Goju-ryu

(Redirixío dende Goju Ryu)

El Goju-ryu (剛柔流, gōjū-ryū: "estilu duru y suave") ye ún de los principales estilos tradicionales del kárate okinawense, carauterizáu por una combinación de téuniques dures y suaves. Dambos principios, duru y suave, vienen del famosu llibru d'artes marciales Bubishi (wu bei ji en chinu), qu'usaron los maestros d'Okinawa nos sieglos XIX y XX. Go, que significa duro, refierse a téuniques col puñu zarráu o a ataques en llinia reuta; Ju, que significa suave, refierse a téuniques cola mano abierta y a los movimientos circulares.

Goju-ryu
剛柔流
Fecha de fundación 1933
País d'orixe  Xapón
Fundador Chojun Miyagi (宮城 長順, Miyagi Chōjun, 1888–1953)
Ancestros Naha-te, Shaolin del Sur, Grulla Blanca de Fujian
Derivaos Kyokushinkai
Deporte olímpicu Non
Chojun Miyagi, fundador del Goju-ryu

En Goju-ryu dase la máxima importancia a la respiración correuta. Prautíquense métodos qu'inclúin fortalecimientu y acondicionamientu corporal, bases del combate (distancia, aguante, xeneración de potencia, etc.), y exercicios en pareya. Nel programa d'estudios hai movimientos circulares y lliniales. El Goju-ryu combina golpes duros p'atacar, como pataes y puñetazos, con téuniques circulares más suaves cola mano abierta tanto p'atacar como pa bloquiar y controlar al oponente, incluyendo llaves, agarres, valtos y proyeiciones.

Historia editar

L’estilu Goju-ryu fundólu oficialmente’l Sensei Chojun Miyagi en 1933. Esti maestru nació’l 25 d'abril de 1888 en Naha, Okinawa, y morrió n’ochobre de 1953. El so maestru foi’l Sensei Kanryo Higashionna (o Higaonna), el fundador del Naha-te.

 
Kanryo Higaonna

Kanryo Higashionna nació’l 10 de marzu de 1853 y morrió en 1915. Yera miembru de la baxa nobleza de les Ryukyu. Quería viaxar a China pa estudiar, pero nun tenía dineru pal viaxe. Al final aidólu’l dueñu d'un barcu mercante, y en 1868, siendo tovía un rapaz, marchó pa Fuzhou (Fuchow), capital de la provincia china de Fujian (Fukien). Ellí tuvo de discípulu d'un maestru chinu llamáu Woo ("Ru", en xaponés), o Ryu Ryu Ko, col que conoció manches escueles de boxéu chinu y entrenó un estilu llamáu Pak Hok Pai o Grulla Blanca. Acordies coles distintes fontes, Kanryo Higaonna tuvo ente 13 y 16 años entrenando con Ryu Ryu Ko en China. De la que tornó pa Okinawa, n’homenaxe a Yoshimura, el dueñu del barcu que lu aidara, escomenzó a enseñar a los fíos d'ésti l'arte qu'aprendiera. Al espardese la sonadía de les sos grandes habilidaes, llamáronlu p'aprender a los miembros de la familia real de les Ryukyu. Más tarde abrió’l so propiu dojo.

Kanryo Higaonna llegó a ser perconocíu pola so velocidá, fuercia y potencia descomanaes. El so arte apenzó a conocese como Naha-te. Dempués de morrer, socediólu’l Sensei Chojun Miyagi.

En 1899, cuando tenía once años, Chojun Miyagi foi a entrenar artes marciales con Ryuko Aragaki, que daba muncha importancia a desarrollar el físicu per aciu del entrenamientu con arbíes como peses de piedra (chishi), xarros de barru (nigiri-game) y makiwara.

En 1901, cuando deprendiera tolos kates del estilu, Miyagi foi presentáu al maestru Kanryo Higashionna. Miyagi estrémase d'Higaonna precisamente nesto, darréu que pa esti últimu un karateca tenía que se concentrar años enteros nun únicu kata, hasta conocelu a fondu, mientres que pa Miyagi yera posible deprender tolos aspectos del Naha-te. Sicasí, siguiendo a Miyagi l'entrenamientu yera enforma duru y enfocáu sobre too nel kata Sanchin.

Por influyencia del so maestru, y xunto col so amigu Yoshikawa, Chojun Miyagi fixo’l so primer viaxe a China, lo qu'influyó indireutamente nel estilu, como se ve en dellos kates. Tuvo ellí cuatro años siguiendo los pasos del so maestru y entrenando los estilos Pa Kua Chang y Shaolin Chuan. Llueu tornó pa Okinawa onde, basándose nel principiu del ying y el yang (les enerxíes negativa y positiva que rixen l'universu), amestó la flexibilidá de les artes chines a la durez del Naha-te, creando’l Goju-ryu, la escuela de lo duro y lo suave[1]. Sicasí les bases del estilu yá les punxera’l maestru Kanryo Higaonna, discípulu del maestru chinu Ryu Ryu Ko.

Carauterístiques editar

El Goju-ryu, como indica’l nome mesmu, carauterízase pola busca del equilibriu ente los opuestos, ente les enerxíes contraries y complementaries. Enseña cómo actuar, yá seya con enerxía o con blandiura, con rapidez o con suavidá.

Al aviesu de munchos otros estilos importantes de kárate (resalvando quiciabes l'Uechi-ryu) el Goju-ryu carauterízase tamién polos movimientos circulares. Les defenses son circulares y amplies, permitiendo munches aplicaciones distintes como agarres, proyeiciones, retorciones, llaves de brazu, estrangulamientos, etc., d'ehí que seya un estilu eficaz pa combate a distancia curtia.

Tamién se carauteriza’l Goju-ryu poles posiciones fites, dalgunes estreches y/o curties; pol trabayu de tensión dinámica con muncho énfasis na respiración fonda y nel trabayu de la enerxía interno o Ki; pataes básiques descendentes y a nivel “gedan” (de cintura pa baxo), siendo solmenaes a los niveles “chudan” y “jodan” (troncu y cabeza) per aciu de saltos (tobi-geri).

Ye tradicional l'entrenamientu complementariu con aparatos, un sistema de musculación heredáu de China. Tamién se faen exercicios de fortalecimientu de los brazos en pareya (kakie) venceyaos al usu eficaz de la respiración.

La filosofía del combate pue resumise nestes frases:

  • Un ataque duru párase con una defensa suave, y viceversa.
  • Oxetivos duros gólpiense con armes (naturales) suaves, y viceversa.

L’estilu Goju ryu pue sintetizase d'esta miente:

  • Busca’l combate a distancia curtia.
  • Movimientos curtios y circulares.
  • Pataes baxes y barríos.
  • Aunión de fuercia, flexibilidá y respiración.
  • Contraición muscular Go y Ju.
  • Respiración sonora (ibuki).
  • Alministración del espaciu de combate (maai).

Kata editar

El Goju-ryu tien 12 kates esenciales nel so programa estándar d'estudios: gekisai (dai ichi y dai ni), saifa, seiyunchin, seisan, saipai, shisochin, sanseiru, kururunfa, sanchin, tensho y suparenpai. Na mayor parte de les escueles riquen a los estudiantes saber estos doce kates enantes de llegar al sandan (3 Dan).[2]

Cuasi tolos kates tienen el correspondiente bunkai oyo, un exerciciu preparáu de combate ente dos persones. Estos exercicios ayuden al estudiante a pescanciar les aplicaciones del kata, establecer un ritmu/fluyidez acionaos, prauticar ataques/defenses constantes, y prauticar con seguridá movimientos peligrosos sobre un compañeru.[3]

Kihongata editar

Kihongata significa "kata de base." Nel Goju-ryu’l kata Sanchin ye’l pilpayu de tolos otros kates porque enseña movimientos básicos, téuniques básiques, xeneración de potencia y exercicios respiratorios de qigong. Tamién ye’l pilpayu del acondicionamientu corporal. Cuanto más prautique esti kata’l karateca más cambiará’l so Heishugata ("kata coles manes zarraes" o kata fundamental). La primer variante del kata Sanchin (sanchin kata dai-ichi) sirve como Kihongata.

Gekisai editar

Gekisai (撃砕)[4] significa "atacar y destruyir". Estos kates creáronlos Chojun Miyagi y Nagamine Shoshin alredor de 1940 como kates de principiantes, al envís d'aprender les formes básiques del kárate (kihon) a los estudiantes d'enseñanza media d'Okinawa, d'aidar a fixar la estandarización del kárate, y d'enseñar un conxuntu básicu de téuniques pa la defensa personal.[2][5] Los kates Gekisai taben mui influyíos poles téuniques de Shuri-te que’l maestru Miyagi deprendiera del maestru Anko Itosu.[6]

Primero los estudiantes aprienden gekisai dai ichi y dempués gekisai dai ni. La principal diferencia ente dai ichi y dai ni ye qu'esti últimu introduz téuniques a mano abierta y postures nueves.[2] Por exemplu los estudiantes aprienden en gekisai dai ni la postura neko ashi dachi y el bloquéu de rueda (tomai uke).[5]

Saifa editar

Saifa (砕破)[4] significa "destruyir y estrozar".[7] Saifa tien los raigaños en China, y foi Higashionna’l que lu llevó a Okinawa. Tien movimientos rápidos en llatigazu, y golpes de puñu-martiellu y col revés del puñu; céntrase sobre too n’esquitar fuera de la llinia d'ataque zarrando al tiempu la distancia y contratacando destructivamente.[8] Esti ye davezu’l primer kata avanzáu de Goju-ryu qu'aprienden los estudiantes de la mayoría de los grupos, dempués de gekisai dai ichi y gekisai dai ni.

Sanchin editar

Sanchin (三戦) significa "tres batalles". Esti kata vien ser un tipu de meditación en movimientu col envís d'aunir mente, cuerpu y espíritu. Les téuniques execútense bien amodo al envís de que l'estudiante llogre dominar los movimientos precisos, la respiración, la guardia/postura, la fuercia interno, y la estabilidá tanto de cuerpu como de mente.[9][10]

Sanchin ye la base pa tolos demás kates, y xeneralmente considérase que ye’l kata más importante qu'hai que dominar.[11] Cuando llegaben estudiantes nuevos a entrenar con Miyagi, de cutiu entrenábalos de tres a cinco años primero d'aprende-yos el sanchin. Facía qu'entrenaren mui duramente, y munchos dexábenlo enantes de llegar al sanchin. Los que siguíen centrábense cuasi namái que nel sanchin otros dos o tres años. L’entrenamientu del sanchin que daba Miyagi yera duru por demás, y los estudiantes solíen marchar pa casa con negrales producíos al comprobar él la so postura.[12]

Tensho editar

Tensho (転掌) significa "manes que xiren".[4] Neto que’l sanchin, tensho ye una forma de meditación en movimientu. Tensho combina la tensión dinámica dura con movimientos fluyíos de manes, y concentra la fuercia nel tanden.[10] Tensho pue considerase l'aspeutu ju (suave) del estilu go (duru) del sanchin.[13][14]

Kaishugata editar

Kaishugata significa "kata coles manes abiertes." Ye más avanzáu que l'Heishugata ("kata coles manes zarraes"). El Kaishugata sirve como kata de "referencia d'aplicación pal combate" y ta abiertu a una interpretación amplia (Bunkai) del propósitu de los sos movimientos.

  • Seiunchin (制引戦: atacar, conquistar, suprimir, tamién referío a "controlar y obligar a la batalla"). El kata Seiunchin demuestra l'usu de téuniques pa desequilibrar, valtar y agarrar; inclúi golpes cuerpu a cuerpu, barríos, valtos y proyeiciones.
  • Shisochin (四向戦: "destruyir en cuatro direiciones" o "lluchar en cuatro direiciones"). Lliga ataques lliniales potentes (shotei zuki) y movimientos y bloqueos circulares. Yera’l kata favoritu de Miyagi nos últimos años.
  • Sanseirui (三十六手: 36 Manes). Enseña cómo movese al rodiu’l contrariu nos combates a distancia curtia, y céntrase na destrucción de la movilidá d'ésti per aciu del kanzetsu geri.
  • Seipai (十八手: 18 Manes). Lliga movimientos nes cuatro direiciones y ataques n’ángulu de 45°, y enseña téuniques tanto pa distancia llarga como pa combate cuerpu a cuerpu. Yera una especialidá de Seikichi Toguchi.
  • Kururunfa (久留頓破: quedar al aguarde y golpiar d'esmenu). Les sos téuniques básense nel estilu chinu de la Mantis Relixosa. Yera la especialidá de Miyazato Eiichi.
  • Seisan (十三手: 13 Manes). Créyese que ye ún de los kates más antiguos que ta mui xeneralizáu n’otres escueles de Naha-te. Otres ryuha (escueles) tamién prautiquen esti kata o otra versión d'él.
  • Suparinpei (壱百零八: 108 Manes). Tamién conocíu como Pechurin, ye’l kata más avanzáu del Goju-ryu. Al principiu tenía tres niveles pa llegar a dominalu (Go, Chu, y Jo), pero dempués Miyagi namái dexó unu, el nivel cimeru: "Jo". Yera la especialidá de Meitoku Yagi, Masanobu Shinjo y Morio Higaonna.

Fukyugata editar

En 1940, Gen Hayakawa, gobernador d'Okinawa, axuntó’l Comité Especial de Karate-Do, compuestu por Ishihara Shochoku (presidente), Miyagi Chojun, Kamiya Jinsei, Shinzato Jinan, Miyasato Koji, Tokuda Anbun, Kinjo Kensei, Kyan Shinei, y Nagamine Shoshin. El propósitu d'estes persones yera crear un refileru de kates okinawenses al envís d'enseñar educación física y unes artes marciales mui básiques d'estilu independiente pa los neños d'escuela.[15] El so oxetivu nun yera crear un Kárate estandarizáu como fixeren los xaponeses col Kendo y el Yudu con propósitos de popularización.

Esti tipu de kates nun son los tradicionales del Goju-ryu, sinón "kates de promoción", lo bastante cenciellos como pa enseñalos como parte de los programes d'Educación Física nes escueles, y como parte d'un programa estandarizáu de kárate pa les escueles resalvando l'estilu del sensei.

Shoshin Nagamine (Matsubayashi Shorin-ryu) desendolcó’l fukyugata dai ichi, que ye parte del actual programa de Matsubayashi Shorin-ryu; y Miyagi Chojun desendolcó’l fukyugata dai ni, que ye parte del actual programa del Goju-ryu col Nome de gekisai dai ichi. En dellos dojos de Goju-ryu tovía se prautica’l fukyugata dai ichi. Miyagi sensei tamién creó’l gekisai dai ni, pero prautíquenlu namái en Goju-ryu y dellos estilos derivaos.

Escueles y asociaciones editar

 
Chojun Miyagi y Juhatsu Kyoda
  • Goju-Kai / Fundador Gogen Yamaguchi. Goshi Yamaguchi.
  • IOGKF (Federación Internacional de Goju-ryu Karate-do d'Okinawa) / Fundador Morio Higaonna.
  • Jinbukan / Fundador Katsuyoshi Kanei.
  • Jundokan International / Fundador Teruo Chinen.
  • Jundokan Okinawa / Fundador Ei'ichi Miyazato. Tetsonuke Yasuda.
  • Kenshikai / Fundador Tetsuhiro Hokama.
  • Ken-Shin-Kan / Fundador Seiichi Yoshikata Akamine. Raul Fernandez de la Reguera.
  • Seito Goju-ryu / Fundador Kanki Izumikawa.
  • Sengukan / Fundadores Seiko Fukuchi y Kanki Izumikawa.
  • Shobukan / Fundador Masanobu Shinjo. Seiki Takushi y John Porta.
  • Shodokan / Fundador Seiko Higa.
  • Shoreikan / Fundador Seikichi Toguchi.
  • Yuishinkan / Tomoharu Kisaki.
  • Meibukan / Fundador Meitoku Yagi. Meitatsu Yagi.

Referencies editar

  1. [International Goju Ryu Karate Federation ] (http://www.iogkf.com/)
  2. 2,0 2,1 2,2 Kane & Wilder, 2005: p. 241
  3. Kane & Wilder, 2005: páxs. 14-15
  4. 4,0 4,1 4,2 http://www.kugekai.com/kata.html
  5. 5,0 5,1 Kane & Wilder, 2005: p. 226
  6. Toguchi, 1976: p. 16
  7. Toguchi, 2001: p. 16
  8. Kane & Wilder, 2005: p. 15
  9. Wilder, 2007: pp. xi-xiii
  10. 10,0 10,1 Kane & Wilder, 2005: p. 242
  11. Wilder, 2007: p. xi
  12. «The Sensei Who Received Chojun Miyagi's Belt: Okinawan Goju-Ryu Karate is in Good Hands with Meitoku Yagi». Black Belt Magazine:  p. 41. December 1992. https://books.google.com/books?id=8M8DAAAAMBAJ&pg=PA41. 
  13. Kata, University of Washington Goju-Ryu Karate Club
  14. Clark, Mike. «Six winds hands of Tensho».
  15. Goodin, Charles "The 1940 Karate-Do Special Committee: The Fukyugata Promotional Kata." 1999.

Enllaces esternos editar