Kihon

Kihon (基本) ye un términu xaponés que significa "bases" o "fundamentos." Emplégase a respeutive de les téuniques básiques que s’enseñen y prautiquen como contéu de la mayoría de les artes marciales xaponeses.

Prauticar y llegar a dominar el kihon ye un requisitu esencial del entrenamientu avanzáu, y inclúi la práutica de la postura y respiración correutes de la que se prautiquen bases como guardies, golpes de mano y puñetazos, pataes o bloqueos, pero tamién inclúi kates representativos de base.

El kihon nun ye solamente entrenar les téuniques, sinón afalar nel estudiante l'espíritu y actitú correutos tol tiempu.

Les téuniques de kihon tienen que se prauticar davezu, de cutiu en cada sesión d'entrenamientu. Considérense fundamentales en visu a dominar y ameyorar tolos movimientos más complexos. El kihon de les artes marciales pue considerase como un asemeyu de les téuniques básiques de, por exemplu, el baloncestu. Los xugadores profesionales de la NBA nunca dexen de prauticar recates, pases, tiros llibres, mates, etc. col envís de caltener y perfeicionar les habilidaes más complexes que s’usen nun partíu de baloncestu.

Nel Kárate

Los estilos de kárate estrémense enforma tocántenes al énfasis que ponen nel kihon. El kihon pue prauticase como "exercicios de pista", onde la mesma téunica o combinación repítese una y otra vez de la que los estudiantes avancen y reculen pela pista. L’entrenamientu xaponés de kihon ye célebre polos llargos periodos d'entrenamientu. Albídrase que con esti estilu de práutica les téuniques calistren na memoria muscular del karateca.

Dellos estilos empleguen el "kihon kata" p'aprender a los primerizos. Amás el kihon pue tomar la forma d'exercicios preparaos por pareyes onde dos estudiantes van alternándose na execución d'una téunica. Equí combínase la repetición col entrenamientu de la distancia. Distintos tipos de diana pa puños y piernes, como sacos, escudos o moñecos, úsense polo xeneral en niveles más avanzaos del entrenamientu del kihon al envís de fortalecer los músculos, los güesos y la piel. Ente los exemplos de dianes tradicionales pa golpiar tán los makiwara, entre munchos otros.

Dellos estilos cuenten con un pequeñu conxuntu de téuniques básiques que se prautiquen nes clases de contino. Otros pela cueta pueden tener distintos refileros de téuniques que van prauticándose caún d'ellos solamente cada par de meses.

Nel Aikido

Nel aikido tamién hai sistemes distintos de kihon según los estilos. Nel estilu Iwama’l kihon tiende a facese dende un potente agarre estáticu, mientres que’l kihon del Shodokan entama coles dos persones separtaes por una distancia fixa. En tolos casos el papel de dambos participantes ta definíu dafechu. Nel Aikido Yoshinkan tamién se-y da la mayor importancia a les téuniques de kihon.

Nel Kendo

Nel kendo hai distintos sistemes de kihon. Dos d'esos sistemes son el "Dai Ichi Kihon" (kihon grande unu) y el "Dai Ni Kihon" (kihon grande dos) desendolcaos poles fuercies policiales de Xapón.

Nel 2005 la Federación de Kendo de Tou Xapón presentó la nueva metodoloxía "Bokuto Ni Yoru Kendo Kihon-waza Keiko-ho". El propósitu de tala metodoloxía yera desendolcar una forma d'entrenamientu que pudiera incluyise na práutica estándar del kendo colos siguientes oxetivos:

Aidar a los principiantes a deprender el conceutu de que’l shinai ye la representación del katana.
Desendolcar bases y téuniques afitaes que se puedan treslladar direutamente a la práutica con bogu.
Desendolcar les habilidaes y comprendoria del estudiante pa la práutica posterior del kata de kendo.
Desendolcar reiho (etiqueta).

Nel Kyudo

Nel kyudo los kihon tán formaos poles postures básiques "shisae" y polos movimientos básicos "doza" necesarios pa la disciplina. Estes bases son asimilaes pol prauticante al envís d'algamar una actitú xusta de la que prautica.

Referencies

Enllaces esternos

Kihon Shotokan Archiváu 2011-08-27 en Wayback Machine