Un florilexu ye un compendiu, coleición, antoloxía o miscelánea de cachos selectos d'obres lliteraries. La pallabra provién del llatín florilegium (plural florilexa), que compónse de los términos flos («flor») y legere («axuntar», «escoyer»).[1] Florilexu ye, lliteralmente, una coleición de flores y, en sentíu figuráu, una escoyeta de partes seleutes estrayíes del cuerpu d'un trabayu más ampliu. La pallabra tien el mesmu significáu etimolóxicu que'l términu «antoloxía», deriváu del griegu ἀνθολογία.[2]

Ilustración de Grevillea banksii nel florilexu Illustrationes Florae Novae Hollandiae

Na edá Media los florilexos yeren coleiciones sistemátiques d'estractos tomaos principalmente de los escritos de los primeros autores cristianos y tamién de filósofos paganos como Aristóteles y, delles vegaes, otros escritos clásicos. Un bon exemplu ye Manipulus Florum que se completó a principios del sieglu XIV. L'oxetivu yera tomar pasaxes qu'ilustraren ciertos tópicos, doctrines o temes. Dempués del periodu medieval, el términu estendióse p'aplicase a cualesquier miscelánea o compilación de calter lliterariu o científicu.[3]

El términu florilexu tamién s'aplica lliteralmente a un tratáu sobre flores o a los llibros medievales que se dediquen a les plantes ornamentales en llugar d'a les plantes melecinales o utilitaries cubiertes polos herbarios. El surdimientu de la ilustración de plantes como un xéneru artísticu remóntase al sieglu XV, cuando los herbarios (llibros que describen los usos culinariu y melecinal de les plantes) imprimíense conxuntamente con ilustraciones de flores. Cola arribada de téuniques avanzaes d'impresión, y la llegada de nueves plantes a Europa dende la Turquía otomana nel sieglu XVI, les persones riques y los xardinos botánicos empezaron a encargar a los artistes que pintaren y grabaren la guapura d'estos exemplares exóticos, los que depués yeren axuntaos en florilexos.[3]

Ver tamién editar

Llista de florilexos y códices botánicos

Referencies editar

  1. Real Academia Española. Diccionario de la lengua española. Consultáu'l 5 de febreru de 2013.
  2. The Royal Botanical Gardens. New South Wales. The florilegium. Consultáu'l 5 de febreru de 2013.