Llucha canaria
La llucha canaria ye un deporte de llucha tradicional de les Islles Canaries (España).
Descripción
editarCarauterízase pola habilidá p'aprovechar la fuercia del contrariu y pola nobleza. Consiste básicamente en desequilibrar al adversariu al envís de que toque'l suelu con cualesquier parte del cuerpu sacantes los pies. Pa desiguar la estabilidá del rival empléguense distintes mañes, pero nun se permite la llucha en suelu como ocurre con otres modalidaes, nin nenguna clas de llaves a les articulaciones o d'estrangulamientos.
Pa entamar la llucha, tando dambos lluchadores nel centru’l “terrero” (terrén) choquen les manes en señal d'amistá, nobleza y tradición. Principien l'agarre asitiándose frente a frente y caún engancha cola manzorga’l borde la pernera derecha del otru. Abanguen el cuerpu haza alantre dende la cintura, hasta fincar dambos costazos derechos, a la mesma altura. De secute ponen los brazos derechos en posición vertical, xunten les palmes de les manes y báxenles hasta tocar el suelu coles puntes de los deos. En validando l'árbitru esta secuencia, da la señal d'escomienzu de l'agarrada faciendo sonar el xiplu.
La llucha tien llugar dientro un ronchu, que pue ser de sable, tierra o otros materiales, denomáu “terrero”, con dos círculos concéntricos qu'han midir como poco 15 y 17 metros de diámetru respeutivamente. Nél enfréntense los dos lluchadores agarraos tentando de valtase.
Historia
editarEnantes de la conquista castellana los “guanches”, aboríxenes de les distintes islles, nun teníen malpenes contautu ente ellos, desendolcándose esti tipu de llucha en cada islla con regles estremaes. Poro, la llucha debió surdir primero nel norte d'África, acompañando más tarde a los primeros pobladores canarios a la so llegada. Sábese que nel norte d'África esisten lluches asemeyaes, emparentaes quiciabes cola llucha que los antiguos canarios prauticaben nes islles. La llucha ye ún de los heriedos más importantes que dexó’l pueblu aborixe a los actuales canarios. Cronistes y escribanos de la conquista de Canaries pola Corona de Castiella falen de la llucha como una de les carauterístiques más destacaes de la población llariego.
Fray Espinosa, ún d'estos primeros historiadores, que tuvo en Tenerife cuando inda había guanches, confirma la esistencia de la llucha aborixe. Tamién tuvieron datos sobre ella Torriani, Abreu y Galindo, Antonio de Viena, José Viera y Clavijo. etc.
Los especialistes y historiadores de la Llucha canaria dividieron la so evolución en tres etapes:
- Época histórica: Ye la primer dómina. Les primeres referencies conocíes sobre esti deporte son del cronista Alvar García de Santa María nel añu 1420. Emplegábense yá delles téuniques que siguen utilizándose anguaño, y apaez la figura de los xueces o “homes d'honor”.
- Época folclórica: Cola llegada de la Ilustración esti deporte quedó arrequexáu dafechu al ámbitu de les celebraciones y actos populares o festivos. Inclusive en delles publicaciones de la dómina considerábenlu vulgar y anacrónicu. Por aciu de la guerra de Cuba munchos canarios emigraron a América y llevaron alluendi esti deporte, siendo Arxentina y Cuba los países au tuvo más acoyida, celebrándose abondos combates. Daquella, pel añu 1872, redactóse’l primer reglamentu, lo que convierte a esti deporte nún de los más antiguos reglamentaos.
- Época institucional: Nos años 40 del sieglu XX entama a regulase’l deporte y créense les primeres federaciones provinciales, de primeres dependientes de la Federación Española de Llucha. En 1984 creóse l'actual Federación de Llucha Canaria, que ta dividida n’insular y en rexonal.
Mañes
editar
Na llucha canaria una maña ye un movimientu o conxuntu de movimientos col envís de valtar al contrariu ensin golpialu. Pa ello pueden utilizase piernes, brazos y movimientos del cuerpu, siempre que se respeten les regles establecíes. Les mañes pueden dividise en tres grupos:
Mañes d'agarre
editarConsisten n’agarrase a dalguna parte del cuerpu del contrariu tentando de valtalu llevantándolu y faciendo que pierda l'equilibriu. Exemplos d'estes mañes son: cogida de muslo, cogida de tobillo, cogida de corva, cucharón, sacón (de aire, de camisa y de sobaco) y la cadera.
Mañes de bloquéu
editarConsisten en bloquiar el movimientu de dalguna parte del cuerpu del contrariu, tanto colos brazos como coles piernes, en visu a desestabilizalu y llevalu al sable ensin llegar al estrangulamientu o a la llave articular. Dalgunos exemplos son: “toque por dentro”, “toque para atrás”, “toque por fuera”, “garabato”, “traspiés”, “pardelera” o “burra”.
Mañes d'esvíu
editarConsisten en mover el cuerpu pa esviar l'aición del contrariu y, cola mesma fuercia d'él, desestabilizalu. Dellos exemplos son: “desvío”, “tronchada”, “toque por dentro”, “vacío” o “perro”.