Valle Central de California

El Valle Central de California (n'inglés Central Valley) ye una llanura qu'ocupa l'interior del estáu estauxunidense de California. Estiéndese de forma paralela a la costa del océanu Pacíficu, de la que lu separten les cordeleres costeres de California (California Coast Ranges), en sentíu norte-noroeste a sur-sureste, con un anchor d'ente 60 y 100 km y un llargor de 720 km y una estensión d'alredor de 47.000 km2, el 11% de la superficie total del estáu. Ye la rexón agrícola más importante del estáu y una de les más productives del mundu; colléchense nella más de la metá de les frutes, verdures y frutos secos de los Estaos Xuníos. Nelli hai más de 28.000 km2 de tierra regaos por una rede de canales y banzaos, y delles ciudaes importantes: Sacramento, capital del estáu, y tamién Chico, Redding, Stockton, Modesto, Fresno y Bakersfield.

Mapa del Valle Central de California.

La conca del Valle Central compriende 160.000 km2, la tercera parte del territoriu californianu. Consiste en trés sistemes fluviales estremaos: el valle de Sacramento, húmidu, al norte; el valle de San Joaquín, más secu, al sur; y la conca del llagu Tulare, de clima semidesérticu, nel estremu más meridional. Los ríos Sacramento y San Joaquín recueyen les agües de les sos respectives conques, y axúntense dempués pa formar el delta del Sacramento-San Joaquín, una gran estensión de canales, pantanos, xunqueres e islles de turba que desemboca na badea de San Francisco. Les agües de la conca del llagu Tulare nun lleguen, sacante les agües del ríu Kings que tán canalizaes artificialmente pal riegu), de forma espontánea al mar: tán conectaes por canales artificiales col ríu San Joaquín, magar que podríen desaguar espontáneamente nelli si'l nivel del agua fuera altu abondo.

El valle compriende, total o parcialmente, la estensión de 19 condaos: los de Butte, Colusa, Glenn, Fresno, Kern, Kings, Madera, Merced, Placer, San Joaquin, Sacramento, Shasta, Solano, Stanislaus, Sutter, Tehama, Tulare, Yolo y Yuba.

Enllaces esternosEditar