Agustín de Argüelles Álvarez González
Agustín d'Argüelles Álvarez (Ribeseya, 18 d'agostu de 1776 – Madrid, 26 de marzu de 1844), tenía l'alcuñu de «El Divín» pola so oratoria nes Cortes de Cádiz, foi un abogáu, políticu y diplomáticu español. Foi presidente de les Cortes Españoles en 1841 y tutor de la Reina Isabel II.
Agustín de Argüelles Álvarez González | |||||||||||
|---|---|---|---|---|---|---|---|---|---|---|---|
 | |||||||||||
24 marzu 1841 - 24 agostu 1841 ← Román Martínez Montaos (es)  - Pedro Antonio Acuña y Cuadros →
1841 - 1843
1r xunu 1837 - 30 xunu 1837 ← Martín de los Heros (es) - Vicente Sancho (es) →
3 abril 1820 - 2 marzu 1821 ← José García de la Torre - Mateo Valdemoros (es) →
| |||||||||||
| Vida | |||||||||||
| Nacimientu | Ribeseya[1], 18 d'agostu de 1776[2] | ||||||||||
| Nacionalidá |
 España | ||||||||||
| Muerte | Madrid[1], 26 de marzu de 1844[2] (67 años) | ||||||||||
| Sepultura |
Panteón de Hombres Ilustres (es) | ||||||||||
| Estudios | |||||||||||
| Estudios | Universidá d'Uviéu | ||||||||||
| Llingües falaes | castellanu[3] | ||||||||||
| Oficiu | políticu, diplomáticu | ||||||||||
| Llugares de trabayu | Madrid | ||||||||||
| Trabayos destacaos |
Constitución española de 1837 (es) | ||||||||||
 | |||||||||||
.svg){kind=small}
_Version_with_Golden_Fleece_and_Order_of_Charles_III_Collars.svg){kind=small}
Biografía
editarFíu segundu de José Antonio d'Argüelles y Uría, mayoralgu en Ribeseya, y de Teresa Álvarez González, la so segunda muyer. Estudió Derechu na Universidá d'Uviéu y en 1800 coló pa Madrid, onde gracies al so dominiu del inglés emplegóse na Secretaría d'Interpretación de Llingües. En 1806, el valíu de Carlos IV, Manuel Godoy, unviólu a Londres como embaxador especial pa que trabara conversaciones col Gobiernu británicu de cara a plantegar una alianza escontra Napoleón Bonaparte.
En 1808, pola mor del llevantamientu español escontra les tropes napoleóniques, tornó a España a requerimientu del so paisanu Gaspar Melchor de Xovellanos y establecióse en Sevilla, ciudá ensin ocupar polos franceses onde tenía'l so llar la Xunta Suprema Central. Foi secretariu de la Xunta de Llexislación, que los sos trabayos antemanaron los de les Cortes de Cádiz, y dempués diputáu por Asturies a diches cortes, onde participó viviegamente na redaición de la primera constitución española, destacando polos sos intentos d'abolición de la esclavitú y pola so oposición al tormentu como prueba xudicial. Por cuenta de la so oratoria vibrante y emotiva diben llamalu «El Divín».
Cola torna de Fernandu VII a España y la restauración absolutista, unviaron a Argüelles como presidiariu a Ceuta en 1814 y al añu siguiente al pueblu mallorquín d'Alcudia; na so prisión pasaría cinco años. Rehabilitáu tres el pronunciamientu de Riego, nomárenlu ministru de la Gobernación. Darréu del gobiernu lliberal exilióse a Inglaterra en 1823 y sobrevivió como bibliotecariu de Lord Holland, col que caltenía amistá dende la embaxada especial que desempeñara nel Reinu Xuníu por orde de Godoy dos décades enantes. Nel exiliu escribió la so principal obra teórica: Exame históricu de la reforma constitucional n'España, que vería la lluz en London en 1835.
Tres la muerte de Fernandu VII, tornó a España en 1834, participando na redaición de la constitución de 1837. Escoyéronlu diputáu por Asturies y nomárenlu preceptor d'Isabel II mientres la so minoría d'edá por Baldomero Espartero, en perdiendo la votación nes Cortes Xenerales frente a ésti pa ser escoyíu rexente d'España. En 1844 volvió ser escoyíu diputáu, anque esta vegada por Madrid, esi mesmu añu finó na so casa d'un ataque d'apoplexía.
Dolce años dempués de la so muerte, el Conceyu de Madrid bautizó col so nome a ún de los barrios del Enanche de Madrid, el que s'edificó na parte alta del Monte del Príncipe Pío. El barriu llevantóse ente 1856 y 1884. Dende 1902, por cuenta de les festividaes pola coronación d'Alfonso XIII, llevantóse nel so honor una estatua esculpida en mármol pol catalán José Alcoverro.[4]
Referencies
editar- ↑ 1,0 1,1 Afirmao en: Gran Enciclopedia Soviética (1969–1978). Sección, versículu o párrafu: Аргуэльес Агустин. Data de consulta: 28 setiembre 2015. Editorial: Большая Российская энциклопедия. Llingua de la obra o nome: rusu. Data d'espublización: 1969.
- ↑ 2,0 2,1 Afirmao en: Find a Grave. Identificador Find a Grave: 10511263. Apaez como: Agustin Arguelles. Data de consulta: 9 ochobre 2017. Llingua de la obra o nome: inglés.
- ↑ Afirmao en: autoridaes BNF. Identificador BnF: 122418211. Data de consulta: 10 ochobre 2015. Autor: Biblioteca Nacional de Francia. Llingua de la obra o nome: francés.
- ↑ «Agustín Argüelles se muda al Templo de Debod». El País. Consultáu'l 1 de febreru de 2014.
Enllaces esternos
editar
Wikimedia Commons acueye conteníu multimedia sobre Agustín de Argüelles Álvarez González.- Discursos d'Agustín Argüelles na Biblioteca Virtual Miguel de Cervantes
- Retrato de Agustín Argüelles Archiváu 2015-09-24 en Wayback Machine en La Ilustración Liberal
- Agustín de Argüelles Álvarez na Biblioteca Virtual de Polígrafos de la Fundación Ignacio Larramendi.
Datos: Q634348- Multimedia: Agustín de Argüelles Álvarez
