Castiella la Nueva
Castiella la Nueva ye'l nome d'una de les antigües rexones españoles, aquellas qu'esistíen primero de l'actual división del estáu en comunidaes autónomes. Comprendía les provincies de Ciudad Real, Cuenca, Guadalajara, Madrid y Toledo[1]. Esto ye, les de l'actual comunidá de Castiella-La Mancha, sacante la d'Albacete, que daquella pertenecía a la Rexón de Murcia, y amás l'actual Comunidá de Madrid.
Anantes de la división provincial de Javier de Burgos de 1833 bona parte del norte y l'oeste de l'actual provincia d'Albacete pertenecía a la de Cuenca (Jorquera, La Roda o Villalgordo del Júcar) o a la de La Mancha (Alcaraz, Villarrobledo o Ossa de Montiel) y, poro, incluyíase en Castiella la Nueva[2], mentantu que'l restu del territoriu actual d'esta provincia pertenecía al reinu de Murcia, integrándose por ello na so rexón histórica. Nos axustes realizaos nes dos décades posteriores a la división de 1833 los conceyos de Villena y Sax, pertenecientes a Albacete, pasaron a la provincia d'Alacant, mentantu que les tierres de la meseta de Requena-Utiel, que yeren de la provincia de Cuenca, incorporáronse a la provincia de València.
Evolución histórica editar
Castiella la Nueva formaba, xunto con Castiella la Vieya, de la que ta separtada pol Sistema Central, la rexón histórica de Castiella. El so orixe remóntase a la taifa de Toledo, un reinu musulmán conquistáu tres de la toma de Toledo en 1085 pol rei Alfonsu VI de Lleón y Castiella ya incorporáu como Reinu de Toledo a les posesiones del rei de Castiella y Lleón.
Castiella la Nueva, neto que la mayoría de les otres rexones históriques, nun tuvo denguna dimensión institucional, y yera namái un nome nos mapas[3]. Nin nel Antiguu Réxime, nel que les unidaes alministratives foron los correximientos ya intendencies, nin nel Estáu lliberal del sieglu XIX, que creó l'actual división en provincies, la so esistencia teórica suponía denguna unidá xurisdiccional. Tampoco demientres la Segunda República Española, qu'entamó procesos de concesión d'autonomía a otres rexones históriques, nin demientres el franquismu, nel que so esistencia fuera de los mapas llimitose a la revalorización de delles tradiciones folclóriques y a ser el marcu territorial de delles federaciones y competiciones deportives.
La Constitución española de 1978, magar que recueye nel so testu referencies a los términos rexón y provincia, organizose a partir d'una estructura territorial nomada comunidá autónoma. Encamentose a los dirixentes provinciales a poner en marcha un proceso (nomáu preautonómicu) pa la formación d'eses nueves entidaes a partir de les eleiciones xenerales y municipales de 1979. Estes caberes supunxeron la formación de diputaciones provinciales sobre la base de los conceyales que sacaron los distintos partíos políticos nos nuevos ayuntamientos democráticos. Nesi procesu l'antigua rexón de Castiella la Nueva nun foi tomada en consideranza: la provincia de Madrid tresformose nuna comunidá uniprovincial, la Comunidá de Madrid, mentantu que les otres cuatro provincies, xunto cola d'Albacete, formaron la Comunidá Autónoma de Castiella-La Mancha.
Referencies editar
- ↑ Nuevo Atlas de España. Barcelona: Salvat editores, S.A., 2001, p. 151. ISBN 84-345-0525-8.
- ↑ Vicens Vives, J., Atlas de Historia de España (12ª edición). Barcelona: Editorial Teide, 1984. ISBN 84-307-7002-X. Ver mapa LXXI.
- ↑ Paluzíe, Esteban, Geografía General. Barcelona: Imprenta Elzeviriana y Librería Camí, S. A., 1936, páxs. 59 y 80-84.