Cadena Báltica
Conozse como Cadena Báltica (n'estoniu, Balti kett, en letón Baltijas ceļš, en lituanu Baltijos kelias) a la filera humana que formaren más d'un millón de persones a lo llargo de más de 600 quilómetros que a les siete de la tarde hora llocal del 23 d'agostu de 1989 crució les trés repúbliques báltiques (Estonia, Letonia y Lituania) pasando peles sos capitales (Tallinn, Riga y Vilnius, respeutivamente).
La manifestación entamóse pa llamar l'atención de la opinión pública mundial sobre'l destín común que sufrieren les trés repúbliques. Ello ye que se celebró coincidiendo col cincuentenariu de la firma del alcuerdu secretu conocíu como Pactu Molotov-Ribbentrop, pol que la Xunión Soviética y l'Alemaña nazi estremábense esferes d'influencia na Europa del Este, y que llevó a la ocupación per parte de los soviéticos de los trés países.
Contestu
editar
Al amparu de la glásnost y la perestroika, les manifestaciones caleyeres xorrecíen nes diverses capitales, creciendo en popularidá y asistencia. Les primeres, de 1986, axuntaben namái pequeñes cantidaes de xente. Darréu, yá en 1987 masives manifestaciones fueron prohibíes poles autoridaes, saldándose con numberosos arrestos. Un añu más tarde y per primer vegada, les protestes fueron aprobaes poles autoridaes y desenvolviéndose d'una manera pacífica.
Una selmana enantes de la Cadena Báltica, la XRSS almitiera la esistencia del protocolu secretu Molotov-Ribbentrop, pero siguía aportunando en que los trés estaos xuntárense voluntariamente a la Xunión Soviética. Un par de díes antes, 170 miembros del movimientu lituanu Sajūdis (que llograra 36 de los 42 escaños nes recientes eleiciones al Conseyu Supremu de Lituania) aprobaron con namás cinco abstenciones una declaración pidiendo "una república lituana, soberana ya independiente, non sometida al sistema llexislativu de la XRSS".
La protesta
editar_-_cathedral.jpg)
La filera foi permitida polos Partíos Comunistes de cada unu de los trés estaos, y organizóse con procuru de que nun hubiera güecos nos más de 600 quilómetros que dixebren Vilnius de Tallinn (pasando por Riga). En munchos pueblos y ciudaes designáronse determinaes árees a cubrir; tamién s'entamó'l tresporte n'autobuses gratuitos p'aquellos que nun teníen otru mediu al so alcance. Los manifestantes xunieron les sos manes de mientres 15 minutos a les siete de la tarde hora llocal (16:00 GMT). Pela radio y al traviés de programes especiales coordinábense los esfuercios. Más tarde el mesmu día, tuvieron llugar diverses concentraciones y protestes pacífiques. En Vilnius, 40.000 manifestantes concentráronse na plaza de la Catedral, con veles enceses y cantares tradicionales y el mesmu himnu nacional Tautiška giesmė. N'otros llugares los párrocos arengaron a les mases o fixeron sonar les campanes de les ilesies. Nuna de les protestes más espectaculares, los líderes de los Frentes Populares d'Estonia y Letonia axuntáronse na frontera ente dambes repúbliques pa celebrar un funeral simbólicu, nel que se prendió fueu al símbolu utilizáu pa denunciar la dominación soviética apautada colos nazis: una cruz gamada nel centru d'una estrella colorada. Tamién se declaró día festivu n'Estonia.
La protesta foi dafechu pacífica. Sicasí, los manifestantes fueron represaliaos, en dellos casos de manera física. Tantu Erich Honecker dende l'Alemaña del Este como Nicolae Ceaușescu dende Rumanía ufiertaron sofitu militar a la Xunión Soviética si decidía utilizar la fuercia pa torgar la manifestación. Na Plaza Pushkin de Moscú emplegárense unidaes antidisturbios pa refugar a unos cuantos cientos de persones, axuntaes nuna demostración de simpatía pa cola protesta báltica. L'axencia de noticies soviética TASS informó de que 75 persones fueren deteníes por alteración del orde públicu, vandalismu y otros delitos. Unos 13.000 manifestantes axuntáronse coles mesmes en Moldavia, que tamién fuera afeutada pol pactu xermanu-soviéticu de non agresión.
Sobre'l númberu de participantes na Cadena Báltica, les estimaciones varien sustancialmente. L'axencia Reuters informó a otru día de que 700.000 estonios, 500.000 letones y 1.000.000 de lituanos tomaren parte na protesta. Eses cifres superaben enforma les estimaciones previes, que calcularen a lo más 1.500.000 de manifestantes. La población total de los trés estaos nesi momentu yera d'unos ocho millones de persones. Les cifres oficiales ufiertaes pola Xunión Soviética al traviés de TASS afirmaben que namás 300.000 estonios y cerca de 500.000 lituanos secundaren la protesta, ensin que se realizara una estimación oficial de participantes en Letonia.
Consecuencies
editarLa filera humana simbolizó la solidaridá ente los trés países bálticos na llucha por una mayor autonomía y una eventual independencia de dichos territorios. Ayudó a establecer la idea de les trés "repúbliques hermanes" y promovió la cooperación ente elles dende esi día. Darréu dellos políticos suxirieron la idea de presentar conxuntamente una candidatura pa entamar unos Xuegos Olímpicos de branu ente los trés repúbliques. Per otru llau, la protesta esbozó les llinies maestres de les futures manifestaciones: masives y pacífiques. Finalmente, ayudó a atraer a les protestes a aquéllos qu'entá yeren escépticos o tarrecíen les persecuciones soviétiques.
L'11 de marzu de 1990 Lituania conviértese nel primer estáu soviéticu en declarar la so independencia. Dos años dempués de la protesta, la independencia de los trés Estaos Bálticos yá fuera reconocida per munchos países occidentales.
La Cadena Báltica ta reconocida pol Llibru Guinness de los Récores como la filera humana más llarga que s'entamó nunca. El llibru de los récor lituanu la recueye tamién como l'atascu de tráficu más llargu: de mientres un par d'hores, 100 quilómetros de l'autopista Vilnius-Kaunas permanecieron encaboxaos. Darréu entamáronse fileres humanes similares en munchos países d'Europa del Este y rexones de la XRSS.
Ver tamién
editarReferencies
editarEnllaces esternos
editarGalería virtual de la páxina del Gobiernu de Lituania Archiváu 2005-11-08 en Wayback Machine Cadena Báltica 1989-1999 Archiváu 2007-08-18 en Wayback Machine Páxina dedicada al décimu aniversariu de la Cadena Báltica (n'inglés) Sellos conmemorativos del décimu aniversariu (n'inglés) Central Europe Review La Cadena báltica: diez años dempués (n'inglés) Páxina con numberoses semeyes de la Cadena Báltica" Archiváu 2008-02-21 en Wayback Machine