Joseph Anthony

Joseph Deuster (24 de mayu de 1912, Milwaukee – 20 de xineru de 1993, Hyannis ^(es) ), más conocíu como Joseph Anthony, foi un direutor de cine, dramaturgu, escritor, guionista, actor de teatru, direutor de teatru y actor de cine d'Estaos Xuníos. Debutó como actor cinematográficu na película de 1934 Hat, Coat, and Glove, y la so primer actuación teatral tuvo llugar cola obra representada en 1935 Mary of Scotland. A lo llargo de la so carrera recibió un total de cinco nominaciones a los Premios Tony a la meyor direición.

Joseph Anthony
Vida
Nacimientu	Milwaukee, 24 de mayu de 1912
Nacionalidá	Estaos Xuníos
Muerte	Hyannis (es) , 20 de xineru de 1993 (80 años)
Estudios
Estudios	Universidá de Wisconsin-Madison
Oficiu	direutor de cine, dramaturgu, escritor, guionista, actor de teatru, direutor de teatru, actor de cine
Emplegadores	Vassar College
Nominaciones	ver Premio Tony al mejor director (es) (1956) Premio Tony al mejor director (es) (1957) Premio Tony a la mejor dirección en una obra de teatro (es) (1960) Premio Tony a la mejor dirección en una obra de teatro (es) (1961) Anexo:Premio Tony a la mejor dirección en un musical (es) (1964)
Seudónimos	Joseph Anthony
IMDb	nm0030917

Entamos

El so verdaderu nome yera Joseph Deuster, y nació en Milwaukee, Wisconsin, siendo los sos padres Leonard Deuster y Sophie Hertz. Anthony estudió na Universidá de Wisconsin-Madison y recibió formación teatral nel Pasadena Playhouse ente 1931 y 1935, según na Daykarhanova School dende 1935 a 1937. Dende 1942 a 1946, de resultes de la Segunda Guerra Mundial, Anthony sirvió nel Exércitu de los Estaos Xuníos.

Trabayu teatral

Joseph Anthony, entós sol nome de Joseph Deuster, debutó profesionalmente en 1935 col papel de Rizzio nuna producción de la obra Mary of Scotland. En 1937 actuó con una producción en xira, "Dead End". Dos años más tarde trabayó per vegada primera en Nueva York col patrociniu del Federal Theatre Project, interpretando'l papel del títulu nuna producción de Professor Mamlock puesta n'escena nel Teatru Daly's 63rd Street.

En rematando'l so serviciu mientres la Guerra, en 1946 Anthony remaneció nel circuitu de Broadway sol nome de Joseph Adams actuando nel Teatru Belasco col papel de Segundu Home nuna producción de Truckline Cafe. En xineru de 1948, yá col nome artísticu de Joseph Anthony, trabayó nel Teatru Maxine Elliott cola obra Skipper Next to God. Sol so nuevu nome siguió actuando na década de 1950, interviniendo en producciones orixinales puestes n'escena en Broadway como "The Country Girl" (1951, nel Teatru Lyceum), Flight into Egypt (1952), Camín Real (1953), y Anastasia (1954).

Joseph Anthony debutó como direutor teatral en Nueva York n'abril de 1948 cola obra Celebration, representada nel Teatru Maxine Elliott. En 1954 dirixó la producción orixinal de The Rainmaker, una pieza que la so adautación cinematográfica él tamién dirixiría más palantre. Dende marzu de 1960 a marzu de 1961 Anthony estrenó con ésitu cuatro espectáculos en Broadway: The Best Man (Teatru Morosco), Under the Yum Yum Tree (Teatru Henry Miller), El rinoceronte (Teatru Longacre), y Mary, Mary (Teatru Helen Hayes). Mary, Mary foi la obra empobinada por Anthony que más tiempu se caltuvo en cartel, casi cuatro años y más de 1500 representaciones. Anthony tamién dirixó otros espectáculos en Broadway, como foi'l casu de Romulus (1962), Slow Dance on the Killing Ground (1964), y Breakfast at Tiffany's (1966).

Trabayu cinematográficu

La primer actuación destacada de Joseph Anthony nel cine llegó en 1934 con Hat, Coat, and Glove. Darréu trabayó en She (1935), Shadow of the Thin Man (1941), y Joe Smith, American (1942). El primer filme empobináu por Anthony foi l'adautación de 1956 de la obra teatral The Rainmaker, que tamién había él empobináu. Amás dirixó The Matchmaker (1958), Los ambiciosos (1959), Tou nuna nueche (1961), y Tomorrow (1972).

Gallardones

Joseph Anthony foi nomáu a un total de cinco Premios Tony pola so carrera como direutor teatral, anque nunca llegó a ganalos. En 1956 nomóse-y pol so trabayu en La calandria. Al añu siguiente dir por A Clearing in the Woods y por The Most Happy Fella., en 1960 por The Best Man y en 1961 por El rinoceronte, estos dos últimes en estremándose la categoría del Tony a la meyor direición en Tony a la meyor direición de musicales y Tony a la meyor direición d'obres non musicales. Finalmente, en 1964 foi nomáu'l premiu al meyor direutor d'un musical por 110 in the Shade.

Vida personal

Joseph Anthony dio clases d'interpretación na American Theatre Wing, na Universidá de Vassar, nel Hunter College, y na Universidá de Nueva York. En 1937 Anthony foi unu de los miembros fundadores de la American Actors Company, y en 1976 foi Profesor d'Artes Teatrales na Universidá Estatal de Nueva York en Purchase. Amás, formó parte del Actors Studio, foi miembru del conseyu del Actors' Equity Association, del Sindicatu de direutores d'Estaos Xuníos, y primer Presidente de la Society of Stage Directors and Choreographers.

Anthony, que tuvo casáu cola actriz Perry Wilson, finó en 1993 nuna residencia en Hyannis, Massachusetts. Tenía 80 años d'edá.

Enllaces esternos

• Esta obra remanez de la traducción de Joseph Anthony de Wikipedia - inglés, espublizada polos sos editores baxo la Llicencia de documentación llibre de GNU y la Llicencia Creative Commons Atribución-CompartirIgual 3.0 Unported.

• Wikimedia Commons acueye conteníu multimedia sobre Joseph Anthony.
• Joseph Anthony na Internet Movie Database (n'inglés)
• Joseph Anthony na Internet Broadway Database (n'inglés)
• Joseph Anthony n'AllMovie (n'inglés)

• Datos: Q1706471
• Multimedia: Joseph Anthony