Bolxevique

Los bolxeviques (del rusu большевик, "miembru de la mayoría") yeren una faición dientro del Partíu Obreru Socialdemócrata de Rusia, dirixida por Vladímir Ilich Uliánov Lenin, contrapuesta a los menxeviques, dirixíos por Julius Martov.

Bolxevique
facción política (es) , movimientu políticu y grupu d'humanos
Historia
Fundación	1903
Orixe del nome	mayoría simple
Participación empresarial
Formáu por	bolchevique (es)
Bolsa de valores	Partíu Obreru Socialdemócrata de Rusia

Conceyu bolxevique

Polémica en 1903

La xebra asocedió nel Segundu Congresu del partíu, fechu en Bruxeles y Londres en 1903. Les tesis propuestes por Lenin foron:

1. La llucha pola dictadura del proletariáu como preséu necesariu de la revolución p'avanzar haza'l socialismu.
2. L'alianza de la clas obrera col campesináu pa baltiar l'autocracia rusa, llevar a términu los oxetivos democráticos de la revolución y enfrentar les vacilaciones y traiciones de la burguesía.
3. El desaniciu de los llatifundios terratenientes y la entrega de la tierra a los campesinos.
4. La reconocencia del drechu d'autodetermín de les naciones oprimíes por Rusia.
5. La condición de pertenecer a una organización del partíu pa ser consideráu miembru d'él.
6. La necesidá de construir un partíu nel que la cadarma interna se basara nel "centralismu democráticu", con militantes profesionales, que garantizaren la homoxeneidá ideolóxica y la capacidá d'organización, quienes habíen portar como programa revolucionario que'l proletariáu conquistara'l poder políticu (dictadura del proletariáu), pa llevar a cabu la revolución.

Por mor de la bayura temes aldericaos, les votaciones foron en favor o en contra de les propuestes de Lenin. Foi aprobáu un programa mínimu escontra l'autocracia y un programa máxime haza'l socialismu colos puntos de vista leninistes, sacantes no que se refier al tema de tierres, pos esixíase namás que la devolución de les tierres arrebataes polos terratenientes a los campesinos. Nos temes organizativos foron aprobaes les propuestes de Martov; sicasí, na fas final del congresu, cuando diba elixise la direición del partíu, la correllación de fuercies invirtióse otra vuelta por mor del retiru de dellos delegaos, a los que'l congresu ñegó propuestes del so interés. Los nomatos de bolxevique "la mayoría" y menxevique, "la minoría", remanecen del resultáu de la eleición del Comité Central y del Comité de Redaición del periódicu Iskra, qu'ensin embargu poco depués del congresu quedó en manes de los menxeviques.

Alloñamientu colos menxeviques

Tres la derrota de la Revolución de 1905, los bolxeviques caltuvieron la so estratexa radical pol afitamientu d'una dictadura d'obreros y campesinos; no que cinca al programa agrariu esixeron la nacionalización de la tierra y la so entrega a los campesinos; no organizativo demandaron caltener les cadarmes clandestines del partíu. Too esto conduxo a la escisión de los menxeviques en 1912.

Guerra y revolución

Al españar la I Guerra Mundial los bolxeviques alliniáronse col sector "internacionalista" de la socialdemocracia europea, opuxéronse a la "defensa de la patria" (sostenida polos llamaos "defensistes") y llamaron a "refugar la guerra imperialista y convertila en guerra civil revolucionaria". Los menxeviques xebráronse entós porque los más de los sos dirixentes fixéronse defensistes, mentanto Martov encabezó un grupu internacionalista, que d'otra miente siguió organizativamente separtáu de los bolxeviques y políticamente enfrentáu por diverxencies asemeyaes a les sosteníes dende 1903.

Tres el trunfu de la Revolución Rusa de 1917, yá nel gobiernu, la faición bolxevique tomó'l nome de Partíu Comunista de Rusia (bolxevique), llueu Partíu Comunista de la Xunión Soviética (bolxevique). Nun foi hasta 1952 en qu'eliminaron la referencia "bolxevique" del nome oficial del partíu, que pasó a denomase Partíu Comunista de la Xunión Soviética.

El términu emplégase davezu como sinónimu de comunista, anque esti propiamente nun lo seya.

Enllaces esternos

• Historia del Partíu Comunista Bolxevique de la XRSS (enllaz rotu disponible n'Internet Archive; ver l'historial y la última versión).
• Una visión de primera mano de la Revolución Rusa escrita por John Reed (enllaz rotu disponible n'Internet Archive; ver l'historial y la última versión).
• Trés conceiciones de la Revolución Rusa, testu de León Trotsky
• Historia de la Revolución Rusa. León Trotsky

• Datos: Q83372
• Multimedia: Bolsheviks