Kaus Medius
Kaus Medius (δ Sagittarii / δ Sgr / 19 Sagittarii)[7] ye una estrella de magnitú aparente +2,72, la cuarta más brillosa na constelación de Saxitariu. Visualmente forma parte del arcu de Saxitariu, tando asitiada ente Kaus Australis (ε Sagittarii) y Kaus Borealis (λ Sagittarii). D'ende provién el so nome: Kaus del árabe «arcu» y medius del llatín, indicando la so posición entemedia nel arcu. Tamién ye conocida como Kaus Media y Kaus Meridionalis.
Coordenaes: 
18h 20m 59.643s, -29° 49′ 41.168″
Kaus Medius ye una xigante naranxa de tipu espectral K3IIIa especialmente lluminosa, yá que relluma con una lluminosidá 1180 vegaes mayor que la lluminosidá solar. La so temperatura superficial de 4300 K ye averada, una y bones ésta nunca foi midida direutamente. Tamién destaca pol so tamañu, siendo'l so radiu 62 vegaes más grande que'l radiu solar; asitiada nel llugar del Sol, estiéndese hasta 3/4 partes de la órbita de Mercuriu. Con una masa 5 vegaes mayor que la del Sol, nel so nucleu probablemente tien llugar la fusión nuclear d'heliu en carbonu.[8] Tien una metalicidá similar a la solar ([Fe/H] = -0,01).[9]
Visualmente Kaus Medius tien trés compañeres tenues:[10]
- Kaus Medius B, estrella de magnitú 14,5 a 29 segundos d'arcu de la estrella principal.
- Kaus Medius C, estrella de magnitú 15,0 a 36 segundos d'arcu.
- Kaus Medius D, estrella de magnitú 13,0 a 59 segundos d'arcu.
Nun se sabe con certeza si estes estrelles tán físicamente rellacionaes con Kaus Medius o a cencielles tán na mesma llinia de visión. Per otra parte, esiste cierta evidencia espectroscópica de que tamién puede esistir una compañera cercana, lo que pudiera tar rellacionáu cola so incierta clasificación como estrella de bariu «leve» —una estrella que foi contaminada con elementos pesaos procedentes d'una compañera yá evolucionada—.[8]
Kaus Medius alcuéntrase a 347 años lluz del Sistema Solar y dientro de 2,6 millones d'años va tener llugar el so máximu acercamientu a la Tierra —va tar a 245 años lluz—, momentu en que'l so rellumu va algamar magnitú +1,96.[11]
Referencies
editar- ↑ 1,0 1,1 1,2 Afirmao en: SIMBAD.
- ↑ 2,0 2,1 2,2 2,3 Afirmao en: Gaia EDR3. Stated in source according to: SIMBAD. Llingua de la obra o nome: inglés. Data d'espublización: 3 avientu 2020.
- ↑ Ulrich Bastian (marzu 2000). «Catálogo Tycho-2». Astronomy and Astrophysics: páxs. L27-L30.
- ↑ «Pulkovo Compilation of Radial Velocities for 35 495 Hipparcos stars in a common system» (n'inglés). Astronomy Letters (11): páxs. 759–771. payares 2006. doi:.
- ↑ «High-resolution spectroscopic survey of 671 GK giants. I - Stellar atmosphere parameters and abundances» (n'inglés). The Astrophysical Journal Supplement Series: páxs. 1075–1128. avientu 1990. doi:.
- ↑ «The Perkins catalog of revised MK types for the cooler stars» (n'inglés). The Astrophysical Journal Supplement Series: páxs. 245–266. ochobre 1989. doi:.
- ↑ Kaus Medius - Star in double system (SIMBAD)
- ↑ 8,0 8,1 Kaus Media (Stars, Jim Kaler)
- ↑ Ryon, Jenna; Shetrone, Matthew D.; Smith, Graeme H. (2009). «Comparing the Ca ii H and K Emission Lines in Red Giant Stars». Publications of the Astronomical Society of the Pacific 121 (882). páxs. 842-856. http://cdsads.u-strasbg.fr/cgi-bin/nph-bib_query?2009PASP..121..842R&db_key=AST&nosetcookie=1.
- ↑ Object query 2 arcmin Delta Sgr (SIMBAD)
- ↑ «Kaus Medius (Ashland Astronomy Studio)». Archiváu dende l'orixinal, el 2015-03-10.
Coordenaes: 18h 20m 59.643s, -29° 49′ 41.168″
Datos: Q14038
