Evaristo Valle
Evaristo Valle y Fernández Álvarez y Suárez Quirós (11 de xunetu de 1873, Xixón – 29 de xineru de 1951, Xixón), más conocíu como Evaristo Valle, foi un pintor asturianu.
Evaristo Valle | |
|---|---|
 | |
| Vida | |
| Nacimientu | Xixón, 11 de xunetu de 1873[1] |
| Nacionalidá |
 España |
| Residencia |
París Xixón |
| Llingua materna | castellanu |
| Muerte | Xixón[2], 29 de xineru de 1951[3] (77 años) |
| Estudios | |
| Llingües falaes | castellanu |
| Oficiu | pintor |
 | |
Biografía
editarEvaristo Valle treslládase a la edá de diez años a Puerto Rico xunto a tola so familia cuando so padre, abogáu y conceyal xixonés, pescancia'l cargu de maxistráu na ciudá caribeña de San Xuan. La estancia nel país (nel que solamente tuvo unos seis meses, yá que tres la muerte del so padre volvió nuevamente a Xixón) dexáren-y una bayura de recuerdos. Más tarde tuvo qu'entamar a trabayar p'aportar dineru na economía familiar, faciéndolo (ente otros sitios) na banca y nuna litografía.
En 1896 marcha pa París onde primeramente se ganó la vida como dibuxante, regresando p'Asturies nel añu 1900, tomando la decisión de dedicase dafechu a la pintura, esponiendo les sos acuareles en Xixón, onde tienen una bona acoyida. Recibe una pensión del Conceyu de Xixón en 1903 pa completar los sos estudios en París, pero énte la menguada cuantía de la beca decide treslladase a la casa de so hermana, en Noreña, dedicándose a pintar con intensidá. Cuando l'ayuntamientu descubre l'engañu, Evaristo entaina a instalase en París y manda un cuadru col que pretende xustificar la so estancia na capital francesa, pero foi insuficiente yá que, finalmente, retiráron-y la beca.
.JPG)
Decide siguir viviendo en París, con escapaes pa Xixón y pa Madrid. La so obra na capital francesa ta, anguaño, en paraderu desconocíu anque probablemente fixera trabayos de retratos pa la burguesía parisina que-y permitiríen afrontar les dificultaes económiques d'esa época. Espón en delles ciudaes españoles y correspuenden a esti periodu les sos famoses Mazcaraes y otres obres como Romería o Procesión en la aldea. Depués d'una estancia en Londres, torna pa Xixón, onde carecerá ataques de llercia debío a la so agorafobia, especialmente agravaos pola muerte de so ma en 1912, que lu lleven a enzarrase per díes. Nesta época escribe obres de teatru y noveles. Sería nel añu 1917 cuando saldría de la crisis esistencial y de creatividá asoleyando obres tan importantes como Los palcos o Baile de carnaval. En 1919 asoleyó la novela Oves e Isabel. Decepcionáu poles ventes, tiró al mar tolos exemplares que-y quedaben. En 1935 escribió El Sótano, una comedia dramática en dos actos que s'inspiraba na Revolución d'Ochobre de 1934 n'Asturies. Esta obra nun llegó a ser espublizada na vida del autor.
Viaxa pa Cuba onde s'inspira pa componer la so Maternidad negra, En el Malecón, etc. Depués de la Guerra Civil española, pasa per una mala situación, tanto nel ámbitu llaboral como nel económicu, que ye superada por una última etapa de creatividá. Evaristo pinta ensin ablayu tolo que lu arrodia: En la fuente, Las tres brujas, Escenas de la cuenca minera, La niña y la vaca, etc.
Evaristo Valle nun pue ser encuadráu en nenguna escuela pictórica, yá que magar se-y intúin nes sos obres diverses influyencies, éstes nun lleguen a definir un estilu concretu. La so pintura destaca por una gran bayura cromática y un finu sentíu del humor.
Finalmente morrería en Xixón, la so ciudá natal, a la edá de 77 años.
El Muséu Evaristo Valle
editarNel añu 1981 constitúise, como Fundación Cultural y gracies al puxu dau pola sobrina del pintor, María Rodríguez del Valle, el Muséu Evaristo Valle. Esti muséu cuenta con una importante coleición de les obres del pintor, asina como oxetos personales y documentos que son espuestos en dos edificios (ún edificáu espresamente pal muséu y otru un antiguu palacete de fines del sieglu XIX) asitiaos dientro d'unos xardinos de 16.000 metros cuadraos. Nel muséu pue vese tamién una coleición de conches que pertenecía al pá del printor.
Obres destacaes
editar.JPG)
- Baile de carnaval (1917)
- Carnavalada (1930)
- Carnavalada de Oviedo (1930)
- Máscaras en el campo (1944)
- Cipriano, el hojalatero (1945)
- Las tres brujas (1945)
- Carnavalada de los lobos (1949)
- Mi amigo Pedro, El pescador (1946)
- La mujer de azul (1950)
- Tipos de mar (1950).
Referencies
editar- ↑ Afirmao en: Diccionario biográfico español. Identificador DBE: 4852/evaristo-del-valle-y-fernandez. Apaez como: Evaristo del Valle y Fernández. Data de consulta: 9 ochobre 2017. Editorial: Real Academia de la Historia. Llingua de la obra o nome: castellanu. Data d'espublización: 2011.
- ↑ URL de la referencia: https://www.biografiasyvidas.com/biografia/v/valle_evaristo.htm.
- ↑ Data de consulta: 22 agostu 2017. URL de la referencia: https://rkd.nl/explore/artists/249830.
Enllaces esternos
editar
Wikimedia Commons acueye conteníu multimedia sobre Evaristo Valle.- Fundación Museo Evaristo Valle
Datos: Q4897422- Multimedia: Evaristo Valle
