Hung Gar

El Hung Gar, Hung Ga o Hung Kuen (Boxéu de la Familia Hung) ye un sistema de kung fu desendolcáu nel sieglu XVII, mui conocíu por ser l'arte que prauticaba l'héroe popular chinu Wong Fei-hung (1847-1924). Ye ún de los principales sistemes del sur de China, xunto col Choy Li Fut y el Wing Chun. L'Hung Gar ta basáu nel boxéu del tigre y de la grulla.

Hung Gar 洪家
Tamién	Hung Ga (洪家), Hung Kuen (洪拳), Hung Ga Kuen (洪家拳)
País d'orixe	China
Fundador	Según la lleenda, Hung Hei-kwun
Métodos téunicos	Entrenamientu de les formes tradicionales con y ensin armes, y del combate
Prauticantes	Luk Ah-choy, Wong Kai-ying, Wong Fei-hung, Lam Sai-wing, Tang Fong, Yew Ching-wong
Deporte olímpicu	Non

Historia

Por mor de que la hestoria de les artes marciales chines tresmitióse tradicionalmente de forma oral más que per escrito, ye probable que muncho de la hestoria primera del Hung Gar nunca vaya esclariase o afitase en documentos escritos.

Según la llenda, l'Hung Gar debe’l nome a Hung Hei-kwun, qu'aprendiera artes marciales con Chi Zin, un maestru Chan (Zen) del Templu Shaolin del Sur. Chi Zin (o Gee Shin) foi tamién maestru d'otros cuatro estudiantes: Choy Gau-lee, Mok Da-si, Lau Sam-ngan y Li Yao-san. Estos cinco artistes marciales (“Los Cinco Ancestros”) convirtiéronse más tarde nos fundadores de los cinco estilos familiares principales de les artes marciales chines del Sur: Hung Gar, Choy Gar, Mok Gar, Lau Gar y Li Gar.

El templu onde entrenaben yera un abeyu d'oponentes de la Dinastía Qing, que lu usaben de base pa les sos actividaes, y foi aína esbarrumbáu poles fuercies de los Qing. Hung, d'oficiu mercadel de té, coló más tarde de Fujian (Fukien) a Guangdong (Cantón), llevando l'arte con él.

El caráuter "hung" (洪) usóse pa denomar al Emperador Hong Wu (洪武帝), que derrocó a la mongola Dinastía Yuan y estableció la Dinastía Ming autóctona. Los enemigos de la Dinastía Qing manchú usaron davezu’l caráuter nes sos representaciones gráfiques. Paradóxicamente Luk Ah-choy, ún de los encontos principales de la tresmisión del Hung Gar, yera fíu d'un manchú allugáu en Cantón.

Hung Hei-kwun ye en realidá un nome adoptáu al envís d'honrar a aquel primer emperador Ming. Los rebeldes anti-Qing dieron nome al biltu más alloñáu de les sociedaes secretes que formaron la “Hung Men” (洪門). Los miembros d´esta sociedá dicíen que la fundaren sobrevivientes de la destrucción del Templu Shaolin, y les artes marciales que prauticaben vinieron llamase "Hung Gar" ("Familia Hung") y "Hung Kuen" ("Boxéu de los Hung").

Carauterístiques

L'Hung Gar ye’l más famosu de los estilos sureños de Shaolin de les artes marciales chines. Tien unos ritmos mui específicos en cuantes a la manera en que lu enseñen y lu prautiquen. Ta consideráu un estilu honorable nel que se supón que’l mayor interés del ye deprender les formes tradicionales de manera precisa y exauta, al envís de pescanciar la gran tradición del estilu. Lo carauterístico del Hung Gar son les posiciones bien baxes, sobre too la "sei ping ma" (posición del caballu), la estabilidá nos pasos y la entrada direuta, asina como les téuniques de mano potentes, sobre too la mano ponte y la versátil garra de tigre. Entrénase muncho tamién l'acondicionamientu de los antebrazos pa consiguir resistencia ("da sam sing", “españíu de les tres estrelles”).

L’habilidá algámase per aciu del desendolcu de tres partes: una ximnasia corporal completa, el combate llibre y les formes (taolu), que son un conxuntu de téuniques coreografiaes, como si foren un “llibru” pa los prauticantes. Anque formes hai cerca d'un cientu nel Hung Gar, les siguientes cuatro considérense los pegollos del estilu:

1. Gung Gee Fuk Fu Kuen (工字伏虎拳, "Puñu del Ideograma “工” de Domar el Tigre");
2. Fu Hok Seung Ying Kuen (虎鶴雙形拳 - "Puñu de la Forma Combinada de Tigre y Grulla");
3. Tid Sin Kuen (鐵線拳, "Puñu del Cable de Fierro")
4. Sap Ying Kuen (十形拳, "Puñu de los Diez Patrones"), tamién llamada Ng Ying Ng Hong Kuen (五形五行拳, "Puñu de los Cinco Animales y los Cinco Elementos").

En tol mundu, los estudiantes empleguen tradicionalmente de dellos meses a tres años nel entrenamientu de la postura, que davezu consiste en tar na posición del caballu de media hora a delles hores nuna mesma sesión, primero de deprender cualesquier forma. Con que cada forma pue llevar alredor d'un añu de deprendimientu, anque les armes s’aprienden a lo último. Ensin embargu, anguaño esti tipu d'instrucción considérase económicamente inviable y irrealizable polos estudiantes, que tienen otros intereses arriendes de prauticar kung fu.

Delles vegaes l'Hung Gar considérase equivocadamente como solo esternu —ello ye, como dependiente de la fuercia física bruta más que del cultivu del qi— a pesar de que l'estudiante avanza pasu ente pasu haza un enfoque internu.

Armes

• Palu de dos cabeces (Seung Tou Guan)
• Palu de la familia Lau (Lau gar Guan)
• Dobles cuchiellos de caparina (Seung Wu dip Dou)
• Palu llargu (Tai Guan /Pa Qua Guan)
• Espada curva (Daan Dou)
• Llanza (Ying Cheong)
• Forcáu (Tai Pa)
• Espada reuta (Kim)
• Alabarda (Kwan Dou)
• Bancu (Kiu Dung)

Les anteriores son les armes principales adoptaes pol estilu Hung Gar. Acordies cola tradición china pueden estremase n’armes yin y yang. Les primeres considérense armes femenines, rápides, llixeres y precises, como la espada reuta; les otres pela so parte son masculines, más lentes, pesaes y potentes, como l'alabarda. Pero pue facese tamién otra distinción, ente armes propies y armes impropies. Les primeres nacen col envís concretu d'usase como armes, mientres que les segundes nun yeren armes n’orixe, sinón preseos de trabayu, a veces d'aniciu rural (como’l palu de dos cabeces o’l forcáu), pero tamién provinientes d'otros oficios (como los cuchiellos de caparina, preseos de carnicería). Esta mena d'armes sólo más tarde entró a formar parte de la tradición marcial, cuando l'estilu escomenzó a espardese y a ser prauticáu pol pueblu.

Enllaces esternos

• WONG PING PUI HUNG GAR KUNG FU - España
• Hung Gar Kung Fu, Andorra Archiváu 2011-01-31 en Wayback Machine
• Hung Kuen Net Archiváu 2010-09-24 en Wayback Machine
• HungKyun.Com Discussion Forum
• Hung Gar Kuen Museum
• Italian Family's HungGar KungFu Association

• Datos: Q863141