Germán Horacio

Germán Horacio Robles Sánchez (1902, Xixón – 1975, Ciudá de Méxicu), conocíu artísticamente como Germán Horacio, foi un pintor, dibuxante y cartelista asturianu, obligáu al exiliu depués de la Guerra Civil española.

Germán Horacio
Vida
Nacimientu	Xixón, 1902
Nacionalidá	España
Residencia	España Méxicu
Muerte	Ciudá de Méxicu, 1975 (72/73 años)
Familia
Padre	Emilio Robles Muñiz
Fíos/es	Germán Robles
Estudios
Llingües falaes	castellanu
Oficiu	dibuxante

Yera fíu del popular escritor Pachín de Melás. Los sos primeros trabayos artísticos son de tipu caricaturescu y humorísticu enmarcaos dientro d'un escenariu de calter costumista. Foi a partir del añu 1922 cuando entama de manera más profesional la so carrera artística dientro del diariu xixonés El Comercio. Per esti tiempu fai tamién los sos primeros carteles que seríen los que-y terminaríen dando sonadía dientro del mundu artísticu, a la vez qu'entama a participar en concursos de pintura. Ye tamién nesi añu de 1922 cuando fai la so primer esposición nel Club de Regates de Xixón, y a la vez consigue una beca del Ayuntamientu de la ciudá que-y permitirá realizar estudios en Madrid. Alternará depués la so residencia ente les dos ciudaes y collaborará con distintos medios de comunicación como ilustrador (La Prensa, El Imparcial, La Karaba, La Esfera, Nuevo Mundo, ...).

En 1927 cásase con Florinda San Agustín cola que tendría un fíu. La familia treslladó la so residencia a Madrid.

Los años trenta vendríen a consolidar la carrera artística de Germán Horario como cartelista, ganando numberosos premios y participando n'esposiciones.

La Guerra y l'exiliu

La Guerra Civil marcará sobre manera la carrera del artista. Serán años d'intensa actividá artística al serviciu de la República. N'Asturies participará con otros creadores (Goico Aguirre, Marola, Mariano Moré,...) dientro del Serviciu de Propaganda del Conseyu Soberanu d'Asturies y Lleón. Diseñó decoraos, escenografía teatral, el nuevu escudu de Xixón, pero lo que tuvo un mayor espardimientu popular foi'l diseñu del papel moneda pal Conseyu, los llamaos belarminos.

Nesta dómina dará a la prensa un buen númberu de carteles nos qu'emplea un llinguaxe que busca sensibilizar a la población sobre los diversos pilancos que surden en tiempos de guerra. Tamién trabayará na Compañía Asturiana de Artes Gráficas un álbum de litografíes tituláu 10 Estampas Antifascistas de la Guerra Civil Española y de la Guerra de Invasión.

A esta dómina correspuende un trabayu pa la Fábrica de Tabacos de Xixón, compuesta por unes dieciséis habilitaciones que fueron litografiaes por Robustiano Viña Mori nel so taller. Nesti trabayu atopamos, amás de la temática militante impuesta pol momentu que se taba viviendo, temes referíos al propiu mundu del tabacu.

Depués de la cayía d'Asturies en poder de les tropes rebeldes, embarca nel puertu d'El Musel llegando nuevamente a zona republicana y asitiándose en Barcelona, onde continuará cola so actividá creativa, siendo, amás, nomáu Comisariu d'Aviación.

En acabando la guerra en Cataluña entama la so vida d'exiliáu. En primer llugar ye internáu en Los Haras, cerca de Perpiñán, pa pasar con posteriridá a les sableres de Saint Cyprien, onde compartirá dificultaes y pilancos con otra riestra d'artistes e intelectuales. En tou esti periodu nun escaeció'l so trabayu creativu.

Finalmente, el 26 de mayu de 1939, a bordu del barcu francés (de bandera nixeriana) Sinaia entama'l cámín definitivu del so exiliu en Méxicu. Xunto a Germán Horacio dirán otros creadores españoles colos que collaborará na edición a bordu del cartafueyu Sinaia. Diario de la primera expedición de Republicanos a México. Nesi viaxe fizo tamién caricatures de los sos compañeros de travesía que seríen recoyíos nun llibru editáu pola Semana Negra de Xixón en 2006, tituláu Germán Horacio. Artista Republicano.

Yá en Méxicu continuaría col so trabayu como cartelista y diseñador, magar qu'entamaría nesi país la so xera como pintor. Nesti tiempu encargaríase de facer los carteles de les películes de Hollywood que s'estrenaben en Méxicu.

Morrería na capital mexicana en 1975 ensin tener vuelto nuevamente a Asturies. Finalmente les sos cenices fueron espardíes nel Mar Cantábricu.

Enllaces esternos

• Datos: Q13147221