Gamma Velorum
Gamma Velorum (γ Vel) ye la estrella más brillosa de la constelación de Vela con magnitú aparente +1,75. En realidá ye un sistema estelar complexu con, siquier, siete componentes.
Nomes editar
Gamma Velorum recibe'l nome tradicional de Suhail al-Muhlif, que puede causar ciertu tracamundiu yá que Suhail ye'l nome de la vecina λ Velorum.
Modernamente denominó-ylo Regor, pallabra inventada como una chancia del astronauta del Apolo 1 Gus Grissom escontra'l so compañeru Roger Chaffee (Regor ye Roger al aviesu).[7]
Gamma² Velorum editar
La componente más brillosa, Gamma² Velorum o Gamma Velorum A (HD 68273),[8] ye una estrella binaria formada por dos estrelles bien masives y calientes: una estrella de Wolf-Rayet y una estrella azul de tipu espectral O7.5. La primera tien una temperatura superficial ente 57.000 y 70.000 K, ente que la de la segunda ye de 32.500 K. Les dos estrelles son estraordinariamente lluminoses, la estrella azul 180.000 vegaes más lluminosa que'l Sol, y l'estrella de Wolf-Rayet ye 100.000 vegaes más lluminosa. La estrella azul ye una estrella masiva con una masa 30 vegaes mayor que la del Sol, y el so radiu ye 13 vegaes más grande que'l radiu solar. Sicasí, la estrella de Wolf-Rayet, más evolucionada que la so compañera, yera antaño más masiva, con una masa inicial de 40 mases solares. Güei tien una masa 10 vegaes mayor que la del Sol por cuenta de la perda de masa estelar; el fuerte vientu estelar que sopla dende la so superficie fai que cada añu pierda l'equivalente a una cenmilésima de la masa solar. Con una edá d'unos pocos millones d'años, alcuéntrase nes últimes etapes enantes d'esplotar como supernova. La separación ente les dos estrelles ye d'aproximao 1 unidá astronómica (ua) con un periodu orbital d'unos 78,5 díes.[7]
Gamma¹ Velorum editar
La so compañera más cercana, a 41,2 segundos d'arcu, ye Gamma¹ Velorum o Gamma Velorum B (HD 68243),[9] estrella subxigante de tipu B y magnitú +4,7, que puede resolvese fácilmente con prismásticos. De la mesma, ye una binaria espectroscópica con un periodu de 1,483 díes.[10] La so distancia real a Gamma² Velorum ye de más de 15.000 ua.[7]
Componentes adicionales editar
El sistema tien delles componentes más tenues. Gamma Velorum C (SAO 219505)[11] ye una estrella blanca de tipu F0 y magnitú +7,4, asitiada a 62,3 segundos d'arcu de Gamma² Velorum. Daqué más alloñada d'esta postrera, a 93,5 segundos d'arcu, alcuéntrase otru sistema binariu, formáu por otra estrella de tipu F0 y magnitú 9,4 —Gamma Velorum D (SAO 219506)—[12] y otra acompañante más tenue de magnitú 13 —Gamma Velorum Y—, dambes separaes 1,8 segundos d'arcu.
Ver tamién editar
Referencies editar
- ↑ 1,00 1,01 1,02 1,03 1,04 1,05 1,06 1,07 1,08 1,09 1,10 Afirmao en: SIMBAD.
- ↑ 2,0 2,1 2,2 Floor van Leeuwen (2007). «Validation of the new Hipparcos reduction» (n'inglés). Astronomy and Astrophysics (2): páxs. 653–664. doi:.
- ↑ «The interstellar Ca II distance scale» (n'inglés). Astronomy and Astrophysics (2): páxs. 833–840. 15 setiembre 2009. doi:.
- ↑ Afirmao en: Catalogue of Stellar Photometry in Johnson's 11-color system. Stated in source according to: SIMBAD. Llingua de la obra o nome: inglés. Data d'espublización: 2002.
- ↑ «Pulkovo Compilation of Radial Velocities for 35 495 Hipparcos stars in a common system» (n'inglés). Astronomy Letters (11): páxs. 759–771. payares 2006. doi:.
- ↑ P. Crowther (2000). «The {gamma} Velorum binary system. II. WR stellar parameters and the photon loss mechanism» (n'inglés). Astronomy and Astrophysics: páxs. 187–200.
- ↑ 7,0 7,1 7,2 Regor (Stars, Jim Kaler)
- ↑ Gamma² Velorum (SIMBAD)
- ↑ Gamma¹ Velorum (SIMBAD)
- ↑ Gamma1 Velorum (The Bright Star Catalogue)
- ↑ Gamma Velorum C (SIMBAD)
- ↑ Gamma Velorum D (SIMBAD)
Coordenaes: 
8h 9m 31.95s, -47° 20′ 11.711″
Datos: Q14235
