Gamma Hydri

Gamma Hydri

Gamma Hydri (γ Hyi / HD 24512 / HR 1208)[1] ye una estrella de magnitú aparente +3,24 na constelación austral de Hydrus, la tercera más brillosa de la mesma dempués de β Hydri y α Hydri. En China, al pie de otra estrelles axacentes, formaba'l asterismu llamáu Foo Pih, de significáu desconocíu; dichu asterismu foi mentáu por Corali nel so informe sobre les Nubes de Magallanes.[2] Nun tien de confundir se esta estrella con Gamma Hydrae (γ Hya), na constelación d'Hydra.

Gamma Hydri
Constelación Hydrus
Ascensión reuta α 03h 47min 14,3s
Declinación δ -74º 14’ 20’’
Distancia 214 años lluz
Magnitú visual +3,26
Magnitú absoluta -0,83
Lluminosidá 655 soles
Temperatura 3820 K
Masa 1,5 - 2,0 soles
Radiu 60 soles
Tipu espectral M2III
Velocidá radial +15,8 km/s

Gamma Hydri ye una xigante colorada de tipu espectral M2III con una temperatura superficial de 3820 K. Asitiada a 214 años lluz de distancia del Sistema Solar, tien una lluminosidá 655 vegaes mayor que la del Sol, la mayor parte de la so radiación emitida na rexón infrarroxa del espectru. El so radiu ye 60 vegaes más grande qu'el radiu solar, equivalente a 2/3 partes de la distancia esistente ente Mercuriu y el Sol.[3]

L'estáu evolutivu de Gamma Hydri ye inciertu. Puede tar aumentando'l so rellumu con un nucleu inerte d'heliu, puede empecipiar la fusión d'heliu en carbonu y oxíxenu mientres mengua en rellumu, o puede tar aumentando en rellumu una vegada escosáu l'heliu enantes d'esprendese de les sos capes esteriores pa formar una nana blanca. Anque les observaciones realizaes col satélite Hipparcos suxuren que pue ser una estrella binaria, posteriores estudios nun pudieron confirmar esta duplicidá.[3]

ReferenciesEditar

  1. Gamma Hydri (SIMBAD)
  2. Allen, Richard Hinckley (1889). «Hydrus», en Courier Dover Publications: Star Names — Their Lore and Meaning (n'inglés), 563. ISBN 0-486-21079-0. Consultáu'l 8 d'agostu de 2012.
  3. 3,0 3,1 Gamma Hydri (Stars, Jim Kaler)

Coordenaes:   3h 47m 14.341s, -74° 14 20.269