Marola
Manuel Rodríguez Lana (3 d'avientu de 1905, Xixón – 3 de febreru de 1986), conocíu como Marola, foi un pintor y dibuxante asturianu.
Marola | |
|---|---|
 | |
| Vida | |
| Nacimientu | Xixón, 3 d'avientu de 1905 |
| Nacionalidá |
 España |
| Muerte | 3 de febreru de 1986[1] (80 años) |
| Estudios | |
| Llingües falaes | castellanu |
| Oficiu | pintor |
| Seudónimos | Marola |
 | |
Biogafía
editarMarola nació dientro d'una familia humilde de cinco hermanos, nel barriu xixonés del Natahoyo, aunque la so neñez trescurrió nel barriu de L'Arena. La so única formación cultural foi na escuela pública. Entamó a trabayar de bien neñu, con 12 años, de recueyepelotes nuna pista de tenis, p'ayudar a la economía familiar. Tamién trabayó d'aprendiz de soldador y de peón nuna panadería. Finalmente llegaría-y la oportunidá de convertise n'ayudante nun taller de pintura y decoración.
Los sos primeros trabayos como ilustrador entamaríalos nos años venti pa les campañes publicitaries de la empresa sidrera Zarracina.
Marola dexó Xixón nel añu 1929 y treslladóse a Madrid cola intención de ser pintor, intentando ganase la vida como copista nel Muséu del Prado. Dende la capital d'España, Marola entamaría a collaborar como humorista gráficu nel periódicu xixonés La Prensa, pal que fizo historietes ente'l 11 de xunetu de 1931 y el 7 de xineru de 1932. Les tires nun teníen una periodicidá concreta y nelles utilizaba en boca de los personaxes la llingua asturiana. El so dibuxu yera esquemáticu, ensin fondos nin espresiones, xeométricu, na llinia del Art Decó.
Faltaba-y la téunica necesaria pa copiar a los grandes maestros del Muséu, polo que decidió regresar a la so villa natal en 1933. Pasaos dos años tornó nuevamente a Madrid. Esta vez atopó trabayu como caricaturista na revista Muchas Gracias. Fueron cuatro años nos que tuvo la oportunidá d'aprender la téunica que-y faltara nel so momentu. Durante la Guerra Civil española les sos obres asoleyáronse na prensa republicana (Acracia o CNT). Además durante esa dómina diseñó un cartel y un sellu pal Conseyu Soberanu d'Asturies y Llión. Esta collaboración coles fuercies republicanes sería unu de los motivos que lu llevaron a un silenciu creativu durante les dos primeres décades del franquismu.
El so trabayu en Madrid abrió-y les puertes d'Asturies, onde trabayaría hasta que decide tornar nuevamente pa Madrid, acompañáu de la so muyer, Inés Laredo Martínez, cola que se casara en 1940. Esta vez trabayó en Dígame, nuevamente como caricaturista.
En 1952 el matrimoniu regresa a Xixón, nesta ocasión definitivamente. Continuó'l so trabayu como dibuxante, caricaturista y cartelista hasta que n'agostu de 1962 fai la primera esposición de la so pintura na sala del Atenéu de Xixón.
Como caricaturista y humorísta gráficu tenía un estilu que lu averaba al art decó. Utilizaba la llinia vertical como base pa definir al personaxe y buscaba la máxima simplificación, lo que lu llevaba a prescindir, n'ocasiones, d'elementos tan significativos como los güeyos. Como pintor destacaron les sos mazcaraes marcaes pola ironía y el tremendismu. Utilizó habilmente los colores grises y ocre y los tonos apagaos. La obra de Marola ye amplia y en ciertu modu repetitiva, lo que nun-y quita fuercia y orixinalidá.
Referencies
editar- ↑ Afirmao en: Diccionario biográfico español. Identificador DBE: 45760/manuel-rodriguez-lana. Apaez como: Manuel. Marola Rodríguez Lana. Data de consulta: 9 ochobre 2017. Editorial: Real Academia de la Historia. Llingua de la obra o nome: castellanu. Data d'espublización: 2011.
Enllaces esternos
editar
Wikimedia Commons acueye conteníu multimedia sobre Marola.
