Matanza de Santa María d'Iquique
La Matanza de la Escuela Santa María d'Iquique foi una masacre ocurrida nel Norte Grande de Chile el 21 d'avientu de 1907, na que fueron asesinaos un númberu indetermináu d'obreros del salitre que taben en güelga, mientres ocupaben xunto a les sos families la Escuela Santa María na ciudá d'Iquique.
El salitre yera'l motor de la economía chilena. Nos distritos mineros había tres ferrocarriles y trabayaben cuarenta mil persones nes 87 oficines (asina se llamaben a les esplotaciones salitreres)
Historia editar
Los primeros antecedentes de güelgues de trabayadores del salitre tuvieron llugar yá con anterioridá a la Guerra del Pacífico, aunque los paros nun entamaron a ser habituales hasta l'entamu del sieglu XX.
Esti fechu tuvo llugar en 1907 mientres trescurría'l periodu presidencial de Pedro Montt. Los trabayos paralizáronse depués de que los trabayadores decidieren conseguir meyorar les sos condiciones llaborales y de vida. Ente les sos peticiones taben la eliminación del pagu con fiches de la empresa nos comercios de la propia entidá (con unos precios superiores a los del restu de comercios de la zona), xornales a tipu de cambiu afitáu, balances pa los pesos y medíes pa les pulperíes, escueles pa los obreros, indemnización y almuerzu.
El 10 d'avientu de 1907 los güelguistas paralicen les actividaes de la salitrera "San Lorenzo" y el paru espardíase a otres d'Alto San Antonio, entamando la "Güelga de los 18 peniques". Esi nome débese a que los obreros pedíen el pagu de salarios a esti tipu de cambu. La numberosa columna d'obreros en güelga d'Alto San Antonio llegó a Iquique llevando banderes de Chile, Perú, Bolivia y Arxentina, instalándose nel hipódromu d'esti puertu.[1]
A esti movimientu amestáronse-y otres oficines salitreres, entrando en güelga tamién casi tol comerciu ya industria del norte del país.
Más trabayadores en paro viaxjaron a la ciudá d'Iquique, llegando el 16 d'avientu. Seis mil de los güelguistas acamparon na escuela Santa María. A midida qu'avanzaba la güelga, más y más pampinos se xuníen a ella, llegándose a estimar que pal 21 d'avientu yeren cerca de 10.000 (dellos autores lleguen a estimar 14.000). A los pocos díes de llegar, esti gran ensamu de trabayadores taba aconceyáu na plaza Manuel Montt y nel establecimientu de la Escuela Santa María, pidiendo al gobiernu qu'actuara de mediador colos patronos de les compañíes salitreres estranxeras (ingleses) pa solucionar les sos demandes. Los patronos negábense a negociar debido a que los obreros tovía nun abandonares la güelga.
Depués lleguen órdenes de Santiago pa que los manifestantes abandonaren la ciudá y regresaren a les salitreres. Los manifestantes refugaron la propuesta, porque camentaben que si regresaben a los sos llabores, les sos reivindicaciones seríen inoraes. El 21 d'avientu, el xeneral Roberto Silva Renard, máxima autoridá militar de Tarapacá, actuó sobre la escuela Santa María con soldaos del reximientu O’Higgins y el sofitu de es ametralladores del cruceru Esmeralda.
Frente a la creciente tensión qu'había yá ente los grupos, el 20 d'avientu de 1907 los dirixentes efectuaron una reunión col intendente Carlos Eastman Quiroga. Mientres la reunión se facía na oficina salitrera Buenaventura, un grupu d'obreros coles sos families trataron d'abandonar el llugar y fueron acribillaos na llinia férrea. Como resultáu d'esta aición 6 obreros morrieron y los demás terminaron feríos.
El 21 d'avientu de 1907 ficiéronse los funerales de los obreros, y darréu, al afechar les ceremonies ordenóse-yos a tolos trabayadores qu'abandonaren les dependencies de la escuela y los sos alredores y se trasladaren a las casuques del Club Hípicu (Hipódromu). Los obreros negáronse a dir, temiendo ser cañoneaos polos barcos qu'apuntaben el camín que deberían recorrer hacia'l Club Hípicu.
Depués la negativa, les autoridaes declararon l'Estáu de Sitiu. Les llibertaes constitucionales fueron suspendíes gracies a un decretu del intendente que fizo publicar na prensa escrita.
El Xeneral Roberto Silva Renard xunto al Coronel Ledesma teníen la misión de desarranchar a los trabayadores en güelga. Señalóse a los dirixentes del comité de trabayadores que si nun salíen del edificiu abriríen fueu contra ellos. Ante la negativa d'éstos, el xefe militar, a les 15:45, ordenó a los soldaos entamar a disparar les ametralladores. L'ensame de xente, desesperada y buscando escapar, llanzóse sobre la tropa y ésta repitió'l fueu al que se-y amestó'l de les ametralladores. Productu d'esta aición morrieron 195 persones y quedaron 390 feríos, según datos de Nicolás Palacios, testigu de la matanza. Otres fontes contabilicen 3.600 muertes.
Los sobrevivientes de la matanza con posterioridá fueron llevaos lliteralmente a sablazos hasta'l llocal del Club Hípicu, y dende ellí a la pampa del norte de Chile, comprendida ente les resones de Tarapacá y Antofagasta), onderecibieron un tratu deplorable.
L'impautu social que tuvo esti acontecimientu obligó al gobiernu de la dómina a dictar lleis sociales pa entamar a meyorar les condiciones llaborales de los obreros.
La persona que dio la orden de disparar foi'l Ministru del Interior Rafael Segundo Sotomayor Gaete. De les víctimes mortales, cerca del 60% yeren peruanos y bolivianos.
Consecuencies editar
Les cifres de feríos y muertos nun son menores (sobre la cantidá de muertos nun s’estableció una cifra definitiva, aunque se cree que fueron ente 500 y 2.000). Dende esi momentu reformaríase l'ambiente llaboral nes salitreres, yá que se promulgaron lleis que beneficiaron y meyoraron la calidá de vida de los obreros de les salitreres.
Esta güelga tien trescendencia histórica porque marcó el fin de la inmadurez política de los trabayadores chilenos.
Obres artístiques inspiraes nesti fechu históricu editar
Llibros
- Teitelboim, Volodia. 1952. Fíu del salitre
- Rivera Letelier, Hernán. 2002. Santa María de las flores negras
- Eduardo Devés. 1985. Los que van a morir te saludan
Música
- Héctor Duvauchelle, Luis Advis y el grupu Quilapayún "Cantata de Santa María de Iquique", 1970.
Teatru
- Ramón Ramón, de la compañía Teatro del Oráculo, 2007.
Bibliografía editar
- Artaza, Barrios, Pablo et al. 1998. A 90 años de los sucesos de la Escuela Santa María de Iquique. Ediciones LOM. Santiago. ISBN 956-282-084-2.
- Bravo Elizondo, Pedro. 1993. Santa María de Iquique 1907. Documentos para su historia. Ediciones del Litoral. Santiago
- Devés, Eduardo. 1989. Los que van a morir te saludan. Historia de una masacre: Escuela Santa María, Iquique, 1907. Ediciones Documentas Santiago. ISBN 956-282-066-1 (Ediciones LOM) copia PDF en Memoria Chilena
- Pizarro, Crisóstomo. 1986. La huelga obrera en Chile: 1890-1970. Editorial Sur. Santiago.