Palaciu de Valdés Bazán
El Palaciu de Valdés-Bazán ta allugáu en San Román, nel conceyu asturianu de Candamu.
| Palaciu de Valdés Bazán | |
|---|---|
| Bien d'Interés Cultural | |
| palaciu y monumentu | |
 | |
| Llocalización | |
| País |  España |
| Autonomía |  Principáu d'Asturies |
| Provincia | provincia d'Asturies |
| Conceyu |  Candamu |
| Coordenaes | 43°27′01″N 6°04′25″W / 43.4504°N 6.0736°O |
  Palaciu de Valdés Bazán Palaciu de Valdés Bazán (Asturies) | |
| Patrimoniu | |
| BIC | RI-51-0010809[1] |
 | |
L'edificiu encadarmase en planta per aciu d'un rectángulu que se subordina a la topografía del llugar, con dos altures na zona más baxa y una na más alta. Nun pertien patiu interior y la cubierta resuelvese a trés agües, subordinada tamién a la topografía de la zona.
La fachada norte ha ser considerada como la principal, yá que nella tán asitiaos los emblemes que dan calter nobiliariu a la residencia y que son dos, seguramente fechos dambos na segunda metá del sieglu XVIII, yá que nellos tán incluyíos los cuervos qu'añadió al escudo familiar Fernando Valdés-Quirós.
Esisten nesa fachada dos puertes nel nivel inferior, la que debió ser principal y otra que daría accesu a les cuadres, mientres que nel cimeru hai otra que da acceso a la vivienda de los guardeses, de manera que, como vemos, la organización d'esta fachada permite afitar la estremadura de dos nucleos habitacionales que se corresponden na fachada opuesta y que son la residencia nobiliaria y la de los sos emplegaos.
El nucleu principal presenta una disposición de les ventanes de cierta regularidá resaltada pol balcón central, allugáu enriba de la puerta y que quier ser una réplica de los balcones d'homenaxe, anque resulto equí con muncha cenciellez. A los sos llaos disponense irregularmente los dos escudos mentaos. A plombu d'una de les cares de les ventanes del pisu principal alcuéntrase una fila de ventanes de dimensiones más pequeñes; esta disposición, asimétrica, acentúa entá más el calter de desorganización qu'ofrez tola casona nesta fachada.
El so paramentu ye dafechu llisu y ta organizáu colos medios constructivos habituales n'Asturies: sillarexu enfoscáu y guardavivos fechos con grandes sillares encuadraos a cuatro cares. Los únicos elementos decorativos, qu'en nengún casu rompen l'austeridá del conxuntu, son les pequeñes y cencielles moldures qu'enanten la piana de les ventanes.
El nucleu más altu d'esta fachada, por poseer los güecos más próximos y pola esistencia d'una pequeña escalera, ofrez un pocu más de «gracia» anque siempre dientro de los más estrechos calces de la sobriedá más rigurosa.
La fachada este nun paez distinguise pa nada del restu de les edificaciones de calter popular de la redolada. La so distribución de güecos ye asimétrica como na fachada norte; nesta zona nun esiste elementu decorativu dalu.
Los elementos arquiteutónicos singulares de la casona presentense na fachada sur na que, con una distribución asemeyada a la del paramentu opuestu, la zona que se correspuende colo que víamos yera la parte noble de la fachada norte, vese equí ocupada por una doble arquería que singulariza l'inmueble. Esta arquería desendolcase nes dos altures del inmueble, ocupando daqué más de la metá d'esta fachada y la metá de la fachada oeste. El so pisu baxu articulase per aciu d'unos grandes pilares de seición rectangular que dan apoyu a unos arcos rebaxaos de tres centros, regularmente tresdosaos y encaxaos ente albanegues de piedra tallada con cierta maestría. Ente arcu y arcu asítiense unes moldures verticales de seición rectangular y escasamente salientes qu'articulen l'espaciu siembre solombríu.
La xebra de los dos pisos faese per aciu d'una moldura de mediu bocel que cuerre tola zona porticada y qu'arroxa una sele ceya de solombra.
El pisu altu repite la modulación de güecos del baxu, sustituyendo los pilares por columnes cilíndriques feches per aciu de dos bloques de piedra, que se rematen nuna especie de capitel fechu per aciu d'un sillar almuhadilláu y que da arrinque a un arcu de trazáu asemeyáu al del pisu inferior. Tamién equí la sillería de les albanegues presenta ciertes irregularidaes de repartu, anque siempre con pieces tallaes a toles sos cares. Ente columna y columna cuerre una barandina llisa fecha en piedra que nuevamente incide n'acrecentar l'austeridá del conxuntu. El remate de cornisa, que da pie a la techumbre de madera, compónse per aciu d'una moldura de mediu bocel.
Polo que se refier a la cadarma de madera, nun hai nada que se separte de los moos tradicionales llocales nel trabayu de les escuadríes y na igua de los voladizos.
Como pue apreciase, tola organización subordínase a una rigurosa austeridá teñida de ruralismu, que se manifiesta pola irregularidá xeométrica de la composición arquiteutónica, espresada inclusive na zona noble pola irregularidá de les dimensiones de les arqueríes.
La fachada más al oeste participa por igual del sistema de les galeríes y del de la fachada norte ensin aportar nenguna otra novedá.
Acordies colos datos históricos y a la vista del edificiu, puen establecese dos etapes fundamentales na so construcción.
- 1. Una fas primitiva na que se construyiría'l nucleu básicu del inmueble, carauterizada pol emplegu de téuniques y materiales tradicionales y que debió comprender les fachaes norte (remodelada llueu) y este, y l'ochenta por cientu de la superficie habitada anguaño. Poles sos carauterístiques, nun ofrez más interés que'l restu de les edificaciones populares de la redolada. La so materialización, hipotéticamente, pue asitiase hacia'l sieglu XVII, en base a les dimensiones de los güecos que nun paez que fueran modificaos.
- 2. La remodelación de Fernando Valdés nel sieglu XVIII comprendería una reparación de la fachada norte cola incursión de los escudos —probablemente nesi momentu enfoscaríense los paramentos vieyos—. Tamién fadríase la galería de la zona sur, ensin valtar nenguna muria, adosando esti elementu a la construcción primitiva, como paez remanecer de la xunta que se manifestó nel estremu de la fachada principal. Esta remodelación, mui en consonancia col espíritu austeru y severu, da al edificiu el sentíu singular que lu carauteriza.
Referencies
editar- ↑ «base de datos de monumentos de Wiki Loves Monuments» (13 payares 2017).
Enllaces esternos
editar
Wikimedia Commons tien conteníu multimedia tocante a Palaciu de Valdés Bazán.
Datos: Q9054567- Multimedia: Palacio de Valdés-Bazán
