Calendariu xulianu prolépticu

El calendariu xulianu prolépticu ye'l calendariu obteníu al traviés de la estensión del calendariu xulianu hacia atrás nel tiempu, más allá del añu 8, nel que s'estabilizó l'añu bisiestu, que tuvo un calter irregular, non homoxéneu, nos años que mediaron ente la puesta en funcionamientu del calendariu xulianu, nel añu 45 e.C., y l'añu 8.

Un calendariu obteníu pola proyección nel tiempu, hasta una fecha anterior a la de la so invención o adopción oficial, conozse como versión proléptica del calendariu correspondiente. Asina, el calendariu gregorianu prolépticu úsase a veces pa especificar feches anteriores a la introducción d'esi calendariu, en 1582. Cuando ún usa'l calendariu gregorianu pa referise a eses feches, nes que'l calendariu xulianu yera' d'usu oficial, ha de facer constar que la fecha qu'inclúi básase nel calendariu gregorianu prolépticu.

El calendariu xulianu foi introducíu por Xuliu César y, poro, ye más antiguu que la era Anno Domini (o Era Común), que cuenta los años a partir del que Dionisiu l'Exiguu, a partir de los cálculos que fizo nel sieglu VI, consideró como'l del nacimientu de Cristu. Amás, foi ampliamente usáu nos anales medievales europeos de magar el sieglu VIII.

El calendariu xulianu prolépticu usa l'Anno Domini pa datar cualesquier fecha, incluyíes les feches de l'Antigüedá tardía nos que'l calendariu xulianu yá taba n'usu y l'Anno Domini nun esistía. Como los años siempres reciben númberos cardinales, usando'l métodu de cuenta inclusiva (AD1 ye'l primer añu del calendariu Anno Domini, y l'anterior a elli nun ye l'añu "0", sinón l'añu 1 e.C.), l'añu 1 e.C. del calendariu xulianu prolépticu ye un añu bisiestu. Esto nun ye asina na numberación d'años astronómica, introducida en 1740 pol astrónomu francés Jacques Cassini. Esti sistema considera cada Añu Nuevu como un númberu natural nún exe cronolóxicu, nel que l'añu 0 correspuende col añu 1 e.C. y el "añu -1" correspuende col 2 e.C; poro, usando esi sistema los años bisiestos xulianos son siempre aquellos que la so cifra ye divisible por 4.

La determinación de los años bisiestos nel calendariu xulianu prolépticu ye distinta de la cuestión de cuálos años yeren consideraos bisiestos na dómina romana, porque ente'l 45 e.C. y l'añu 8 la determinación del día bisiestu nun yera sistemática[1]. Por esi error del añu bisiestu nun ye cenciellu alcontrar una fecha equivalente, nel calendariu xulianu prolépticu, d'una fecha conocida que pertenez al calendariu romanu pre-xulianu o al calendariu xulianu anantes del añu 8. L'añu 46 e.C. ye, amás, un casu especial: la introducción del calendariu xulianu nesti añu fizo que se-y asignara, p'axustar el calendariu, una duración de 445 díes.

Referencies editar

  1. Bickerman, E. J. (1968) Columbia University Press: Chronology of the Ancient World.