Francisco Reiter

Francisco Reiter y Elze (22 d'ochobre de 1736, Uviéu – sieglu de XIX) foi un pintor asturianu.

Francisco Reiter
Vida
Nacimientu	Uviéu, 22 d'ochobre de 1736
Nacionalidá	España
Muerte	sieglu de XIX
Estudios
Llingües falaes	castellanu
Oficiu	pintor

Biografía

Según dellos autores yera alemán, pero atopóse na parroquia de San Tirso (Uviéu) la inscripción del so bautismu. So padre yera Guillermo Reiter, de nacionalidá alemana, que diba a ser mayordomu de la Balesquida, y Catalina Elze. Ye cuasi seguro que nació na cai Cimadevilla, na que consta que vivieron los Reiter, polo menos dende 1737 hasta 1744, en que yá yeren vecinos en Solazogue. El pintor tenía tres hermanos: María Gertrudis, José y Antonio.

Casáu con Francisca Fernández, cola que vivió en El Postigo, tuvo d'ella, polo menos, tres fíos: José, bautizáu en San Isidoro, el 23 de xuno de 1762, Tomás y Fernando, bautizáu ésti el 1 de mayu de 1750. Al primeru d'ellos atopámoslu en 1792 ausente en Madrid y en 1801 "ausente n'Indies". Los otros pudieron ausentase tamién o morrer ensin socesión, yá que l'apellíu Reiter nun se ve ente'l posterior vecindariu d'Uviéu.

Obra

Formóse nel taller d'un dorador uvieín discretu y esti ambiente artesanal y de poca exixencia ye, a xuiciu de dellos autores, una de les carauterístiques que marcaría la so carrera artística. La so contribución a la pintura tien importancia, fundamentalmente, a nivel llocal, yá qu'efectivamente, n'Uviéu algamaría una notable sonadía algamando una buena posición social y económica, trabayando pal Obispu Pisador, el Conde de Toreno, la Universidá d'Uviéu o los monesterios de monesteriu de Valdediós y San Vicente.

Tien el méritu principal de ser l'autor, en 1777, del planu más antiguu que se conserva d'Uviéu y que foi grabáu y asoleyáu pol xeógrafu Tomás López de Vargas, nel so Atlas Geográfico de España.

Reiter tuvo como padrín a Francisco Duhamel, personaxe flamencu conocíu del Dr. Casal. En cuanto a la so obra pictórica que, aunque lloñe de la xenialidá, demuestra un nada común dominiu del dibuxu, del color y de la composición, pueden señalase les obres que se señalen darréu: Inmaculada concepción. Oleu (31×24), de 1771; Cristo de la esclavitud. Oleu(85×58), de 1778; Nuestra señora de Covadonga. Oleu. Composición alegórica con paisaxe. Consérvase nel Colexu Oficial d'Abogaos; Retrato de D. Justo de la Mar Carrio Hevia (Muséu Xovellanos); Retrato de D. Lorenzo Solís o Mariscal Solís. Quemáu en 1934 cola iconoteca universitaria. Consérvase una fotografía; Descripciones y diseños de San Miguel de Lillo y Santa María del Naranco, fechos en 1771; Descripción y diseños de Santa Cristina de Lena, fechos en 1771; Plano de la ciudad de Oviedo (1777); Alegorías del Antiguo Testamento, sobre les cuatro puertes d'un armariu de La Balesquida, capiella na qu'esisten dos cuadros que-y son atribuibles; Retrato del Hermano Antonio Alonso Bermejo, fechu en 1778 por encargu del obispu Agustín González Pisador. Tuvo nel Hospital de San Francisco; Retratos originales, copias y retoques. Hubo varios nel cláustru baxo'l desaparecíu conventu de San Francisco, según González Posada. Asinamesmo, descubrióse que Reiter retocara en 1779 los grandes cuadros del retablu de San Vicente, en La Corte.

Ente otros que podríen ser amestaos a esta rellación, quiciás los más importantes seyan: Retrato del Cardenal Cienfuegos (Muséu Metropolitanu); Retrato del obispo Pisador (Archivu de la Catedral de'Uviéu); Tríptico, na capiella de la Nuestra Señora, de la ilesia de San Tirso, onde'l pintor fuera bautizáu. El cuadru central representa el suañu de San Bernardo delante del Nacencia. Tien fecha 1767. La casulla de San Ildefonso, tema mui uvieín, nun oleu de grandes proporciones, con partes bien notables, baxo'l que se casó Leopoldo Alas "Clarín", na capiella de La Laguna.

Enllaces esternos

• Datos: Q13147201