Léon Degrelle

Léon Joseph Marie Ignace Degrelle (15 de xunu de 1906, Bouillon – 31 de marzu de 1994, Málaga) foi un políticu belga y oficial de les Waffen SS, que terminó la so vida n'España. En fundando nos años 30 el movimientu políticu Christus Rex (Rexismu), d'inspiración católica y conservadora, radicalizó la so posición nos años siguientes, averándose al fascismu.

Léon Degrelle
miembru de la Cámara de Representantes de Bélxica 2 abril 1939 - 17 febreru 1946
Vida
Nacimientu	Bouillon, 15 de xunu de 1906
Nacionalidá	Bélxica
Llingua materna	francés
Muerte	Málaga, 31 de marzu de 1994 (87 años)
Causa de la muerte	infartu de miocardiu
Familia
Padre	Édouard Degrelle
Estudios
Estudios	Universidá Católica de Louvain
Llingües falaes	francés
Oficiu	políticu, periodista, escritor
Premios	ver Cruz Alemana n'oru Caballeru de la Cruz de Fierro con Fueyes de Carballu
Serviciu militar
Cuerpu militar	Heer (es)
Graduación	Sturmbannführer
Lluchó en	Segunda Guerra Mundial guerra Xermano-Soviética
Creencies
Relixón	catolicismu
Partíu políticu	Partido rexista (es)

Combatió al pie de les fuercies de la Exa na Segunda Guerra Mundial na Lexón Valonia, una unidá estranxera axunta a les Waffen SS. Atopándose en Noruega nel momentu de la rindición alemana en 1945, llogró escapar a España, onde'l réxime de Francisco Franco protexólu mientres décades de la sentencia de muerte por crímenes de guerra pronunciada na so contra. La oportuna concesión de la nacionalidá española llibró-y de ser estraditáu tres el fin del franquismu, y dedicó los sos últimos años a escribir distintes obres. Siguió cola so militancia política ensin arrenunciar nunca a les sos idees nazis. Amás, participó viviegamente na reorganización de los nuevos partíos políticos d'estrema derecha n'Europa. Mientres la so estancia n'España, vivió sol nome falsu de José León Ramírez Reina.

Biografía

Mocedá

Degrelle nació nel senu d'una familia católica burguesa d'orixe francés; el so padre yera fabricante de cerveza y emigrara a Bélxica, pocos años antes, a Bouillon, concretamente 6 años antes de la nacencia de Léon, por cuenta de la espulsión sufierta polos xesuites y al gobiernu anticlerical de Francia. Foi educáu nel catolicismu y cursó los sos primeros estudios nun colexu de la Compañía de Xesús. Los xesuites tendríen una notable influencia en Degrelle, que los definió como «los meyores educadores del mundu».[cita ^{[ensin referencies]} Doctoró en Derechu pola Universidá Católica de Lovaina, onde foi influyíu pol pensador francés Charles Maurras, y exerció de siguío como abogáu nesa ciudá.

A empiezos de la década de 1930 afilióse a Aición Católica y empezó a trabayar pa una pequeña editorial católica llamada Christus Rex (en llatín, «Cristu Rei»), que publicaba un periódicu homónimu. Viaxó a Méxicu como corresponsal para cubrir la Guerra Cristera que se llibraba ente la Lliga Nacional pa la Defensa de la Llibertá Relixosa y el Gobiernu mexicanu, que d'alcuerdu a la Constitución de 1917 impunxera restricciones al cultu católicu y prohibiciones al cleru rellacionaes col exerciciu del so ministeriu. El berru de guerra de los cristeros, «¡Viva Cristu Rei y Santa María de Guadalupe!», impresionó fondamente a Degrelle que, al so regresu en 1934, fundaría Les Editions de Rex y empezaría a movilizase nel Partíu Católicu Belga (PCB) pa promover un cursu d'aición más militante. El 29 de marzu de 1932 casóse con Marie-Paule Lemay, cola que tuvo cinco fíos: cuatro muyeres y un varón (que finó nun accidente de motocicleta cuando yera mozu).

Actividá política

Léon Degrelle dando un discursu en 1937.

El fracasu de les sos aiciones dientro del PCB y el francu refugu col que se recibió la so postura nuna xunta de la cúpula política del partíu en Kortrijk en 1935, llevó-y a dixebrase d'ésti.^{[ensin referencies]}

Al añu siguiente, y denunciando lo que considera «corrupción» de los partíos esistentes — incluyendo al Partíu Católicu de Bélxica, sofitáu pola xerarquía eclesiástica — fundó'l Partíu Rexista. El so programa yera fuertemente populista ya incluyía denunciar la inxerencia de les grandes empreses y la banca na economía y la política belgues. De la estructura de los partíos comunista y socialista, Degrelle tomaría l'exemplu de les «cases del pueblu» como medio de movilizar a les mases; de los marxistes tomaría tamién un ideariu d'igualdá social, anque col mesmu énfasis verticalista que la Italia fascista de Mussolini aplicara a la organización corporativa de la sociedá.

El partíu cuntó con un sofitu inesperáu en Valonia, y llueu una filial en Flandes, el Vlaamsch Nationaal Verbond (VNV) so la direición de Staf de Clerck, sumóse-y. Anque la so plataforma incluyía l'abolición del sistema democráticu y l'establecimientu d'una organización corporativa del gobiernu, el 24 de mayu de 1936 participó per primer vegada nes eleiciones, nes que llogró 21 diputaos y 12 senadores (11,49% de los votos). La seición flamenca tamién tendría representación, en consiguiendo 72.000 votos. En 1937 ameyoró la so actuación, llogrando un 19% de los sufraxos, pero'l sofitu aparraría nos años siguientes y n'abril de 1939 - yá cola Segunda Guerra Mundial n'acurres - les eleiciones llexislatives refundiaron namái'l 4,43% de los votos, llogrando cuatro diputaos y cuatro senadores.

Degrelle, formáu en periodismu y de pluma entrenada na revista estudiantil XX Siècle, escribía los sos propios discursos políticos. D'esta dómina data la so estrecha amistá col famosu dibuxante George Remi, conocíu como Hergé, que nel so cómic Tintín ilustraba les sos publicaciones. Degrelle diría más tarde que Hergé inspirárase nél pa crear a Tintín, anque'l dibuxante siempres afirmó que'l so modelu fuera'l so propiu hermanu, Paul Remi, oficial del Exércitu belga.

Les esmoliciones del rexismu taben lloñe de ser homoxénees nesti momentu; más comprometíu cola posición fascista que col nacionalismu o'l ultramontanismu, otres dos corrientes brengoses nel partíu, Degrelle aconceyó n'agostu de 1936 con Benito Mussolini y al mes siguiente con Adolf Hitler, de los que llogró financiamientu pal partíu. Correllativamente, incorporó a la so plataforma principios antisemites, asemeyaos a los promovíos polos nazis. Aconceyó no siguiente con otros líderes de la ultraderecha europea d'aquellos tiempos, incluyendo a Corneliu Codreanu, líder de la Guardia de Fierro rumana, y a José Antonio Primo de Rivera, fundador de la Falanxe Española.

Segunda Guerra Mundial

Al españar la guerra en 1939, el partíu de Degrelle sofitó al rei Leopoldu III na so posición de neutralidá; el 10 de mayu de 1940, sicasí, l'Alemaña nazi invadió Bélxica. Degrelle culpaba de la guerra a Francia y al Reinu Xuníu, a la masonería y al «capitalismu xudíu», y anque desaprobaba polo xeneral la conducta guerrera del Tercer Reich, reconocía qu'ésti fuera provocáu polos Aliaos, que calteníense al marxe de la invasión a Finlandia per parte de la Xunión Soviética (la conocida como Guerra d'Iviernu), pero descargaben toa clase de maniobres para afrellar a Alemaña en distintos puntos d'Europa; ye asina que resuelve aplaudir la invasión de Noruega, en vista de considerala una esitosa reacción alemana énte la tentativa d'invasión británica. La resistencia estremó al Partíu Rexista, pero'l 28 de mayu de 1940 los belgues rindiéronse y establecióse un nuevu gobiernu. Antes d'eso, Degrelle foi prindáu'l día 10 xunto con otres 5.000 persones (comunistes fieles al Pactu Ribbentrop-Molotov, xudíos, anarquistes, nacionalistes flamencos, rexistes, etc.) y deportáu a Francia por una orde del 10 de mayu de 1940 emitida pol ministru de Justicia Pierre Janson, del gobiernu belga lliberal. La mayor parte de los sos compañeros de prisión seríen afusilaos ensin causa dalguna'l día 20 de mayu d'esi añu por soldaos franceses, nun episodiu entá non esplicáu; ye posible que'l xefe militar de la llocalidá nesos momentos fuera l'entós coronel Charles de Gaulle. Remanecería ellí namái de pasu, pos a la capitulación de Francia foi lliberáu del campu de concentración de Vernet el 22 de xunetu y tornó a Bélxica pa promover la reconstrucción del movimientu. La so posición de collaboración col réxime invasor nun cuntó cola aprobación universal de tolos rexistes; dalgunos, como Theo Simon y Lucien Mayer, entamaron un movimientu clandestín de resistencia. El 25 d'agostu del mesmu añu Degrelle empezaría a publicar nel periódicu collaboracionista Le Pays Réel.

El 1 de xineru de 1941, Léon Degrelle declaró públicamente la unidá del movimientu rexista col nazismu y el fascismu. Cuatro díes más tarde, Degrelle confesó la so almiración por Adolf Hitler, al que llamó «l'home más grande de la nuesa dómina».^{[ensin referencies]} El 21 de xunu de 1941 establecería una alianza colos nacionalistes flamencos, un día antes de la invasión alemana a la Xunión Soviética. La unificación de la ultraderecha europea nun frente común contra la URSS daría la oportunidá pa estrechar los llazos de collaboración. En solicitando autorización especial de Hitler pa faelo, Degrelle fundó esi mesmu mes la Lexón Valonia (Legion Wallonie), una unidá de voluntarios belgues que combatiría a los soviéticos xunto cola Wehrmacht, de manera asemeyada a lo que fizo la División Azul compuesta por voluntarios españoles.

Amerizaxe na sablera de la Concha de San Sebastián (España) del bombarderu Heinkel 111 que tresportaba a Léon Degrelle dende Noruega en mayu de 1945.

La Lexón Valonia, d'un millar de persones, combatió primeramente con uniforme y armes belgues nel Frente Oriental como parte de la Operación Barbarossa. En sufriendo graves perdes, y nel procesu de reorganización de les fuercies destinaes al ataque de la URSS, recibió refuerzos en 1943 al integrase nella tolos voluntarios de nacionalidá non xermana, colo que se convirtió nuna brigada d'asaltu axunta a les Waffen-SS. Degrelle fuera nomáu Cabu díes tres el so allistmientu, y Teniente pol so méritu en combate en recibiendo en mayu de 1942 una Cruz de Fierro. Al convertise en brigada, foi destacáu como Comandante (Obersturmführer) al mandu de la mesma.

La Lexón Valonia participó intensamente nos combates; Degrelle foi condecoráu por ello con un Nahkampfspange, una distinción apurrida a los participantes activos nel frente. Eventualmente, por aciu un alcuerdu con Heinrich Himmler, la Lexón sería tresformada na 28º División d'Infantería de les Waffen-SS, anque les sos dimensiones y equipamientu siguieron respondiendo a les carauterístiques d'una brigada. En febreru de 1944 recibió la Cruz de Caballeru de la Cruz de Fierro, y n'agostu del mesmu añu la Cruz de Caballeru con Fueyes de Carbayu, una distinción concedida namái a 883 militares en tola guerra. N'ochobre, finalmente, sería condecoráu cola Cruz Alemana d'Oru. Degrelle afirma que, n'ocasión de condecoralo, el Führer díxo-y que «si tuviera un fíu, quixera que fuera como usté».^{[ensin referencies]}

El 2 de mayu de 1945, cuando la derrota alemana yera yá evidente, Himmler nomó a Degrelle Brigadeführer de les SS, anque'l nomamientu nunca tuvo efeutu, pos Himmler fuera desaposiáu de les sos responsabilidaes partidaries y militares n'abril. Degrelle había yá abandonáu'l frente pa viaxar a Copenḥague, lloñe de la llinia d'avance de los Aliaos; trés díes depués atopábase n'Oslu, pero poco más tarde les fuercies alemanes en Noruega capitularon. Degrelle escapó a España nel avión Heinkel del ministru nazi Albert Speer; en travesando les llinies enemigues acabóse-y el combustible y el so avión cayó al mar na badea de San Sebastián (Guipúzcoa), al norte d'España. En rescatándolo de les agües, el réxime franquista garantizó-y asilu políticu, y asiláu per España viviría hasta la so muerte'n Málaga en 1994.

Estancia n'España

Asilu de la dictadura franquista

La entrega de Degrelle xunto cola de Pierre Laval — el xefe de la Milice francesa y principal collaborador de la Gestapo na Francia de Vichy, tamién abellugáu en territoriu español tres la cayida de la Exa — foi esixida polos Aliaos en vista de la neutralidá que caltuviera España mientres la guerra. Magar Franco apurrió a Laval, la delicada condición de Degrelle, gravemente mancáu nel so aterrizaxe forzosu, dexó-y escusase temporalmente de faelo con ésti. Mientres l'añu d'hospitalización, Degrelle empezó a escribir el so llibru Campaña en Rusia.

Foi xulgáu en Bélxica in absentia, y el 29 d'avientu de 1945 retiróse-y la nacionalidá belga, siendo condergáu a muerte por collaboración colos invasores alemanes. El 21 d'agostu de 1946 Franco asonsañó vencer a la presión internacional pa la so entrega, pero-y dexó fuxir y nel so llugar apurrió a un sosias, que la so identidá foi rápido descubierta. José Finat y Escrivá de Romaní — antiguu direutor xeneral de Seguridá — y José María Martin Hoffmann — identidá de Hans Joseph Hoffmann, el que fuera cónsul honorariu xeneral d'Alemaña en Málaga, miembru bien relevante de la Gestapo, artífiz del asentamientu de munchos nazis n'España y de la Rede Ogru — facilitaron dineru, documentos falsos y sofitu a Degrelle por que se despintara. Degrelle foi acoyíu na finca estremeña del falanxista pronazi Eduardo Ezquer.

Bélxica reclamaría infructuosamente la estradición de Degrelle mientres 15 años. En 1954, pa tapecer la so identidá y perpetuar la so estancia n'España, Degrelle recibió la nacionalidá española, adoptando'l nome de José León Ramírez Reina. Cola ayuda de la Falanxe Española, dirixó una empresa constructora que fizo abondes obres pal réxime franquista. Mientres la década de 1950 y hasta 1963, Degrelle tuvo allugáu na finca «La Carlina», xunto al conceyu de Constantina (Sevilla), onde llevó a cabu unes obres de construcción d'un palacete y unes residencies axuntes, que güei inda subsisten. Nelles reflexa la so pasión pola arqueoloxía y l'arte.

Democracia

Condena per negacionismu

En 1985, unes declaraciones de Degrelle publicaes na revista Tiempo y en televisión negando la esistencia del Holocaustu fueron oxetu d'una demanda xudicial per parte d'una sobreviviente xudía rumana llamada Violeta Friedman. Anque les instancies iniciales fallaron a favor de Degrelle, el Tribunal Constitucional d'España llegó a la conclusión de que, magar el derechu a la llibertá d'espresión cubre tamién la publicación de falsedaes o aburuyes de los fechos históricos, ésta constituye un agraviu a la dignidá de los afeutaos, y condergó a Degrelle a una fuerte multa. Carta abierta al Papa sobro Auschwitz, publicada en 1979, foi oxetu de la mesma midida.

Pese al sofitu de CEDADE y otros grupos neonazis españoles, la sentencia fíxose efeutiva; Degrelle siguió, sicasí, apaeciendo nos alcuentros de la estrema derecha per toa Europa y foi l'invitáu d'honor na concentración entamada pa conmemorar el centenariu de la nacencia d'Adolf Hitler el 20 d'abril de 1989. Pocos años más tarde, el 31 de marzu de 1994, Degrelle morrería nel Sanatoriu Parque San Antonio de Málaga, a la edá de 87 años.

Degrelle vivió los últimos años de la so vida en Benalmádena, llocalidá turística de la Costa del Sol.

Obres

La proteición de la dictadura franquista permitió-y a Degrelle escribir numberoses obres de divulgación del ideariu rexista y fascista. A empiezos de la década de 1970 foi unu de los principales promotores de CEDADE; Ediciones Nothung, la imprenta de la organización en Barcelona, publicó dellos de los sos llibros, ente ellos Mil años de Hitler y Nuesa Europa. Otros títulos, incluyendo Espíritus apasionaos, Memories d'un fascista y Carta abierta al Papa sobro Auschwitz fueron publicaos por Editorial Fuercia Nueva y Ediciones D.

• Almes amburando (o Almes na foguera)
• La campaña de Rusia
• Memories d'un fascista
• Hitler, nacíu en Versailles
• Tintin, mon copain
• Carta abierta al Papa sobro Auschwitz
• El mio camín de Santiago
• L'enigma de Hitler
• ¡Europa va vivir!
• Maxestá, usté y yo
• Léon Degrelle, firma y robla
• Hestoria de les Waffen-SS europees
• Hitler. La marcha escontra'l Reich (1918-1933)
• Les mios andances en Méxicu.
• Llamamientu a los mozos europeos.

Bibliografía

• Bar-Zohar, Michael (1968). The avengers. The story of the hunt for Nazi Criminals. Arthur Barker. 
• Bezymenskiĭ, Lev (1966). Tracing Martin Bormann. Progress Publishers. , Lev (1966). Progress Publishers. ç

Bibliografía adicional

• Conway, Martin (1993). Collaboration in Belgium: Leon Degrelle and the Rexist Movement 1940–1944. New Haven: Yale University Press. ISBN 0-300-05500-5.
• Griffin, Roger (1995). Fascism. Oxford: Oxford University Press. ISBN 0-19-289249-5.

Enllaces esternos

• Wikimedia Commons acueye conteníu multimedia sobre Léon Degrelle.

• Datos: Q158844
• Multimedia: Léon Degrelle