Enfermedá mental

Enfermedá mental
	enfermedad (clase) (es)
	enfermedá

Les enfermedaes mentales son alteraciones de los procesos cognitivu y afeutivu del desenvolvimientu, consideraes como anormales con respectu al grupu social de referencia del cual provién l'individuu. Puede tratase d'alteraciones nel razonamiento, el comportamientu, la facultá de reconocer la realidá o d'afaese a les condiciones de la vida.

Conceutu

Dependiendo del conceutu d'enfermedá que s'utilice, dellos autores consideren más fayadizu utilizar nel campu de la salú mental el términu "trestornu mental" (que ye'l qu'utilicen los dos sistemes clasificatorios de la sicopatoloxía más importantes na actualidá: la CIE-10 de la Organización Mundial de la Salú y el DSM-IV-TR de l'Asociación Psiquiátrica Americana). Sobremanera naquellos casos nos que la etioloxía biolóxica nun ta claramente demostrada, como asocede na mayoría de los trestornos mentales. Amás, el términu "enfermedá mental" puede acomuñar a estigmatización social. Por estes razones, esti términu ta en desusu y úsase más trestornu mental, o sicopatoloxía.

El conceutu enfermedá mental apigura un bon númberu de patoloxíes de bien diversa índole, polo que ye bien malo de definir d'una forma unitaria y hai que falar de cada enfermedá o trestornu de forma particular ya inclusive individualizada yá que cada persona puede sufriles con síntomes daqué distintos.

Etioloxía

Tocantes a la etioloxía de la enfermedá mental, podemos dicir que, por cuenta de la so naturaleza único y estremao d'otres enfermedaes, tán determinaos multifactorialemente, integrando elementos d'orixe biolóxicu, xenéticu, neurolóxicu, ambiental, familiar, psicosocial y psicolóxicu, teniendo toos estos factores un pesu non yá na presentación de la enfermedá, sinón tamién na so fenomenoloxía, nel so desenvolvimientu evolutivu, tratamientu, pronósticu y posibilidaes de rehabilitación.

Clasificación

Inda cuando clásicamente estremáronse les enfermedaes mentales en Trestornos Orgánicos y Trestornos Funcionales, faciendo referencia al grau de xénesis fisiolóxica o psíquica que determine al carecimientu, la clínica demuestra que dambes esferes nun son independientes ente sigo y que na patoloxía, como nel restu del desempeñu psíquicu "normal", dambos factores interactúan y se correlacionan pa xenerar l'ampliu espectru del comportamientu humanu tal como lo conocemos. Ello ye que alteraciones biolóxiques alterien la psique, al igual qu'alteraciones psicolóxiques alterien o modifiquen la bioloxía.

Esisten numberoses categoríes de trestornos mentales, con mayor o menor gravedá tantu na vivencia suxetiva del individuu como na so repercusión dientro del funcionamientu social, asina se fai alusión a otra clasificación clásica: Trestornos Neuróticos y Trestornos Psicóticos.

Les neurosis afecten en mayor grau a la perceición del suxetu sobre sí mesmu, y al so nivel de presto, de plenitú y d'integración del yo, según a les sos rellaciones cola redolada social y familiar más cercanu; sicasí, nun presenten los síntomes avezaos de desconexón cola realidá y ampliu alloñamientu de la vida social, pueden desempeñase llaboral y académicamente, y según Freud y les escueles psicoanalítiques esti estáu ye la condición natural de la vida psíquica.
Les psicosis, tomen la manifestación más claramente acomuñada cola enfermedá mental, los sos síntomes clásicos inclúin les allucinaciones, delirios y grave alteración afeutiva y relacional, estos trestornos suelen tener un factor orgánicu bastante pronunciáu como los Trestornos Depresivos y Bipolares, anque les esquizofrenies son claramente les de mayor repercusión personal, social y familiar dáu'l so calter crónico y dexenerativo carauterizáu polos elementos propios de tolos trestornos psicóticos a los cualos añader la desconexón cola realidá y aplanamientu afeutivu.

Entueyos

La enfermedá mental suel dexenerar n'aislamientu social, inactividá, abulia, desorde del ritmu de vida polo xeneral y, en ciertos casos y circunstancies, comportamientos violentos ya intentos suicides.

Tratamientu

Anguaño'l tratamientu de los trestornos mentales tien un enfoque integrativo y multidisciplinar, nel que participen psicólogos y psiquiatres, educadores sociales, enfermeros psiquiátricos, trabayadores sociales, terapeutas ocupacionales y otros profesionales. Cada tratamientu integra, dependiendo del casu, l'alministración de sicofármacos como métodos paliativo de los síntomes más pronunciaos, p'asina dar pasu a un procesu d'intervención psicolóxica p'atender los oríxenes y manifestaciones del trestornu y asina xenerar un estáu de bienestar más sólido, efectivu y permanente nes persones que sufren d'esta enfermedá.

Definición de Trestornu mental

Según el DSM-IV-TR, los trestornos son una clasificación categorial non escluyente, basada en criterios con traces definitories. Almiten que nun esiste una definición qu'especifique afechiscamente les llendes del conceutu, escareciendo d'una definición operacional consistente que englobe toles posibilidaes. Un trestornu ye un patrón comportamental o psicolóxicu de significación clínica que, sía'l que quier la so causa, ye una manifestación individual d'una disfunción comportamental, psicolóxica o biolóxica.

Esta manifestación ye considerada síntoma cuando apaez acomuñada a un malestar (p. ex., dolor), a una discapacidá (p. ex., deterioru nun área de funcionamientu) o a un riesgu significativamente aumentáu de morrer o de sufrir dolor, discapacidá o perda de llibertá.

Entá más, afirmen, esisten pruebes de que los síntomes y el cursu d'un gran númberu de trestornos tán influyíos por factores étnicos y culturales. Nun escaezamos que la categoría diagnóstica ye namái'l primer pasu pal fayadizu plan terapéuticu, que precisa más información que la riquida pal diagnósticu.

Una concepción errónea bien frecuente ye pensar que la clasificación de los trestornos mentales clasifica a les persones; lo que realmente fai ye clasificar los trestornos de les persones que los carecen.