Iaijutsu
Iaijutsu (居合術) ye un términu xaponés que pue traducise aproximao como "arte de la presencia mental y la respuesta inmediata", y que s’usa pa nomar l'arte marcial tradicional xaponés, o Koryu Budo, de desenvainar la espada y cortar darréu, entendíu como téunica especial de combate de los samuráis y non como vía de desarrollu personal, qu'en xeneral ye l'oxetivu principal del Iaido, masque tampoco nun ta ausente l'aspeutu filosóficu nel Iaijutsu. Hai quien piensa que, nun sen estrictu, l'Iaijutsu consiste solamente na parte del combate u la espada sal de la vaina, y que cualesquier téunica que siga tien que se clasificar téunicamente como kenjutsu.[1]
 | |
| Enfoque | Manexu de la espada |
|---|---|
| País d'orixe |
 Xapón |
| Fundador | En discutiniu |
| Fecha de fundación | Sieglos XV-XVI |
| Paternidá | Kenjutsu |
| Deporte olímpicu | Non |
 | |
Otros nomes polos que se tien conocío l'Iaido son Battojutsu (抜刀術), Saya-no-uchi (鞘ノ内), Nuki (抜き, 居合) o Yore (乱曲).
Historia
editarNun se conoz con exautitú cuándo entamó a usase’l términu "iaijutsu", o cuándo la téunica de desenvainar la katana entamó a prauticase como un arte martial per se. Suel atribuyise a Hayashizaki Jinsuke Shigenobu (c.1546-c.1621), fundador de la escuela Musō Shinden-ryū, la invención del iaijutsu, pero esto contradizse con otres atribuciones a Iizasa Chōisai Ienao (c.1387-c.1488), qu'atalantó un sistema de desenvainar la espada y fundó la escuela Tenshin Shōden Katori Shintō-ryū un sieglu enantes.[2] Sicasí tovía se-y da munchu creitu a Hayashizaki como esponente del iaijutsu, darréu que les sos enseñances influyeron na fundación de más de 200 escueles de manexu de la espada.
Práutica
editar
L’Iaijutsu foi creáu pal propósitu marcial específicu de defendese a unu mesmu non nel campu batalla, sinón na vida cotidiana. Poro una carauterística central del Iaijutsu ye desenvainar la espada dende delles postures sedentes tradicionales de Xapón, como seiza, iai-goshi, y tate-hiza. Tamién s’estudien téuniques dende una posición de pie (tachi-ai). Amás, como se centraba na defensa en situaciones cotidianes, asumíase que los combatientes llevaben la katana dispuesta col filu p'arriba y sometida per una faxa que ciñía la cintura, y que nun llevaben armadura. Estos supuestos significaben un enfoque del combate bien diferente que cuando los combatientes llevaben armadura y lluchaben nel campu batalla.
L’entrenamientu consiste en conxuntos de kates, téuniques o movimientos qu'aprienden al prauticante a reaicionar amañosamente énte determinaes situaciones. Los kates divídense en cuatro partes básiques: desenvainar (nukitsuke), cortar (kiritsuke), sascudir el sangre imaxinario de la fueya (chiburi) y envainar (noto).
Amas de los kates, prauticaos normalmente con espaes ensin filu llamaes iaito, dellos estilos prautiquen tamién téuniques executaes coles espaes yá desenvainaes, o kumitachi. Otros estilos prautiquen tamién tameshigiri o suemonogiri, que ye la prueba de corte de rollos de paya de llargores equivalentes a delles partes del cuerpu humanu.
Ver tamién
editarReferencies
editar- ↑ Warner, Gordon; Draeger, Donn F.”Japanese Swordsmanship: Technique and Practice”, Weatherhill, 7ª ed., 2005, Boston, Massachusetts. Páx. 50–53. Isbn = 0-8348-0236-8
- ↑ Warner, Gordon; Draeger, Donn F.”Japanese Swordsmanship: Technique and Practice”, Weatherhill, 7ª ed., 2005, Boston, Massachusetts. Páx. 79-80. Isbn = 0-8348-0236-8
