Jan Mayen

Jan Mayen ye una islla volcánica de 373 km² allugada entre Groenlandia y Noruega, parcialmente cubierta por glaciares y dividía en dos metaes por un estrechu ismu. El puntu más altu, al norte, ye'l volcán Beerenberg (2.277 m), la so última erupción tuvo llugar en 1970 y 1985.

Jan Mayen
islla
Alministración
ISO 3166-2	NO-22
Capital	Olonkinbyen
Llingües oficiales	noruegu
Xeografía
Coordenaes	70°58′59″N 8°32′01″W
Superficie	377 km²
Puntu más altu	Beerenberg (es)
2277 m
Demografía
Población	18 hab. (2010)
Densidá	0,05 hab/km²
Más información
Estaya horaria	UTC+01:00
jan.mayen.no

Jan Mayen, alministrativamente, ye parte íntegra del Reinu de Noruega. Dende 1995 foi alministrada pol gobernador de la provincia de Nordland. Sicasí, parte de l'autoridá foi delegada a un comandante d'estación del Serviciu Noruegu de Comunicación de Defensa.

Nun tien recursos naturales esplotables, polo que su actividá económica limítase a suministrar servicios a los emplegaos noruegos de les estaciones de radio y meteoroloxía ubicaes na islla. Foi descubierta por Henry Hudson en 1607 cuando buscaba el Pasu del Noroeste y llamóla Hudson's Tutches o Touches. Alcuéntrase baxo soberanía noruega dende 1929.

La única actividá na islla ye aprovir servicios a los emplegaos de les estaciones de radio y meteorolóxiques noruegues allugaes na islla. Tien una pista aérea ensin pavimentar d'aproximao 1500 metros de llargor que se llama Aeropuertu de Jan Mayen. La islla ta habitada por el personal qu'opera una base de saléu d'altu algame, con un total de 14 emplegaos, y una estación de servicios climatolóxicos. Los miembros del personal de dambes bases viven nel centru d'agospiamientu de la base de Loran-C llamáu Olonkinbyen, n'ocasiones transmite en bandes de radioaficionaos, en telegrafía.

La islla nun tien pobladores nativos o aboríxenes. Asignóse-y el códigu ISO 3166-1 SJ. El so dominiu d'internet de más altu nivel ye .no (.sj tamién ta asignáu pero nun s'utiliza), el códigu de datos ye JN y el prefixu de radio ye JX.

Historia

El descubrimientu de Jan Mayen entá ye motivu de discutiniu. El monxu irlandés Brendan de Clonfert rellató nel sieglu VI que mientres l'intre d'unu de los sos viaxes, averóse a una islla negra que cuspía fueu y producía un ruiu ensordador. Pensando llegar a les puertes del infiernu, nun desembarcó. Jan Mayen ye una islla volcánica, y ye posible que la afayara mientres dalguna de les sos erupciones, pero nun esiste prueba dalguna d'ello.

Igualmente ye posible que los viquingos conocieren la esistencia de Jan Mayen, yá que tuvieron presentes en Noruega, les islles Feroe, Islandia y Groenlandia.

Jan Mayen foi afayada con certidume a principios del sieglu XVII por balleneros holandeses ya ingleses en busca de nueves zones de pesca. Numberosos navegantes reivindicaron entós el so descubrimientu, como el navegante inglés Henry Hudson, que s'averaría a la islla ensin desembarcar en 1607 y bautizola como Hudson's Tutches o Touches, en 1611 o un añu dempués balleneros de Hull llamáronla Islla Trinidá; en 1612 Jean Vrolicq, un balleneru francés, llamóla Île de Richelieu. El primer descubrimientu incontestable atribúise al esplorador holandés Jan Jacobs May van Schellinkhout que visitó la islla en 1614. El so cartógrafu bautizola Jan Mayen, dempués de cartografiar les sos mariñes, constituyendo asina la prueba más antigua del descubrimientu de Jan Mayen.

Primeres ocupaciones

La islla nun foi reivindicada por nenguna potencia, pero sirvió de campamentu base estacional mientres dos periodos distintos y de llugar d'estudios científicos mientres el primer añu polar internacional en 1882-1883.

Grabáu del sieglu XVIII amosando escenes de la caza de ballenes boreales polos holandeses nes proximidaes de la islla de Jan Mayen y del Beerenberg.

Mientres la primer metá del sieglu XVII, balleneros establecieron na islla delles fundiciones d'aceite alimentaes a partir de la grasa de ballena. Hasta mil balleneros vivíen entós en Jan Mayen mientres el periodu branizu, nel momentu álgidu de la caza de ballenes. L'aceite de ballena yera bien acobiciáu na dómina, polo que se construyeron sistemes de defensa na islla col fin de protexela de los saqueos. Asina lo atestigüen los dos cañones atopaos apocayá. En 1633, hubo un primer intentu de pasar l'iviernu na islla, pero foi suspendíu; nengún de los siete homes que quedaron na islla sobrevivió cuando los pescadores tornaron al añu siguiente. La sobresplotación de la ballena boreal fixo baxar la so población nesti sector del océanu Atlánticu, fixo que la islla fora quedando adulces erma ente 1640 y 1650, y mientres los siguientes 230 años permaneció despoblada.

A principios del sieglu XX, los noruegos empezaron a dir a la islla, y a pasar los iviernos, col fin de practicar la caza. Les preses favorites yeren el raposu árticu, bien apreciáu pola so piel y tamién l'osu polar. La caza intensiva amenorgó de manera drástica les poblaciones del raposu árticu, lo qu'amenorgó de la mesma los beneficios xeneraos por esta actividá. Los cazadores, amurniaos pol aspeutu estéril de Jan Mayen y poles dures condiciones de vida, abandonaron la islla a finales de los años venti.

Soberanía noruega

Les necesidaes d'una estación meteorolóxica allugada nel pasu de les perturbaciones atmosfériques provenientes de Groenlandia y el polu norte y empobinaes escontra Noruega fixéronse notar en 1914 cuando'l profesor Kristian Birkeland d'Oslu reclamó la construcción d'esta estación en Jan Mayen.​ A pesar de la muerte de 125 cazadores de foques en dos nubes tremendes producíes en 1917 y 1920, pel branu de 1921 foi construyida la estación meteorolóxica, asitiada na mariña sur de la islla y llamada anguaño Eldsmetten.

L'añu siguiente, l'Institutu meteorolóxicu noruegu anexionó la islla en favor de Noruega col fin de reforzar la so presencia, y un decretu real del 8 de mayu de 1929 asitió la islla so soberanía noruega. Finalmente, una llei del 27 de febreru de 1930 dexó al reinu de Noruega mercar la islla a los distintos propietarios ya iguar asina el pleitu sobro la propiedá de Jan Mayen.

Segunda Guerra Mundial

La soberanía noruega sobre Jan Mayen nun tuvo interrupciones posteriores a 1921, nin mientres la Segunda Guerra Mundial. Los alemanes invadieron y ocuparon casi la totalidá de Noruega a partir del 9 d'abril de 1940. La familia real exilióse y entamó una resistencia. El rei Haakon VII esmoleciose en protexer los territorios esteriores del so reinu qu'entá yeren llibres, como Jan Mayen, onde unvió en 1941 un contingente militar compuestu de dellos soldaos y un nuevu equipu científicu col fin d'instalar una presencia noruega capaz de responder a les eventuales tentatives d'invasión alemanes. L'equipu científicu foi sacupáu n'amburando la estación meteorolóxica de Eldstemetten en 1940 con cuenta de nun cayera en manos alemanes, siendo reconstruyida de nuevu nes proximidaes de la guarnición militar, al pie del Beerenberg.

Esta nueva estación funcionó a lo llargo de la guerra a pesar de los bombardeos aéreos alemanes. Mientres estos ataques (que nun causaron nengún dañu), dos aviones alemanes estrelláronse na islla. Ún foi un cuatrimotor Focke-Wulf Fw 200 con nueve miembros de tripulación a bordu, que cayó nel Beerenberg, cerca del campamentu noruegu, en 1942. En 1950, dos xeólogos británicos atoparon los restos del otru avión colos restos de los cuatro miembros de la tripulación del cuatrimotor. Estos, fueron repatriaos al campusantu militar de Narvik en 1959.

En 1943, los estauxunidenses fueron autorizaos pa construyir una estación de radionavegación na islla, qu'instalaron en dos campamentos, na mariña norte y oeste, que bautizaron col nome de Atlantic City. Esta estación tenía como principal oxetivu alcontrar les estaciones meteorolóxiques y de radio alemanes instalaes en Groenlandia.

Mientres dalgún tiempu, los científicos duldaron de que pudiera haber dalguna actividá nel volcán Beerenberg, pero en 1970 el volcán entró n'erupción, y añadió otros 3 kilómetros cuadraos de masa terrestre a la islla mientres les trés o cuatro selmanes que duró. Hubo más erupciones ente 1973 y 1985. Mientres una erupción, la temperatura del mar alredor de la islla puede aumentar dende xustu percima del puntu de conxelación hasta unos 30 °C (86 °F).

Les estaciones y cabañes históriques de la islla son Hoyberg, Vera, Olsbu, Puppebu (cabaña), Gamlemetten, Jan Mayen Radio, Helenehytta, Margarethhytta y Ulla (una cabaña al pie del Beerenberg).

Xeografía

Situación de Jan Mayen nel árticu

Jan Mayen ye una islla europea aisllada nel océanu Atlánticu norte, na llende col océanu Árticu. Más concretamente, la islla delimita col mar de Groenlandia al noroeste y del mar de Noruega al suroeste. ​

La islla nun forma parte de nengún archipiélagu nin ta acompañada de nenguna islla secundaria o castru. Poro, la tierra más próxima ye la mariña oriental de Groenlandia, a aproximao 500 kilómetros al oeste. Islandia atópase a 600 kilómetros al suroeste,​ y Noruega a 950 kilómetros al sureste y les Svalbard al nordeste.

Asitiada percima del paralelu 66° 33' 39" de llatitud norte que constitúi el círculu polar árticu, nun ta arrodiada per nenguna tierra habitada y atópase lloñe de toles rutes marítimes importantes. L'istmu ye l'allugamientu de los dos llagos más grandes de la islla, Sør (Llaguna Sur) y Nord (Llaguna Norte ). Un tercer llagu llámase Ullereng (Llaguna de Ullereng), son puntu d'accesu de Jan Mayen y los xeólogos defínenlu como un continente separáu.

Fauna

Charran árticu de Svalbard, xunetu de 2004.

Jan Mayen nun alluga nengún mamífero terrestre dende 1990.. Los raposos árticos fueron esterminaos polos tramperos noruegos a principios del siglo XX y los osos polares que nun s'aventuren tan al sur por cuenta del amenorgamientu de los xelos polares.

Les agües costeres de Jan Mayen son riques en pexes y atraen a numberosos cetáceos como ballena boreal, ballena gorrumba, ballena de Minke, rorcual común, ballena azul, rorcual boreal, Hyperoodon árticu, orca, delfín de focico blancu) y morses. En total, hay 120 especies de aves censades, con cerca de 500 000 pareyes reproductores, son los animales más abondosos na islla.

Les aves más comunes son l'eider común, el charran árticu, l'arao aliblanco, el mérgulo atlánticu, el frairucu común, el fulmar boreal, la gavilueta tridáctila y l'arao de Brünnich, estes trés últimes son les principales especies que nidifiquen na islla.

Flora

Por cuenta del so clima polar, la única formación vexetal de Jan Mayen ye la tundra, formada principalmente de yerbas y mofus. Consta de 74 especies vexetales (4 de felechos, 53 dicotiledóneas, 17 monocotiledónees) y 3 especies de Taraxacum endemismos (Taraxacum brachyrhynchum, Taraxacum recedens y Taraxacum torvum) y 9 especies de fungos.. Ente les especies vexetales presentes en Jan Mayen, podemos atopar una subespecie boreal de piniellu, carex, luzulas, poas, cerastium, potentillas, Ranunculus (qu'entienden de Ranunculus glacialis), rumex, Saxifragas, Silenes, taraxacum, veróniques, etc.

Jan Mayen nun tien montes pero esiste una especie d'árbol na islla . Trátase d'una especie de sauce nanu,

Sauce nanu.

con un altor entendíu ente 1 y 6 centímetros y que tien fueyes que miden de 1 a 2 centímetros de llargu.

La islla ye una reserva dende 2010.

Enllaces esternos

• visita a la fascinante islla de Jan Mayen (n'inglés)

• Wikimedia Commons acueye conteníu multimedia sobre Jan Mayen.

• Datos: Q14056
• Multimedia: Jan Mayen