Loxian

El loxian ye una llingua artística, col so propiu alfabetu, creada pola escritora y lletrista Roma Ryan pal álbum de 2005 d'Enya Amarantine. Enya usa'l loxian en tres canciones d'esi álbum: «Less than a Pearl», «The River Sings» y «Water Shows the Hidden Heart». Esta llingua foi recuperada darréu pal álbum Dark Sky Island nos cantares «The Forge of the Angels» y «The Loxian Gates». Enya describió a «los loxian» como seres que «viven n'otru planeta y miren, entruguen, “¿somos los únicos qu'esistimos?”».

Loxian loxian
Falantes	Enya
Familia	Llingua artificial
Estatus oficial
Oficial en	Nengún país
Reguláu por	Nun ta reguláu
Códigos
ISO 639-1	nengunu
ISO 639-2	art ("Artificial, otros")
ISO 639-3

Ryan creó'l loxian cuando constató la so incapacidá de crear lletres satisfactories n'inglés, gaélicu o llatín pa dellos de los cantares de Enya. Concibió la idea en trabayando coles ficticies llingües élfiques de J. R. R. Tolkien pa una de les pistes d'Enya: «May It Be», grabada en 2001 pa la banda sonora de la película The Lord of the Rings: The Fellowship of the Ring. La so creadora describe'l loxian como «una llingua futurista d'un planeta distante». El términu loxian remanez aparentemente del griegu loxos, que significa ‘oblicuu’.

Roma Ryan escribió un llibru espublizáu n'avientu de 2005, tituláu Water Shows the Hidden Heart (‘l'agua amuesa'l corazón ocultu’), que da información de fondu sobre los trés cantares en loxian y esplora'l desenvolvimientu d'esa llingua. El sitiu web d'Enya agospió un xuegu tituláu The Loxian Games, qu'inclúi cosadielles, desafíos y xeres al estilu «caza de l'ayalga», con premios ufiertaos. La primer serie d'estos xuegos llanzóse'l 1 de setiembre de 2008, y la segunda'l 9 d'ochobre de 2009. El 10 de febreru de 2017 Roma Ryan espublizó nel foru oficial "Unity" la torna del xuegu tres casi 8 años d'ausencia por cuenta de la celebración de la nominación del álbum Dark Sky Island a los premios Grammy.

L'aspeutu de la escritura del loxian (que pue vese tantu nel discu de Amarantine como nel llibru de Ryan Water Shows the Hidden Heart) inspírase nes tengwar de Tolkien y n'elementos de la taquigrafía Pitman. En Dark Sky Island pue apreciase otru tipu d'escritura loxian. Según Roma Ryan, hai seis alfabetos loxian distintos.

N'esaminando l'idioma, Terence Dolan, profesor d'inglés del University College Dublin, ufiertó la so opinión profesional sobre la llingua:

Ye una llingua bien ecléctica. Paez escoyer elementos al azar. Contién formes abondoses de llingües diverses como l'anglosaxón, el hindi, el galés y, creo, tamién yupik de Siberia. Ye un galimatías llingüísticu —paez nun disponer de nenguna forma de gramática y l'orde de les pallabres tien una comprensibilidá bien llindada. La escritura aseméyase a la de dellos idiomes esistentes. Básase en Tolkien, na llingua rúnica.

Terence Dolan

Enya y Ryan consideren que'l loxian ta baxu copyright; polo que la reproducción de la llingua ensin el permisu de Ryan o del sellu discográficu d'Enya, Aigle Music, consideraríase una violación del mesmu. Como nel casu del klingon, resulta daqué duldoso qu'una llingua en sí mesma pueda ser oxetu de copyright.

Referencies

Bibliografía

• Ryan, Roma. Water Shows the Hidden Heart. ISBN 0-9552011-0-1.

Enllaces esternos

• The Loxian Games
• El loxian na BBC
• Más sobre'l loxian
• Artículu en The Sunday Times
• Nota de prensa pal llanzamientu d'Amarantine

• Datos: Q1080256