Abrir el menú principal

Festival de la Sidra

fiesta que se celebra'l mes de xunetu en Nava

El Festival de la Sidra de Nava foi creáu en 1969 pol entós alcalde del conceyu, José María Caso Mayor, anguaño, ye una de les fiestes más importantes d'Asturies y atrai a milenta persones cada añu. Nel festival, que dura dellos díes y celébrase nel branu, celébrense conciertos, hai cata de sidra y realícense numberoses actividaes culturales rellacionaes con Asturies.

Festival de la Sidra
Nome oficial Festival de la Sidra de Nava
Estáu activa
Tipu fiesta folclórica popular
Sede Nava
Primera actividá 21 de xunu de 1969
Organización
Organizador Conceyu de Nava
[editar datos en Wikidata]

El xenuinu y como tal al únicu Festival que puede llamase «Festival de la Sidra», yá que ta patentáu como tal, ye'l que s'entama en Nava la segunda fin de selmana de xunetu.

Fiesta declarada d'Interés Turísticu Ñacional dende'l 5 de xunetu de 1989.[1]

El primer Festival de la Sidra celebróse'l 21 de xunu de 1969, teniendo calter biañal hasta l'añu 1988, que pasa a celebrase cada añu la segunda fin de selmana de xunetu. Los principales atrautivos d'esta fiesta son el Pregón (pronunciáu siempres por dalgún asturianu pernomáu), la Cata de seleición de la Meyor sidra natural d'Asturies o'l Concursu Internacional d'Escanciadores. Degustaciones gratuites de sidra, festivales gastronómicos venceyaos al citáu caldu, actuaciones folclóriques y musicales y un ensin fin d'actos más complementen la fiesta más importante que se celebra n'Asturies alredor al mundiu de la sidra.

La final del Concursu de la meyor Sidra Natural ellaborada n'Asturies y en Nava, celébrase na mañana del sábadu y ye ún de los acontecimientos más importantes de cuantos se desendolquen a lo llargo del Festival de la Sidra. Preséntanse al mesmu tolos llagares d'Asturies en busca de la reconocencia qu'otorga'l galardón que se concede pola victoria, que'l so premiu ye apurríu poles autoridaes rexonales y municipales el sábadu nos balcones de la Casa Conceyu. El xuráu'l premiu ta compuestu por 10 espertos independientes que realicen en primer llugar una preseleición pasando a la final les 8 meyores sidres que se van apostar el premiu nuna cata ciega que se celebra nel incomparable marcu de la plaza Manuel Uría.

El Concursu Internacional d'Escanciadores de Sidra entámase na mañana del domingu y ye ún de los más prestixosos d'Asturies a lo llargo de tou l'añu. A esti concursu preséntense escanciadores de les meyores sidreríes d'Asturies que busquen la reconocencia qu'otorga esti premiu. Nél valórense los aspeutos más importantes del escanciáu: la forma de coyer y asitiar el vasu, la forma y la postura de coyer la botella, l'escanciáu de la sidra nel vasu, la elegancia del escanciador o la mirada, ente otres munches cualidaes. Pola so vistosidá y espectacularidá resulta cita clave pa entender l'arte de la sidra. L'apertura de la ruta de la sidra preciede al pregón de la fiesta y ye'l momentu más esperáu pelos miles de visitantes -la gran mayoría mozos- que lleguen hasta'l centru la villa, munchos d'ellos nos "sidrotrenes" (trenes de FEVE con horarios especiales que lleguen a Nava de toa Asturies). Les cais de Nava llueu van tar trescalaes del golor inconfundible de la sidra, que nun les abandonará hasta pasaos unos díes. Nesti auténticu frenesí sidreru, repártense hasta 5.000 llitros de sidra gratuitamente en tradicionales toneles “espichándolos” a la manera tradicional. La sidra échase no que dalgunos denominen paletes por cuenta de la so forma rectangular, similar a les tradicionales palas de xugar al tenis. Estes paletes úsanse pa poder echar ente 4 o 5 "culetes" de sidra al empar. Tou Nava va enllenándose de xente que percuerre ún a ún los puestos que s'atopen distribuyíos pel centru de la villa. Ye'l momentu más espectacular y nel que podemos atopar la mayor cantidá de públicu de la fin de selmana visitando la villa de la sidra.

Dende l'añu 2011, la tradicional «ruta sidrera» foi esaniciada del programa del festival, siendo sustituyida por degustaciones gratuites de sidra nes mañanes del sábadu y domingu, para ello cada llagar tien un puestu cola so sidra, que ye echada de forma tradicional. Los responsables del festival enconten la sustitución de los toneles na busca d'un meyor tratu y calidá de la sidra que s'ufierte de manera gratuita. Per otru llau, los partidarios de la ruta sidrera de los toneles (o "pipes"), achaquen qu'ensin preguntar nin consultar al pueblu de Nava, l'actual gobiernu y al empar organizador del festival, d'un refundiu esanició un signu d'identidá del Festival de la Sidra.

ReferenciesEditar

Enllaces esternosEditar