El Kalaripayat (lliteralmente “exercitamientu nel ximnasiu”) ye un arte marcial dravídicu del estáu indiu de Kerala, quiciabes ún de los sistemes más antiguos que güei esisten.[1] Prautícase en Kerala y nes fasteres vecines de Tamil Nadu y Karnataka, asina como nel nordeste de Sri Lanka y ente la comunidá malaya de Malasia. De primeres prauticárenlu los “nairs”, la castra marcial de Kerala, y tamién delles otres castres como los “nadars” (castra noble de Tamil Nadu)[2][3][4], los “ezhavas” (castra militar dravídica) y los musulmanes.

Kalaripayat
Tamién Distintes formes de trescripción: Kalarippayattu, Kalaripayattu, Kalari Payat, Kalari Payatt, Kalaripayatt, Kalaripayatta, Kalari Payatta
País d'orixe India
Paternidá Histórica
Deporte olímpicu Non
Cambiar los datos en Wikidata
Estáu de Kerala, nel sur de la India, u anició’l kalaripayat

Historia editar

Magar que les lleendes atribúin la creación del kalaripayat a los dioses del panteón hindú, créyese que’l so aniciu verdaderu ta ente los sieglos XI y XII d.C. L’arte taba daquella esperdigáu pelos “kalari”, que sirvíen de centros activos de deprendimientu enantes de que s’introduxera’l sistema educativu modernu. Estes instituciones, qu'inda esisten, yeren escueles onde los estudiantes podíen aconceyar y algamar conocencia en diferentes materies, dende les matemátiques a la llingua, l'astronomía o delles artes teatrales. Les artes marciales enseñábense nel payattu kalari, o escuela de llucha.

Nos sieglos XI y XII Kerala taba dixebrada en pequeños principaos que se facíen la guerra ente ellos a base de combates singulares. Nestes amarraces individuales, o ankam, lluchaben los “chekavar” (especie de gladiadores) nun “ankathattu”, una plataforma llevantada temporalmente, d'ente 1,25 y 1,80 m d'altor. El derechu y el deber de prauticar artes marciales al serviciu del soberanu d'un distritu taben venceyaos sobre too a les castres de los “nairs” y los “ezhavas”. Los “lohar” del norte de Kerala yeren guerreros budistes[5] que prauticaben kalaripayat.

Los escritos d'historiadores del periodu colonial tempranu como Varthema, Logan y Whiteway amuesen que’l kalaripayat yera enforma popular y taba bien estendíu ente cuasi tol pueblu de Kerala resalvando xéneru, castra y llinies comunitaries. Dizse que col tiempu llegó a ser tan importante como la llectura y la escritura. En delles families nobles les rapacines tamién recibíen entrenamientu básicu hasta la pubertá. Sábese tamién, gracies a les balaes vadakkan pattukal, que polo menos unes cuantes muyeres de chevakar notables siguieron prauticando y algamaron un grau altu d'espertes. La más famosa foi la llexendaria Unniarcha, del folclor de Kerala, maestra del “urumi” o espada flexible.

La noticia más temprana que se tuvo del kalaripayat n’Occidente diola l'esplorador portugués Duarte Barbosa (aprox. 1518):

A la mayor parte d'estos guerreros únvienlos, cuando tienen siete años, a escueles onde-yos deprienden munches formes d'axilidá y de maña; ellí depriénden-yos a danzar y a xirar y a voltiase sobre’l suelu, a dar blincos bien curiosos y otros de delles clases, y esto apriéndenlo dos veces al día mientres son guaḥes, y lleguen a ser tan elásticos y flexibles que faen retorcigañase los sos cuerpos contra natura; y cuando yá dominen esto dafechu, enséñenlos a manexase col arma que más-yos preste, a dalgunos con arcos y fleches, a otros con piértigues pa convertilos en llanceros, pero a la mayoría con espaes y rodeles, que ye lo que más usen, y siempre tán prauticando esti tipu d'esgrima. A los maestros que los enseñen llámenlos Panikars.

El kalaripayat entró nun periodu de decadencia cuando los guerreros nair perdieron contra los británicos per aciu de la introducción de les armes de fueu, y especialmente dempués del plenu establecimientu del gobiernu colonial británicu nel sieglu XIX. Los británicos acabaron torgando’l kalaripayat y el vezu nair de llevar espaes en visu a prevenir rebeliones y sentimientos anticoloniales. Daquella munches artes marciales de la India teníen que prauticase en secreto y davezu quedaron arrequexaes n’árees rurales.

El remanecimientu del interés públicu haza’l kalaripayat entamó nos años 1920 en Tellicherry, como parte d'una vagamar de redescubrimientu de les artes tradicionales pel sur de la India, y afalóse nos años 1970 col surdimientu del interés mundial poles artes marciales. De poco p'acá fixéronse esfuercios pa popularizar tovía más l'arte, presentándolu nel cine indiu e internacional, en películes como ”Indian” (1996), “Asoka” (2001), “The Myth” (2005), “La Última Lexón” (2007), y tamién en series xaponeses d'anime/manga, como “Kenichi: The Mightiest Disciple”.

Carauterístiques editar

El kalaripayat inclúi golpes, pataes, agarres, formes prefixaes, armes y métodos terapéuticos. Les variantes rexonales clasifíquense acordies cola posición xeográfica de Kerala: el vadakkan o estilu nortizu de los malayos, el thekkan o estilu sureñu de los tamiles, y l'estilu central de Kerala interior. El kalaripayat nortizu básase nel principiu de la téunica dura, mientres que’l sureñu sigue principalmente’l de les téuniques suaves, inclusive anque dambos sistemes empleguen conceutos internos y esternos.

Parte del combate coreografiáu del kalaripayat pue aplicase pa la danza y los danzantes kathakali (drama clásicu indiu) que saben artes marciales tienen sonadía de ser abondo meyores que los otros. Dalgunes escueles tradicionales de danza de la India tovía incorporen el kalaripayat como parte del so réxime d'exercicios.

El kalaripayat prautícase xeneralmente nel kalari, una sala davezu de terrén, de 14 por 7 m. Carauterízase por posiciones mui baxes con nomes d'animales, asina como por numberosos saltos mui altos. Nos estilos nortizu y sureñu enséñase inda una decena d'armes, de les dieciocho que yeren tradicionales. Según la tradición llocal, faen falta munchos años pa dominar una sola arma.

Na práutica del kalaripayat tiénense en cuenta cuatro niveles:

  • Meythari: la práutica d'exercicios pa dominar l'equilibriu tanto a nivel del suelu como nos saltos, tanto del cuerpu como de la concentración. Trátase tamién de desendolcar la flexibilidá y la fuercia, y ye imprescindible pa pasar de nivel.
  • Kolthari: la práutica de les armes de madera, que son más curties a midida que va progresando l'estudiante. El kettukari o vaddi (palu de 1,50 m de llargu), el muchan (palu de 60 cm con un cabu d'unos 3 cm de diámetru y l'otru d'unos 1,5 cm de diámetru), l'otta (palu curváu de menos de 60 cm de llargu, consideráu l'arma más peligrosa y prestixosa del kalaripayat), el gadai (arma d'Hanuman), el marma vadi, etc.
  • Ankathari: la práutica utilizando armes auténtiques de metal, de mano lluchando contra la mesma arma y más p'arriba contra un arma estremada. Escomiénzase pola daga o kadari (puñal curváu con dos filos), el vaal-keddayam (espada de dos filos y rodela), el khathi (puñlal), l'urumi (espada flexible de dos filos), arma peligrosa de manera, inclusive pal propiu prauticante si se distrái un momentu; y per último la llanza de dos filos.
  • Verumkai: la práutica de la defensa personal a mano vacía, la conocencia de los puntos vitales y tamién del emplegu de les armes pequeñes contra les grandes.

Polo tanto’l prauticante de nivel cimeru conoz un conxuntu de puntos vitales que pue usar pa mancar al contrariu, pero tien que dominar tamién l'aviesu d'esti poder, ello ye saber usalu pa sanar. Esto fai que los guru de kalaripayat sían davezu tamién médicos ayurvédicos, terapeutes qu'aprovechen un refileru de masaxes kalari pa sanar a los sos pacientes.

Referencies editar

  1. Kalaripayatta- Discovery Channel
  2. The Encyclopedia of religion, Volume 9 By Mircea Eliade, Charles J. Adams. p.225
  3. https://books.google.co.in/books?id=DuwUAAAAYAAJ&pg=PA71
  4. [1] Martial arts of the world: an encyclopedia, Volume 1 By Thomas A. Green
  5. KALARI

Enllaces esternos editar