India francesa

La India francesa, oficialmente Établissements français dans l'Inde y coloquialmente Comptoirs des Indes, foi una colonia francesa que comprendía cinco enclaves xeográficamente separtaos del socontinente indiu que foran, inicialmente, factoríes de la Compañía Francesa de les Indies orientales. Los cinco enclaves, que foron incorporaos de facto a la República d'India en 1950 y 1954, yeren: Puducherry, Karaikal y Yanam na Costa de Coromandel, Mahé na Costa de Malabar, y Chandannagar en Bengala. Los franceses tamién teníen pequeños puestos comerciales dientro d'otres ciudaes, pero de magar 1816 los británicos refugaron les reclamaciones franceses sobre ellos, que nun foron reocupaos nunca más. Pa 1950 l'área total de los enclaves yera de 510 km² (293 d'ellos nel territoriu de Puducherry), y la so población de 298.851 habitantes (187.870 d'ellos, el 63%, vivíen nel territoriu de Puducherry).

La India francesa a partir de 1815.

Contestu históricu

India nel cumal de la influyencia francesa (1751).

Mapa de Yanam na época colonial.

Francia foi la cabera de les grandes potencies marítimes europees del sieglu XVII n'incorporase al comerciu coles Indies orientales. Seis décades dempués de la fundación de les compañíes inglesa ya holandesa de les Indies orientales (en 1600 y 1602 respeutivamente), y nún momentu nel que dambes multiplicaben les sos factoríes nes costes del socontinente indiu, los franceses inda nun teníen una compañía comercial nin un solu establecimientu comercial permanente na rexón. La esplicación pa esta entrada tardía nel comerciu coles Indies rellacionase, según dellos autores, cola circunstancia de que la capital, París, nun tuviera asitiada na costa, coles numberoses aduanes interiores del país y cola falta d'ambición de los comerciantes de la fastera atlántica francesa, poco inclinaos a facer les grandes inversiones necesaries pa poner en marcha una aventura comercial esitosa coles alloñaes Indies orientales.

Historia

Los anicios de la espansión francesa na India (sieglos XVI-XVII)

Considérase que la primer operación comercial cola India asocedió na primer metá del sieglu XVI, nel reináu de Franciscu I, cuando dellos comerciantes de Rouen equiparon dos barcos y unviáronlos a comerciar nos mares orientales; colaron de Le Havre, ya enxamás volvió sabese un res d'ellos. En 1604 una compañía consiguió del rei Enrique IV cartes de patente pa comerciar cola rexón, pero'l proyectu fracasó. En 1615 volvieron a concedese cartes de patente, y dos barcos, de los que nun volvió más que ún, foron unviaos a India. La Compagnie française des Indes orientales (Compañía Francesa de les Indies orientales) foi creada, por iniciativa del cardenal Richelieu, en 1642, y reconstruyida en 1664, siendo Jean-Baptiste Colbert ministru principal; nesti caberu añu unvió la so primer espedición, a la islla de Madagascar.

En 1667 la Compañía organizó una segunda espedición. Dirixida por François Caron (acompañáu por un persa de nome Marcara), aportó en 1668 a Surat, au estableció la primer factoría francesa na India. En 1669 Marcara consiguió crear una segunda, en Masulipatam. En 1672 conquistaron la Fortaleza da São Tomé, inicialmente portuguesa pero en manes holandeses de magar 1661, pero tuvieron que devolvela, tras un llargu y sangrín sitiu, a los holandeses. En 1673 la Compañía mercó-y la zona de Puducherry al sultán de Bijapur, y el 4 de febreru l'oficial francés Bellanger de l'Espinay ocupó la so residencia oficial na factoría danesa de Puducherry, dando asina entamu a l'alministración francesa de la ciudá. El so primer gobernador, François Martin, entamó de magar 1674 ambiciosos proyectos de tresformación de lo que yera un pequeñu pueblu pesqueru nuna floreciente ciudá portuaria. La cuarta factoría francesa foi la de Chandannagar: el gobernador mogol de Bengala, el nawab (rei) Shaista Khan, dio permisu pa facelo en 1692.

Los conflictos con ingleses ya holandeses foron continuos nestos años. En 1693 los holandeses ocuparon Puducherry, y ameyoraron les sos fortificaciones. Tres de la firma del tratáu de Ryswick (20 de setiembre de 1697), en 1699, los franceses volvieron a controlar la ciudá. Los conflictos, sicasí, continuaron, y pa 1720 Surat y Masulipatam taben en manes de la Compañía Británica de les Indies Orientales.

Apoxéu y decadencia (sieglos XVIII-XIX)

Hasta 1741 los oxetivos de los franceses, como los de los británicos, foron puramente comerciales. Na tercer y cuárta décades del sieglu XVIII la Compañía Francesa adquirió, pacíficamente, Yanam (asitiada 840 km al noreste de Puducherry, na costa d'Andhra) en 1723, Mahe (na costa de Malabar) en 1725 y Karaikal (asitiada 150 km al sur de Puducherry) en 1739. La ciudá de Puducherry desarrollose, con una trama viaria ortogonal, y medró enforma. Gobernadores capaces como Pierre Christophe Le Noir (1726–1735) y Pierre Benoît Dumas (1735–1741) consiguieron facer d'ella una ciudá grande y próspera. El socesor d'esti últimu, Joseph François Dupleix, entamó a pensar, de magar la so llegada a la India en 1741, n'establecer un imperiu territorial francés na India, y ello pesie al desinterés manifiestu de los sos superiores y del gobiernu francés, que nun quería provocar a los británicos. Les ambiciones de Dupleix chocaben colos intereses británicos, y entamó una dómina d'escaramuces militares ya intrigues polítiques, que nun se deteníen nin siquiera nos poco frecuentes periodos nos que Francia y Gran Bretaña taben oficialmente en paz. L'exércitu francés, dirixíu pol marqués de Bussy-Castelnau, consiguió controlar l'área ente Hyderabad y el cabu Comorín. En 1744, sicasí, llegó a la India un oficial británicu, Robert Clive, que diba acabar coles esperances de Dupleix de crear un imperiu francés na India. Tres de la so derrota militar y unes conversaciones de paz fracasaes Dupleix foi sustituyíu y llamáu a Francia en 1754.

Francia y Gran Bretaña roblaron un tratáu comprometiéndose a non interferir nos asuntos internos indios, pero nun lu cumplieron. Los franceses espardieron la so influyencia na corte del nawab de Bengala, y aumentaron la so actividá comercial nesa fastera del territoriu. En 1756 animaron al nawab Siraj ud-Daulah a atacar y tomar l'asentamientu británicu de Fort William, en Calcuta. Esto desembocó na batalla de Plassey (1757), que supunxo una victoria decisiva de los británicos sobre'l nawab y sos sos aliaos franceses; de resultes, los británicos pasaron a controlar toa la provincia de Bengala. Francia unvió al xeneral Lally-Tollendal pa recuperar el territoriu perdíu y pa espulsar a los británicos de la India. Llegó a Puducherry en 1758, y nún primer momentu tuvo dél ésitu: arrasó por completu Fort Saint David en Cuddalore esi mesmu añu, pero dellos errores estratéxicos de so llevaron a la perda de la rexón de Hyderabad, a la batalla de Wandiwash y al sitiu de Puducherry de 1760. En 1761 los británicos, en represalia poles acciones franceses previes, arrasaron Puducherry; la ciudá habría permanecer cuatro años en ruines.

La robla del tratáu de paz de 1763 devolvió Puducherry a Francia, qu'unvió al gobernador Jean Law de Lauriston col encargu de reconstruyir la ciudá; en solo cinco meses construyéronse 200 viviendes europees y 2.000 tamiles. En 1769 la Compañía, incapaz d'autosostenese económicamente, foi abolida pola Corona francesa, qu'asumió l'alministración de les posesiones franceses na India. Nos siguientes 50 años Puducherry foi siendo alternativamente francesa ya británica, en función de los resultaos de les guerres y los trataos de paz ente dambes naciones. En 1816, tres del final de les guerres napoleóniques, devolviéronse-y a Francia les factoríes de Puducherry, Karaikal, Yunam, Mahé y Chandannagar, y tamién los sos puestos comerciales en Machilipatnam, Kozhikode (Calicut) y Surat. Puducherry perdiera muncha de la so gloria pasada, y Chandannagar quedó reducíu a un insignificante puestu comercial (loge) asitiáu al norte de la gran metrópolis británica de Calcuta. Socesivos gobernadores intentaron, con ésitu desigual, ameyorar les infraestructures, la industria, la xusticia y la educación demientres los siguientes 138 años.

Al traviés d'un decretu asoleyáu'l 25 de xineru de 1871 la India francesa pasó a tener un conseyu xeneral electivu y conseyos locales, tamién electivos. El gobernador vivía en Puducherry, y tenía un conseyu asesor, y creose un sistema xudicial formáu por dos tribunales de primer instancia (asitiaos en Puducherry y Karaikal), un tribunal d'apelación (en Puducherry) y cinco xulgaos de paz (ún en cada asentamientu). La economía foi mayormente agrícola; producíase arroz, cacagüeses, tabacu, nueces de betel y verdures. Hai que lo facer bien.

El final de la colonia

La independencia de la India, el 15 d'agostu de 1947, precipitó la xunión de les posesiones franceses na India cola antigua India británica. Los puestos comerciales de Machilipatnam, Kozhikode y Surat foron cedíos al nuevu estáu el 6 d'ochobre de 1947. Un acuerdu robláu por India y Francia en 1948 determinó la celebración d'una consulta, nes restantes posesiones franceses, pa que la población escoyera'l so futuru políticu. El gobiernu de Chandannagar foi cedíu a India'l 2 de mayu de 1950, y el so territoriu foi incorporáu al estáu de Bengala occidental el 2 d'ochobre de 1954, El 1 de payares de 1954 los otros cuatro enclaves foron tresferíos de facto a la Xunión India, convirtiéndose nel Territoriu de la Xunión de Puducherry. La xunión de jure produciose en 1962, cuando'l parllamentu francés ratificó'l tratáu cola India.

• 
  Palaciu del gobernador de Puducherry (c.1850).
• 
  Loge de Patna, a la vera'l ríu Ganges.
• 
  Casa del gobiernu de Chandannagar (c.1850).
• 
  French India postage stamps
• 
  Almacenes de la Compañía en Puducherry (sieglu XVIII).

Llista de los establecimientos franceses na India

Esta llista inclúi, amás de los asentamientos con territoriu y población, les factoríes o puestos comerciales, los loge. Esti nome definía, nel llinguax de la Compañía francesa de les Indies Orientales, a una factoría, pero tamién a un puestu aislláu, que consistía nuna casa col so xardín, nel que Francia tenía'l derechu d'izar la so bandera y d'establecer un puestu comercial.

Los establecimientos franceses de la India, en 1839, yeren:

1. Na costa de Coromandel,
   • Puducherry y el so territoriu, sodividíu nos distritos de Puducherry, Villenour and Bahour;
   • Karaikal y los sos managam (distritos) dependientes.
2. Na costa d'Odisha,
   • Yanam y el so territoriu, qu'abarca delles aldees;
   • El puestu comercial (loge) de Masulipatam y un asentamientu nomáu Francepeth. Esti yera'l mayor y más importante de los varios allugaos na rodiada de Masulipatam. Incluyía dos bungalows, una capilla y dellos otros edificios, y tenía una superficie total de 0,28 km².
3. Na costa de Malabar,
   • Mahé y el so territoriu;
   • El loge de Kozhikode. Esti puestu comercial asitiábase dientro la ciudá de Calicut, británica, y consistía nuna faza de terrenu costeru, de seis acres d'estensión, allugada media milla al norte del faru de Calicut.
4. En Bengala,
   • Chandannagar y el so territoriu;
   • Cinco loges:
     • Cassimbazar, que comerciaba con cargamentos de seda;
     • Jougdia, fundáu en 1735 por Dupleix pa surtir de testiles a la Compañía;
     • Dhaka, fundáu en 1722, dende'l que s'esportaben teles de muselina;
     • Balasore, fundáu a finales del sieglu XVI pero que perdió la so actividá comercial demientres el sieglu siguiente por falta d'una rede de carreteres adecuada pal tresporte de mercancíes;
     • Patna, fundáu en 1727, yera un puntu d'intercambiu de paños europeos por salitre y opiu.
5. En Gujarat,
   • el loge de Surat, fundáu en 1668 tres d'obtener un permisu y un llugar pal asentamientu del emperador mogol Aurangzeb.

Referencies

• Datos: Q646374
• Multimedia: French India