San Pedru d'Alles
La ilesia de San Pedru d'Alles ye un templu barrocu asitiáu na villa homónima, nel conceyu asturianu d'El Valle Altu de Peñamellera. Foi pagada por Juan de Mier y Villar, que naciera nel pueblu y, emigráu a América, foi ellí presidente del tribunal de la Inquisición en Nueva España (anguaño Méxicu).[1] D'ellí parez que yera el so arquiteutu, que proyeutó el que ye ún de los meyores edificios relixosos asturianos del sieglu XVIII. Según Pascual Madoz, "es un edificio moderno y el mejor de la provincia, si se exceptúa la catedral".[2]
| San Pedru d'Alles | |
|---|---|
| ilesia | |
 | |
| Llocalización | |
| País |  España |
| Autonomía |  Principáu d'Asturies |
| Provincia | provincia d'Asturies |
| Conceyu | El Valle Altu de Peñamellera |
| Parroquia | Alles |
| Coordenaes | 43°19′57″N 4°42′14″W / 43.3325°N 4.7039°O |
  San Pedru d'Alles San Pedru d'Alles (Asturies) | |
| Historia y usu | |
| Orixe del nome | San Pedru |
| Arquiteutura | |
| Estilu | arquiteutura barroca |
 | |
De gran tamañu, descomanáu pal tamañu de la población na que s'asitia, tien una sobria monumentalidá qu'espresa al esterior la so estructura interna, de trés naves cubiertes con bóveda de crucería. L'ábside ye cuadrangular, del altor de les naves, y ta flanqueáu por dos sacristíes; tien, además, una cúpula intradosada nel centru del cruceru que se remata con una llinterna octogonal. Tien dos pórticos: el principal, na fastera meridional, que protexe una portada que presenta un frontón apoyáu en columnes estriaes afitaes enriba de podios altos, y se prollonga con un cabildru cerráu; y otru, menos monumental, na septentrional. Lo más aparente, sicasí, ye la gran torre con aguya y campanariu que preside los teyaos del pueblu.
La ilesia foi consagrada en 1787, y saqueada polos franceses en xunu de 1810. Años dempués, hubo qu'iguar la torre dempués de qu'un rayu la baltara en 1847. Como recueye Fermín Canella "se restauró desde 1856 siendo párroco don Cosme Ramón de Villar, de Ruenes, auxiliado con fondos populares y de los hijos de la llocalidá de Méxicu".[3]
Nel interior, con trés naves de dos tramos sobre pilares, abovedaes como se dixo primero, destaquen como elementos muebles los sos cinco retablos de fines del sieglu XVIII; el central ye una copia del que hai na ilesia de Santo Domingo, n'Uviéu. Hai tamién un bautisteriu, con una gran pila bautismal de mármol, a los pies de la torre, y dellos cuadros: ún del fundador, pintáu pol pintor mexicanu Rodríguez de Alconedo, na paré derecha del presbiteriu, y otru de la Virxe de Guadalupe na izquierda.
-
Vista de la torre -
Torre y pórticu septentrional -
Vista de la nave central -
Pórticu principal -
Retablu mayor -
Referencies
editar- ↑ Sicasí, otres obres, ente les que rescamplen el Diccionario geográfico de Madoz o la guía que, publicada pol RIDEA, se dedica a les Peñamelleres y a Cabrales, atribuin a otru emigráu, Domingo Trespalacios Escandón, que fora conseyeru de los reis Felipe V y Fernandu VI, el pagu de la obra del edificiu.
- ↑ Madoz, Pascual, Diccionario geográfico-histórico-geográfico de España y sus posesiones de ultramar (1845-50). Asturias. Valladolid, Ámbito Ediciones, 1985.
- ↑ Peñamellera, en Asturias, de Fermín Canella y Octavio Bellmunt, tomu III, p. 421. Xixón, 1900.
Enllaces esternos
editar
Datos: Q5991892
