Phil Collins

Phil Collins (30 de xineru de 1951, Hounslow, Inglaterra) ye un destacáu cantante, compositor, baterista, y actor británicu, y unu de los artistes de mayor ésitu de la música rock. Collins foi nomáu miembru de la Real Orde Victoriana (LVO) y de la Orde del Imperiu Británicu (CBE).

Biografía

Collins empezó como integrante del grupu Flaming Youth, a fines de la década de 1960. Foi incorporáu a la banda de Peter Gabriel, Genesis, como batería y segunda voz en 1970, cuando Gabriel foise del grupu, en 1975, Collins asumió'l doble rol de batería y voz líder.

En 1981 empecipia una esitosa carrera en solitariu, compaxinándola col so trabayu en Genesis. Ente 1984 y 1989 Phil Collins lideró la llista d'ésitos estaunidense "Billboard Top 100" como cantante n'ocho rubros, siete como solista y unu con Genesis, banda de la que foi miembru ente 1970 y 1996. El 7 de marzu de 2011 fíxose pública la so retirada del mundu musical por problemes de salú, y por non sentise cómodu cola industria musical polo xeneral.

Los sos cantares de cutiu traten d'amores perdíos, temes personales y sobre el problema mundial de la probeza y el consumu de drogues. Según datos de Atlantic Records (de 2002) les vientes correspondientes a la so carrera en solitariu algamaron los 150 millones de discos en tol mundu. Collins ganó numberosos premios musicales a lo llargo de tola so carrera, incluyendo siete premios "Grammy", cinco premios "Brit", ente ellos "meyor artista británicu" en trés categoríes, un premiu de l'Academia de Hollywood y dos Globos d'Oru pol so trabayu en bandes sonores. Foi incluyíu nel "Salón de la Fama del Rock" como miembru de Genesis en 2010.

Collins ye unu de los trés artistes pop, xuntu con Paul McCartney y Michael Jackson, que vendieron más de 100 millones d'álbumes en tol mundu, tantu nel so trabayu como artista solista, como miembru d'una banda. Cuntando'l so trabayu con Genesis, les sos contribuciones con otros artistes, y la so esitosa carrera en solitariu, Collins llogró más de cuarenta ésitos qu'encabezaron la llista del "Billboard Hot 100" mientres la década de 1980.

En 2008 Collins ocupó'l puestu númberu 22 na llista de los "100 meyores artistes de tolos tiempos", según el Billboard Hot 100. Dende va dellos años mora en Suiza.

Discografía

   *Face Value - 1981
   *Hello, I Must Be Going! - 1982
   *No Jacket Required - 1985
   *...But Seriously - 1989
   *Both Sides - 1993
   *Dance into the Light - 1996
   *Testify - 2002
   *Going Back - 2010

Referencies

• Traducíu de Uiquipedia n'español

Enllaces esternos

• Wikimedia Commons acueye conteníu multimedia sobre Phil Collins .
• Website oficial