Wikipedia

Kuk Sool Won

El Kuk Sool Won (국술원) ye un sistema coreanu d'artes marciales fundáu por Suh In-Hyuk (Kuk Sa Nim o Gran Maestru) en 1958.[1] El nome Kuk Sool Won tórnase a "Asociación Nacional d'Artes Marciales" y, magar que s’encurtia a “Kuk Sool”, la denomación kuk sool / guk sul (국술; 國術) emplégase tamién pa denomar artes marciales coreanes asemeyaes desendolcaes primero o pela mesma dómina que se formó’l Kuk Sool Won. Anguaño’l Kuk Sool Won enséñase en tol mundu[1], y al tar fundáu como un sistema d'artes marciales y non como un simple estilu d'artes marciales, el Kuk Sool Won nun se considera venceyáu a una única disciplina. Quier ser un estudiu de conxuntu de toles artes marciales coreanes. Dende’l puntu de vista de la filosofía d'In Hyuk Suh, el sistema quier "integrar y esplorar tol espectru de les artes marciales asiátiques esistentes, téuniques d'educación física, desarrollu mental y entrenamientu d'armes."[2]

Kuk Sool Won
국술원
Tamién Kuk Sool
Enfoque Híbridu
País d'orixe Corea
Fundador Suh In-Hyuk
Fecha de fundación 1958
Paternidá Artes marciales de Corea
Deporte olímpicu Non
Sitiu oficial http://www.kuksoolwon.com
Cambiar los datos en Wikidata

L’estudiu del Kuk Sool inclúi tamién munches téuniques surdíes modernamente, como la defensa contra les armes de fueu y la improvisación d'armes. El Kuk Sool tien munches facetes, y prautícase pa la defensa personal, salú, educación física, competición, entretenimientu y propósitos estéticos.

Carauterístiques

editar

Nel Kuk Sool amiéstense munchos "estilos" distintos. Sicasí inda tien delles carauterístiques propies que lu estremen d'otres martes marciales tradicionales. Son típiques les sos postures baxes y los movimientos fluyíos y curiosos. Ponse muncho l'acentu tamién nes llaves a les articulaciones y na presión de puntos. El Kuk Sool tamién se describe como un estilu duru y suave, qu'inclúi golpes duros y potentes arriendes de movimientos suaves y circulares.

You won hwa

editar

Un aspeutu clave del Kuk Sool xira al rodiu de la teoría del "You Won Hwa". La traducción lliteral sería "Harmonía del Círculu d'Agua". La primer parte, “you” o “cuerpu” (agua), simboliza tanto adautabilidá y suavidá como puxu. La segunda parte, “won” (círculu), suxer qu'hai un círculu personal al rodiu de caún de nosotros, y que tenemos que tar siempre activos y sollertes pa refugar l'agresión. Son típicos los movimientos circulares del Kuk Sool pa esviar los ataques. La tercer parte, “hwa” (harmonía o compañerismu), representa’l deséu d'algamar l'harmonía ente mente y cuerpu. Na práutica esto llógrase per aciu de la repetición. La idea ye combinar estos tres aspeutos y usalos pa gobernar tolos movimientos del prauticante.

Aspeutos téunicos

editar

Ente otros, el Kuk Sool cuenta colos siguientes conxuntos de téuniques:

  • Rompimientos/llaves a les articulaciones: Nel Kuk Sool empléguense delles llaves a les articulaciones, por exemplu a los brazos, a les moñeques y a los xuegos pequeños.
  • Soo Ki (Golpes de mano): Téuniques de golpiar cola palma, puñu, moñeca, deos, mano zarrada, mano abierta, brazu, costazu, y a los puntos de presión.
  • Johk Sool (Téuniques de patada): Pataes en xiru, en saltu, combinaes, a dos piernes, y a los puntos de presión.
  • Proyeiciones y agarres (Tu Ki y Jap Ki): Valtos, proyeiciones, barríos, agarres con presión de puntos, defensa escontra agarres, llucha y téuniques de suelu.
  • Nak Bup (Principios de cayida): Les téuniques de cayida tamién s’enseñen nel Kuk Sool. Per medies d'estes téuniques el prauticante pue cayer de delles maneres ensin mancase. Esto aveza llograse agrandando la superficie del área d'impautu en visu a prevenir la fuercia de dañu sobre un área aislada del cuerpu.
  • Téuniques d'estilos animales: Tigre, Mantis, Grulla, Dragón, Culiebra, Osu, Águila, etc.
  • Armes coreanes tradicionales: Espada (curtia, llarga, cenciella y doble, reuta y invertida), palu (curtiu, mediu y llargu, cenciellu y doble), jeol bong (de seición doble y triple, tamién conocíos como nunchacos y sansetsukon), cuchiellu, llanza, wol do (cuchiellu de lluna, una alabarda coreana), sam-ji chang (llanza de tres puntes, traenta o dangpa), cayada, cuerda, abanicu, y arcu y fleches (que s’enseña a l'antigua, tirando de pulgar).
  • Métodos terapéuticos de les artes marciales: Acupresión, acupuntura, enerxía interno, yerbes medicinales.
  • Meditación y téuniques de respiración: Postures de meditación y de respiración y téuniques de concentración.

Estos principios y estilos guíen los siguientes aspeutos del Kuk Sool Won.

Formes

editar

En cada grau, a los artistes marciales de Kuk Sool ríquen-yos saber una o más formes a mano vacía o "hyung". Estes formes execútense en solitario. Cada forma tien un aspeutu xeneral que guía’l so significáu, que pue dir dende l'equilibriu y el movimientu llinial a la preparación y práutica pa una forma de cuchiellu. En llogrando l'estudiante’l cintu negru, ye introducíu a les formes d'armes en solitario. Estes son asemeyaes a les de mano vacía, nun siendo qu'incorporen un arma.

Tamién al nivel de cinturón negru o per encima, l'estudiante pue deprender formes d'armes en pareya, o formes de combate. Estes fáense con dos persones nuna riestra prefixada de pruebes. Al principiu caltiénse’l cuidáu pa deprender la forma y nun mancar al compañeru, pero’l verdaderu dominiu demuéstrase (ente otres coses) pola velocidá y el contautu plenos.

Amás toles formes tienen cinco principios guía que gobiernen caún una parte específica del cuerpu y contienen una regla o pauta PRINCIPAL y otra “secundaria”:

  • Mente: CALMA y tamién alerta
  • Güeyos: LLUMINOSO y centrao
  • Cuerpu (troncu): BAXO y suave (esto ye flexible, non feble o fráxil)
  • Manes: RÁPIDO y exauto
  • Pies: DESPACIO y controlao (despacio col significao d'intencionao, non lento o dormiliento)

Téuniques

editar

El Kuk Sool divide sistemáticamente los principios aplicaos de les artes marciales en téuniques organizaes en conxuntos. Cada nivel de cinturón tien ún o más conxuntos que se pide que sepa’l prauticante enantes de siguir avanzando. El númberu de téuniques de cada conxuntu pue tar ente seis y más de venti, y ordénense y agrúpense por principios. Por exemplu, hai un conxuntu de téuniques de proyeición, y tamién un conxuntu de téuniques de contra-proyeición.

Los conxuntos de téuniques tamién se dividen en niveles de dominiu, con dellos conxuntos de grau altu que son asemeyaos a los de grau baxu, pero con un métodu d'aplicación más difícil y/o precisu. Les téuniques concretes prautíquense con ún o más compañeros dende una postura prefixada. La mayoría de les téuniques finen cola aplicación correuta d'una llave articular, estrangulamientu, golpe, proyeición, o una combinación d'ellos. Pa que sían eficaces, les téuniques de Kuk Sool hai que les facer con velocidá, exautitú y control.

Deporte

editar

L’Asociación Mundial Kuk Sool organiza oficialmente munchos torneos anuales nos Estaos Xuníos, Corea y Reinu Xuníu[3]. Estos torneos amuesen distintos aspeutos del Kuk Sool y pueden incluyir tamién una demostración o una ceremonia de promoción de cintu. Nos Estaos Xuníos los prauticantes de Kuk Sool pueden competir en formes a mano vacía, formes d'armes, téuniques, combate y rompimientu de tables.

Formes, téuniques y rompimientu de tables

editar

Nestes categoríes los competidores son xulgaos nuna escala de 10 puntos, por tres xueces que sumen les sos puntuaciones pa decidir el ganador. En formes, el competidor tien que facer la forma del so nivel de cintu anterior. Por exemplu un cinturón marrón tien que facer la forma que deprendió de cinturón bermeyu. Neto pa les téuniques, onde’l competidor tien que facer tres téuniques de cada conxuntu del so currículum de grau anterior.

Nel rompimientu de tables xúlguense téunica y potencia. Cada competidor ruempe la mesma cantidá de tables, na mesma posición acordies cola so altura, coles mesmes téuniques. Los rompimientos tán pensaos pa que sía abegoso enantar les puntuaciones del competidor, y davezu los competidores nun completen tolos rompimientos.

Combate

editar

Les regles de combate del Kuk Sool Won puen variar de tornéu a tornéu, inclusive acordies al grupu d'edá.

En xeneral el combate nel Kuk Sool Won ta basáu en puntos y nel contautu llixeru o nel non contautu. Los combates son de tres minutos, y el que tien más puntos al final gana. El combate acaba tamién si un competidor algama 5 o más puntos perriba l'otru. Permítense golpes al pechu, costaos, pescuezu y cabeza. Tán torgaos los golpes al llombu o detrás de la cabeza. Tórgase’l contautu escesivu, que pue producir avisos, descuentos de puntos y descalificaciones. Puntúase d'esta miente:

  • Un puntu: patada al cuerpu, puñetazu al cuerpu, puñetazu a la cabeza.
  • Dos puntos: patada a la cabeza.

Arriendes d'apotar al puntu, el lluchador tien qu'amosar claramente la téunica y que la executa con exautitú y fuercia. Los puntos decídelos un xuez central, y dos llaterales. Tienen que tar d'alcuerdu nel puntu dos de los tres xueces pa que cuente. En cualquier momentu un xuez pue parar el combate y pidir una decisión de los xueces sobre un puntu. Los lluchadores entamen nel centru l'área, separtaos unos 3 pies, y tornen ende si un xuez pide decisión, si asocede una penalización o si un competidor sal del área.

El principiu coreanu de “dae ryuhn bub” guía’l combate de Kuk Sool Won:

  • Dae: Postura y mente correuta
  • Ryuhn: Combinaciones
  • Bub: Arrodiar al contrariu

Anque’l combate se considera un aspeutu importante del Kuk Sool, nun se-y da tanto aquello como en munches otres artes marciales deportives.

Referencies

editar
  1. ↑ 1,0 1,1 «Kuk Sool Won Association». Archiváu dende l'orixinal, el 2009-09-30.
  2. ↑ «World Kuk Sool Association». Archiváu dende l'orixinal, el 2008-05-09.
  3. ↑ «Kuk Sool Won News And Events». Archiváu dende l'orixinal, el 2009-10-02.

Enllaces esternos

editar
Sacáu de «https://ast.wikipedia.org/w/index.php?title=Kuk_Sool_Won&oldid=4257526»