Wikipedia

Manuel Antonio Agullón y Pantoja

compositor y maestru de capiella asturianu (1702–1754)

Manuel Antonio Agullón y Pantoja (circa 14 de febreru de 1702, Uviéu – 11 d'agostu de 1754, Zamora) foi un compositor y maestru de capiella asturianu.[2]

Manuel Antonio Agullón y Pantoja
Vida
Nacimientu Uviéu[1], circa 14 de febreru de 1702[1]
Nacionalidá España
Muerte Zamora[1], 11 d'agostu de 1754[1] (52 años)
Sepultura Catedral de Zamora
Familia
Familia
Estudios
Llingües falaes castellanu
llatín
Oficiu compositor, maestru de capiella
Cambiar los datos en Wikidata

Biografía

editar

Manuel Agullón y Pantoja nació n'Uviéu nel senu d'una familia musical y foi bautizáu'l 14 de febreru de 1702 na ilesia parroquial de San Isidoru'l Real d'Uviéu. El so güelu yera Vicente Pantoja, maestru de capiella de les catedrales de Ciudad Rodrigo y d'Uviéu (1680-1722). La fía de Vicente Pantoja, Eulalia Pantoja, casó con Custodio Agullón, un corneta procedente d'Estorga. Aulalia y Custodio tuvieron cuatro fíos, ente ellos, Manuel Antonio.[2]

Recibió educación musical na catedral d'Uviéu, como infante del coru. A la muerte del so güelu, en 1722, yá yera acólitu y esi mesmu añu presentóse a les oposiciones pa sustituyir al so güelu nel maxisteriu uvieín. Presentóse xunto con Juan González de Santa Marta, Andrés Cuevas Quirós, Enrique Villaverde y Pedro Rodrigo, consiguiendo esti últimu la plaza. El fechu de que se presentara y nun fixera mal papel, «al respective de [...] que fizo la so oposición a dichu Maxisteriu, en que cumplió perbién al respective de los sos pocos años», da una indicación de la so calidá como músicu. El cabildu nomólu sustitutu del maestru de capiella y Pedro Rodrigo llevólu consigo cuando coló a la Catedral de Santiago de Compostela. Nesta dómina apaez per primer vegada'l nome de Custodio Agullón, hermanu de Manuel, que lo acompañaría a Toro y Zamora.[2]

Llegó a Toro con 25 años, procedente de Santiago. La información probablemente refiérase a Santiago de Compostela y la referencia a la ilesia de Santiago en Valladolid seya un error. Ocupó'l cargu hasta 1731, cuando consiguió'l maxisteriu de Zamora. Nesti tiempu solicitó la ordenación.[2]

El 3 de payares de 1731 nomóse a Eugenio Merín xuez de les oposiciones pal maxisteriu de la catedral de Zamora. Nel casu d'esta ciudá, esixíase un exame presencial, polo que se presentaron compositores de la redolada: Toro, El Burgo de Osma, Mondoñedo, Toledo y la mesma Zamora. La oposición empezó'l 31 d'ochobre y remató 17 díes más tarde. La resultancia foi, «en primer llugar poníen a Don Manuel Agullón, D. Juan Martín Ramos, y D. Adrián González Gámiz, y en segundu a D. Benttura Roel y D. Juan Falcón, y en terceru a D. Juan Manuel Sánchez». El triple empate en primer posición resolvióse con una eleición nel cabildu del que salió ganador Agullón.[2]

En 1744 quedó vacante'l maxisteriu de la Catedral de Santiago de Compostela cuando Pedro Rodrigo Gómez partió al Monesteriu de la Encarnación de Madrid. El cabildu decidió convocar unes oposiciones a la que se presentaron diez aspirantes:[2]

Los participantes unviaron les sos obres pa que l'organista Manuel Fernández Troche les evaluara y ensayara cola capiella de música. Tres delles xuntes, el cabildu nun terminaba de ponese d'alcuerdu, polo qu'una carta del marqués de Scotti n'avientu de 1744 paez que dio l'impulsu final pa que'l cabildu escoyera a Pedro Cifuentes por mayoría simple.[2] Asina, el 16 de marzu de 1745, Cifuentes foi nomáu maestru de capiella de Compostela, cargu que caltendría hasta la xubilación.[3]

Agullón permaneció en Zamora hasta'l final de la so vida, finando ellí'l 12 d'agostu de 1754 (anque esisten informaciones de que doi un día antes) y siendo soterráu na catedral.

Memorial de Custodio Agullón, hermano del Sr Maestro de Capilla ya difunto, pidiendo que para el entierro de éste se le socorriese con alguna limosna, y en su vista se acordó se le diesen 400 R de V, y que esta cantidad se le entregue a los testamentarios para que sirva para el entierro.
Actes capitulares de la Catedral de Zamora, 11 d'agostu de 1754

Obres

editar

La so producción musical foi principalmente relixosa y caltiénse na so mayoría na catedral de Zamora. Hai obres tamién nes catedrales d'Estorga, Ávila, Palencia o Santo Domingo de la Calzada.[4]

Agullón y el so predecesor, Alonso Cobaleda, introducieron aires más modernos na música de la catedral de Zamora, apaeciendo nuevos elementos, como «l'apaición de partes monódiques o solistes dixebraes del conxuntu vocal, la instalación del acompañamientu xeneral como base de la música, o la renovación instrumental de les plantíes de ministriles – cola apaición del violín o l'oboe [...]».[5]

Referencies

editar
  1. ↑ 1,0 1,1 1,2 1,3 URL de la referencia: https://dialnet.unirioja.es/descarga/articulo/6549994.pdf.
  2. ↑ 2,0 2,1 2,2 2,3 2,4 2,5 2,6 Cuadrado Garzón, María Asunción (1996). «El maestro de la capilla de la Catedral zamorana desde 1731 hasta 1754: Manuel Antonio Agullón y Pantoja» (en castellanu). Anuario del Instituto de Estudios Zamoranos Florián de Ocampo (13):  páxs. 411-444. ISSN 0213-8212. https://dialnet.unirioja.es/descarga/articulo/6549994.pdf. Consultáu'l 25 d'abril de 2022. 
  3. ↑ López-Calo, José (20 de xineru de 2001). «Cifuentes, Pedro» (castellanu). Grove Music Online. Oxford Music Online. doi:10.1093/gmo/9781561592630.article.05776. Consultáu'l 25 d'abril de 2022.
  4. ↑ «Manuel Agullón Pantoja (-m. 1754)» (castellanu). Eresbil. Consultáu'l 25 d'abril de 2022.
  5. ↑ «Maestros de capilla del S. XVIII. Obras de Cobaleda, Agullón, Osete, Mancebo y Bonet» (castellanu). Semura Sonora. Ensembre de Música Antigua. Consultáu'l 25 d'abril de 2022.

Enllaces esternos

editar
Sacáu de «https://ast.wikipedia.org/w/index.php?title=Manuel_Antonio_Agullón_y_Pantoja&oldid=4207822»