Espardimientu

L'Espardimientu ye un grupu d'autores n'asturianu carauterizáu por compartir unos mesmos referentes estéticos y, sobre manera, una mesma visión del procesu de normalización llingüística y de cuál ha ser el papel qu'ha xugar nél la narrativa. Plantégase como una enmienda al Surdimientu col que son críticos y, n'especial, al llamáu Segundu Surdimientu o Segunda promoción del Surdimientu. Esta corriente defende que la lliteratura tien que ser lo más popular posible, tar en contautu cola realidá sociollingüística d'Asturies y adautase al públicu pa ser quien a seducilu y consiguir nuevos llectores dende quienes lleíen en castellán por nun atopar n'asturianu de productos culturales que respuedan a les sos necesidaes. L'Espardimientu da-y muncha importancia a la Publicidá, a la apertura de nuevos xéneros lliterarios que nun esistieren n'asturianu previamente o a l'aición común y coleutiva. Amás, en cuenta d'una lliteratura zarrada sobre sigo mesma, esta corriente busca crear espacios billingües nos qu'averar al asturianu a llectores de llibros en castellán, y prioricen xéneros como los d'aición, la ciencia ficción o la fantasía, onde reivindiquen la mitoloxía asturiana como ferramienta pa facer lliteratura fantástica.

Les crítiques o la ennmienda al Surdimientu podríen carauterizase como:

• Que la lliteratura asturiana cayó en gran midida no minoritario, no elitista y, dacuando, no estravagante, en cuenta de coneutar col públicu coles maneres de la lliteratura popular (constanten que por cada novela asoleyada hai más d'un poemariu).
• Que'l sistema lliterariu asturianu ye un ecosistema profesionalizante y premiucéntricu qu'acaba xenerando que los escritores escriban pa ganar concursos y les editoriales editen col envís de consiguir sovenciones públiques, pero en nengún casu pa consiguir llectores.
• Que la esistencia de sovenciones, anque pueda ser necesaria dacuando, xenera una dinámica perversa que fai que nin les editoriales nin los autores busquen el favor del públicu.
• Que la lliteratura nun puede ser la tabla de salvación de la llingua, sinón que ye fundamental abrise a otres formes de narrativa como puedan ser los xuegos de rol, los videoxuegos o'l cine que puedan llegar a otros públicos.
• Refugu del canon anterior y, especialmente, de la idea de que la poesía, polo minoritaria que ye, pueda ser bandera o representación de la lliteratura asturiana. Nesta llinia, reivindicación de les figures d'Adolfo Camilo Díaz y Vicente García Oliva.

Amás d'estes crítiques, l'Espardimientu sostién una serie de necesidaes a la hora de plantegar l'aición creadora que son les siguientes:

• Refugu de la individualidá. Entienden la individualidá creativa y l'auto-espresión como un frenu. Apuesta poles obres coleutives, les coleiciones feches a comuña ente dellos autores y una visión estratéxica de la producción lliteraria.
• Entender la creación de la novela y de la narrativa con un enfoque bottom-up, partiendo non de la necesidá espresiva de los escritores, sinón de les necesidaes del públicu.
• Adautación del tipu d'obres a la realidá sociollingüística d'Asturies. Los escritores del Espardimientu entienden que l'alfabetización n'asturianu de la mayoría d'asturianos ye probe y ye preciso crear noveles curties, fáciles de lleer, con un llinguax claru nel qu'ha primar lo comprensible.
• Búsqueda de productos culturales que puedan diferenciar la lliteratura asturiana d'otres opciones de les que dispón el públicu como les superproducciones cinematográfiques o les series.

Ente les principales obres del Espardimientu destaquen el videuxuegu Tiempu de Lleendes; los xuegos de rol Depués d'Ochobre y 1984:Thoughtcrime; les noveles La Colomina 36, La Rexenta contra Drácula, Fort Paniceiros: Una hestoria de la de mi'madre, 1809: Cartes de la Revolución de Trubia o Del Llau del Nigromante. Mientres qu'ente los principales autores destaquen Andrés Fernández Menéndez, Adrián Carbayales, Nicolás Bardio, Abel Martínez, Xon de la Campa y Ana Pereira, anque tamién amosaron proximidá pa coles sos tesis otros autores de fantasía, ciencia ficción y novela negra de xeneraciones anteriores como Adolfo Camilo Díaz o Xosé Nel Riesgo.

Ver tamién

• Surdimientu