Xurde Álvarez

Xurde Álvarez Fernández (1973, Sama) ye poeta, narrador y autor de testos teatrales asturianu. Natural de la llocalidá llangreana de Sama, y llicenciáu n'Alministración y Direición d'Empreses pola Universidá d'Uviéu.

Xurde Álvarez
Vida
Nacimientu	Sama, 1973 (50/51 años)
Nacionalidá	España
Estudios
Estudios	Universidá de Michigan
Llingües falaes	castellanu asturianu
Oficiu	escritor

Xurde Álvarez, 2023

Depués de dalgunes publicaciones conxuntes, Xurde Álvarez entama realmente la so carrera como escritor nel añu 1.999, col asoleyamientu d'un poemariu de caráuter social tituláu "La sema".

Dividíu en tres partes, "Ería", "Semiente", y "Collecha", el llibru ye un repasu a una tierra resquebrada, sangrante; patria ensin ecu; ensin ecu de la so propia voz, erma de fe, erma de suaños, cayida a la vera'l camín que'l poeta acolumbra dende'l dolor común de lo propio.

Nel 2004, publica "No fondero de l'alcordanza de Dios", novela social na que s'espeya la dura y escarniada superviviencia d'una familia a lo llargo de los nueve meses que duraría la güelga más llarga d'Europa hasta entós, y que trescurriría dende Payares de 1.932 hasta Agostu de 1.933. Esta novela volverá a reeditase en 2023.

Esi mesmu añu, algama con "Les llames del to llar antiguu" el premiu de testos teatrales de l'Academia de la Llingua Asturiana.

En 2008, vería la lluz "Tierra d'esperanza", poemariu que continúa la filosofía de "La sema" y na que s'engarcia'l final del llibru anterior para sobresalir la voz del nosotros en vez de la del yo, como se ficiere nueve años enantes.

Ya nel 2009, publica "La caída" primer poemariu non-social del autor y na que se cuenta, en forma diariu, la visión del mundu d'una persona dende'l día en que se produz el so esbarrumbe emocional hasta que ye a ver la primer migaya d'una lluz en forma d'esperanza.

En 2014, edítase la novela "Si'l temblor niega'l fríu", que cunta la vida de dos enfermeres nun hospital siquiátricu de l'Alemania nazi y de los procesos d'estermín que sobre los enfermos con dalgún tipu de tara o deficiencia mental s'exercieron. Nesta obra dura, intensa, asfixiante d'entamu a fin l'ideal y el contraideal mécense ya intercámbiense pa dar llugar a un escarniáu retratu de la mente humana.

En 2015, torna a la poesía col poemariu escritu en forma de prosa poética y poemes "Lo escrito nel silenciu", qu'a traviés de 26 apuntes escritos a mou de diariu narra una hestoria d'amor dende'l so aniciu hasta la so resolución final. Crea unos videopoemes pa amosar el conteníu del llibru que puen escuchase nel enllaz: [1]

En Marzu de 2019, entama a asoleyar por pequeñes entregues la novela "Una casa", a traviés de la páxina de facebook unacasa.xurdealvarez [2] .Una casa ye la historia d’una familia minera. El padre, miembru de la brigada de salvamentu mineru rescatando y sacando muertos; la madre, muyer llabriega, postiando la casa con maderos de fe y de firmeza; la fía mayor rebalba, la pequeña espertando a la realidá y les sos verdaes; el neñu; el neñu entrando na mina; baxando a la tierra y a la escuridá de les sos cueves. Esta novela vería la lluz en forma llibru en 2023 siendo probablemente la obra de más repercusión mediática de l'autor [3] [4] [5] [6] [7]. De les tres ediciones feches, too acabo escosao.

N'Ochobre de 2023, tradúcese y espublízase en catalán [8] la so novela "No fondero de l'alcordanza de Dios" baxó'l títulu "Al fons de la memòria de Déu". [9]

Tien amás hasta la fecha estremaes publicaciones, antoloxíes conxuntes, y collaboraciones en distintes revistes y publicaciones como Lliteratura, Lletres Asturianes, La ratonera...

Xurde Álvarez-La caída

Obra

Narrativa

• De madre a hija (castellán). Artnalón Letras, 1996.
• No fondero de l'alcordanza de Dios. Ediciones Trabe, 2004. ISBN 84-8053-310-2 (2ª Edición 2023)
• Si'l temblor niega'l fríu. Ediciones Trabe, 2014. ISBN 978-84-8053-737-7
• Una casa. Ediciones Trabe, 2022. ISBN 978-84-18286-66-7

Poesía

• La sema. Ediciones Trabe, 1999. ISBN 84-8053-123-1
• Tierra d'esperanza. Ediciones Trabe, 2008. ISBN 84-8053-465-6, 978-84-8053-465-9
• La caída. Ediciones Trabe, 2008. ISBN 84-8053-524-5, 978-84-8053-524-3
• Lo escrito nel silenciu. Amazon, 2015. ISBN 9781508419693

Teatru

• Les llames del to llar antiguu. Ganadora de la edición 2004 del Concursu de Teatru de l'Academia de la Llingua Asturiana. Academia de la Llingua Asturiana, 2005. ISBN 84-8168-377-9

Traducíu a otres llingues (Catalán)

• Al fons de la memòria de Dèu. L'Agulla Daurada [10], 2023. ISBN 978-84-19515-10-0

Antoloxíes

• Al aldu, poesía pal segundu ciclu d'ESO. Ed. Trabe, 2006.
• L'albúm de Talía. Xunta Xeneral del Principáu d'Asturies, Ed. Ámbitu, 2006.
• Cuentos mínimos. Xunta Xeneral del Principáu d'Asturies, Ed. Ámbitu, 2007.
• Sentir que toi viva. Xunta Xeneral del Principáu d'Asturies, Ed. Ámbitu, 2008.
• 5 minutos d'averamientu a la prosa asturiana moderna. Conseyería de Cultura, Política Llingüística y Turismu, Ed. KRK ediciones, 2007.
• Caminos que naide triara. Xunta Xeneral del Principáu d'Asturies, Ed. Ámbitu, 2009.
• Contra'l silenciu. Esbilla y compilación de Berto García. Suburbia Ediciones, 2014.
• Surdiversu. Antoloxía de 50 años de poesía asturiana. Esbilla y compilación de Berto García. Cuatro gotes ediciones, 2024.

Revistes

• Reciella Malory, N 1, Ochobre 2004.
• La Ratonera, Revista asturiana de teatro, n 17, Mayo 2006.
• Lletres Asturianes, Academia de la Llingua Asturiana, númberos: 74, Mayu 2000; 77, Mayu 2001; 80, Mayo 2002; 83, Mayu 2003; 86, Mayu 2004; 89, Mayu 2005; 92, Mayu 2006; 95, Mayu 2007; 98, Mayu 2008.
• Lliteratura, N 24, Primavera 2007.
• Estandoriu, N 1, 2008.
• Lletres lliterariu, Academia de la Llingua Asturiana, númberu 1, Mayu 2009.

Enllaces esternos

• Wikimedia Commons acueye conteníu multimedia sobre Xurde Álvarez.

• Datos: Q9096770
• Multimedia: Xurde Álvarez