Golfu de Guinea

Golfu de Guinea
Situación
Tipu	badea
Parte de	Océanu Atlánticu Norte
Asitiáu en	océano Atlántico Sur (es)
Coordenaes	1°N 4°E / 1°N 4°E
	Golfu de Guinea Golfu de Guinea (Liberia)
Datos
Altitú media	0 m
Fondura	5000 m

El golfu de Guinea ye la parte más nororiental de la fastera tropical del océanu Atlánticu, un gran golfu asitiáu na parte occidental d'África. Baña, d'oeste a este, les costes de Liberia, Costa de Marfil, Ghana, Benín, Togu, Nixeria, Camerún, Guinea Ecuatorial, Gabón y Santu Tomé y Príncipe.

La so llende suroccidental márcala, según la Organización Hidrográfica Internacional (IHO), "una llinia que xune, con direición sureste, el cabu Palmas, en Liberia, col cabu López, en Gabón (0°38′S 8°42′E)"^[1]. Nes agües del golfu, consideráu pola IHO como un mar, asítiase la interseición ente l'Ecuador y el meridianu de Greenwich, el puntu coles coordenaes 0º0'0.0"N, 0º0'0.0"E.

Ente los ríos que desemboquen nel golfu rescamplen, pol so llargor y caudal, los ríos Níxer y Volta. La llinia costera del golfu inclúi'l golfu de Benín y el golfu de Biafra.

Orixe del nome

Magar que nun se sabe de xuru, piénsase que'l nome Guinea yera el que se-y daba a dalguna de les fasteres d'esta rexón. Bovill (1995) proporciona una completa descripción:^[2]

Avezaba a considerase'l nome de Guinea como una corrupción del nome Ghana, que los portugueses adoptaran tres de sentilu nel Magreb. Esti autor nun da créitu dengún a esta versión. El nome Guinea tenía usáose nel Magreb y n'Europa muncho primero de la dómina d'Enrique'l Navegante. Por exemplu, nún mapa del cartógrafu xenovés Giovanni di Carignano datáu alrededor de 1320 y fechu con información sobre África aportada por un xenovés que vivía'n Sijilmasa (antigua ciudá comercial del Norte d'África) alcontramos Gunuia; y nel Atlas catalán de 1375, Ginyia. Un pasaxe de Lleón l'Africanu (vol. III, 822) apunta que Guinea ye una corrupción del nome Djenné, una ciudá de 2000 años d'antigüedad asitiada nel centru de Malí, a la vera'l ríu Níxer, que magar que yera menos conocida que Ghana tuviera sonadía demientres munchos sieglos, nel Magreb, como un gran centru comercial y d'enseñanza. El testu diz: "El reinu de Ghinea [...] nomáu polos comerciantes de nuestra nación Gheneoa, polos sos propios habitantes Genni y polos portugueses y otros europeos Ghinea." Sicasí, parez más probable que'l términu Guinea derive d'"aguinaou", una pallabra bereber que significa "negru". Marrakech tien una puerta, construyida nel sieglu XII, nomada "Bab Aguinaou", la Puerta del Negru (Delafosse, Haut-Sénégal-Niger, II, 277-278). La moderna aplicación del nome de Guinea al área costera remóntase namái a 1481. Nesa data los portugueses construyeron un fuerte, San Xurde de la Mina (anguaño Elmina, en Ghana, y Xuan II de Portugal foi autorizáu pol papa (Sixtu IV o Inocenciu VIII) a usar el títulu de Señor de la Guinea, que se caltuvo hasta la estinción de la monarquía.

La costa sur del África occidental, al norte d'esti golfu, foi nomada históricamente Alta Guinea, y la costa occidental del África meridional, más al sur, Baxa Guinea. Anguaño hai cuatro países qu'inclúin esta pallabra nos sos nomes: Guinea, Guinea-Bisáu, Guinea Ecuatorial y Papúa Nueva Guinea. Esti últimu asítiase n'Oceanía, y debe'l términu a la semeyanza que los esplorarores vieron ente los sos pobladores melanesios y los habitantes de la Guinea africana.

Historia

La esploración europea del golfu de Guinea entamó por iniciativa portuguesa. En 1471 el marinu Fernando Poo, que buscaba una ruta hacia la India, viaxó pola rexón. La espedición de Pedro Escobar y João de Santarém, que buscaba puertos seguros d'escala pal tráficu d'esclavos, y tamién el camín haza Les Indies arrodiando África, aportaron a la islla de São Tomé n'avientu de 1471, al añu siguiente a la islla de Príncipe y, el 1 de xineru de 1475 a la islla d'Annobón (a la que nomaron "Ilha do Annobom", esto ye, Islla del Añu Nuevu).

En 1482 los portugueses fundaron el fuerte de San Xurde de la Mina. Cuatro años dempués, en 1486, fundaron el de Santo António de Axim, estableciendo asina la nomada Costa d'Oru portuguesa. Pela so banda el navegante Diogo Cão, que tamién visitó Annobón, descendió más al sur del cabu López, alcontrando'l reinu de Loango. En 1484 el reinu de Benín recibió la visita del portugués Joao Affonso d'Aveiro, que llevó a la zona les primeres armes de fueu y les primeres semilles de cocu, coles qu'entamó un comerciu que yá nun se diba interrumpir.

Hacia 1493 Xuan II de Portugal añadió a los sos títulos reales el de Señor de Guinea y primer Señor de Corisco. La colonización de Bioko, Annobón y Corisco entamó en 1494 cola fundación de "factoríes", puestos comerciales pal tráficu d'esclavos. En 1507 Ramos d'Esquivel tentó d'introducir el cultivu del azúcar na islla de Bioko, pero nun foi quién.

Xeografía

El golfu de Guinea ta llimitáu por una llinia imaxinaria que va dende'l cabu Palmas en Liberia, hasta'l cabu López, en Gabón. Tien dos golfos interiores: el de Benín, al oeste, y el de Biafra, al este. Nes sos agües hai delles islles, Les más importantes d'elles formen una llinia en sentíu SO-NE, y son los puntos más elevaos de la cordillera submarina de Camerún, d'orixe volcánicu. Son:

Annobón (17 km²), tamién nomada Pagalu o Pigalu, que forma parte de Guinea Ecuatorial.
Bobowasi, una islla asitiada na bahía d'Axim, cerca la costa de Ghana. Ye la única que nun forma parte de la cordillera de Camerún.
Bioko (2017 km²), averada a la costa de Camerún pero perteneciente a Guinea Ecuatorial.
Corisco (14 km²) y les islles Elobey (Grande y pequeña), asitiaos cerca l'estuariu del ríu Muni y pertenecientes a Guinea Ecuatorial.
São Tomé y Príncipe, archipiélagu formáu poles islles de São Tomé y Príncipe que formen el país homónimu, antigua colonia insular portuguesa asitiada xustu al norte del Ecuador independiente dende 1975.

Ríos que desagüen nel golfu

Nel golfu de Guinea desemboquen munchos ríos del África occidental. Los más importantes d'ellos, d'oeste a este, son:

Ríu Cavalla, que fai de llende ente Liberia y Costa de Marfil, y tien una llonxitú de 515 km;
Ríu Sassandra, en Costa de Marfil, con 650 km de llargor y una cuenca de 75 000 km²;
Ríu Komoé, en Costa de Marfil, con 759 km y 79 087 km²;
Ríu Volta, en Ghana, con 1500 km y 407 093 km²;
Ríu Mono, en Togu y Benín, con 467 km y 25 000 km²;
Ríu Níxer, en Nixeria, con 4184 km de longitud y una cuenca de 2 261 763 km²;
Ríu Cross, en Nixeria, con 489 km;

Referencies

↑ International Hydrographic Organization (1953). Limits of Oceans and Seas (3rd ed.). Monte Carlo, Monaco.
↑ Hale, Thomas A.. «From the Griot of Roots to the Roots of Griot: A New Look at the Origins of a Controversial African Term for Bard». Journal of the Oral Tradition. Archiváu dende l'orixinal, el 2017-12-02.

[1] International Hydrographic Organization (1953). Limits of Oceans and Seas (3rd ed.). Monte Carlo, Monaco.

[2] Hale, Thomas A.. «From the Griot of Roots to the Roots of Griot: A New Look at the Origins of a Controversial African Term for Bard». Journal of the Oral Tradition. Archiváu dende l'orixinal, el 2017-12-02.

[1]

[2]