanura de Kachi. Nel calcolíticu eses aldees ficiéronse más grandes de resultes del desarrollu del comerciu tanto de productos ellaboraos (cerámica) como de materies primes. Pal 2500 e.C., na edá del Bronce, la rexón taba dientro la cultura Harappan. p Del sieglu I al III la rexón taba dirixida polos Pāratarājas (reis pārata), una dinastía de reis indo-partos o indo-escites que parez que correspuenden colos Pāratas qu'apaecen mencionaos nel Mahabharata, los Puranas y otros escritos védicos ya iraninos contemporáneos. La efixie de los reis pārata aportó a nosotros al traviés de les sos monedes. Nelles representábase, nuna cara, el bustu del rei, y n'otra una esvástica dientro d'una lleenda circular, escrita en brahmi nes monedes de plata y en kharoshthi nes de cobre. La mayoría d'eses monedes alcontráronse cerca Loralai, nel oeste del actual Paquistán.

Mapa de la rexón en 1904. En mariellu, Beluchistán.

La rexón foi islamizada nel sieglu IX, y convirtióse en parte del territoriu de los safárides de Zaranj. Estos foron sustituyíos polos gaznávides y los góridos. En 1749 Ahmad Shah Durrani incorporó la zona al imperiu afghanu. Nueve años después, en 1758, el Kan de Kalat Mir Noori Naseer Khan Baloch rebelose escontra elli y lliberó a Beluchistán, qu'algamó la so independencia. La fastera occidental foi invadida por Irán nel sieglu XIX, afitándose la llende ente los dos estaos en 1871. Yá yera la dómina, por embargu, del protectoráu británicu, que determinó que les tierres de Beluchistán nun se convirtieran, como pretendíen los nacionalistes balochi, nún estáu independiente cuando ellos colaron de la rexón. De magar la independencia de Paquistán, hubo trés revueltes nacionalistes, que tentaron, ensin consiguilo, espulsar al exércitu paquistanín pa recuperar la independencia de la rexón.

División alministrativa

La rexón ta alministrativamente dividida ente trés países: Paquistán, Afganistán ya Irán. La parte mayor correspuénde-y a Paquistán, y la so capital ye la ciudá de Quetta; otres ciudaes importantes nel Beluchistán paquistanín son Gwadar, Turbat, Khuzdar, Sibi y Kalat. Tanto Paquistán como Irán refuguen los argumentos de los nacionalistes balochi y consideren les fasteres beluchistantes embaxo'l so control como parte indivisible del so territoriu.

La fastera septentrional, que foi colocada pol Imperiu británicu dientro d'Afganistán pa debilitar la fuercia de los balochi, inclúi el distritu Chahar Burjak de la provincia de Nimruz y el desiertu de Registán dientro de les provincies d'Helmand y Kandahar.

Referencies

Enllaces esternos

Wikimedia Commons tien conteníu multimedia tocante a Beluchistán.