Wikipedia

Albany (Australia occidental)

Albany (en llingua noongar Kinjarling) ye una ciudá portuaria de la rexón de Gran Sur (Great Southern) del estáu australianu d'Australia occidental, asitiada a 418 km al sureste de Perth, la capital estatal. El centru urbanu allúgase na oriella septentrional del Puertu de la Princesa Real (Princess Royal Harbour), que forma parte del senu del rei Xurde (King George Sound), y el so distritu financieru ta llendáu pol monte Clarence al este y pol monte Melville al oeste. La ciudá ye'l centru alministrativu del área de gobiernu llocal de la ciudá d'Albany (City of Albany). Ye'l asentamientu colonial más antiguu d'Australia occidental (dos años más vieyu que Perth y Fremantle), y foi un semi-exclave de Nueva Gales del Sur demientres cuatro años, cuando pasó a formar parte de la colonia del ríu Swan (Swan River Colony). La so población, en xunu de 2018, yera de 34.205 habitantes[1], que facíen d'ella la sesta más poblada del estáu[2].

Albany
Alministración
PaísBandera de Australia Australia
Estáu federáuBandera de Australia Occidental Australia Occidental
Local government area of Western Australia (en) Traducir City of Albany (en) Traducir
Tipu d'entidá villa
Nome oficial Albany (en)
Nome llocal Albany (en)
Códigu postal 6330
Xeografía
Coordenaes 35°01′22″S 117°52′53″E / 35.022778°S 117.881389°E / -35.022778; 117.881389
Albany alcuéntrase n'Australia
Albany
Albany
Albany (Australia)
Superficie 88.3 km²
Altitú 0 m
Demografía
Población 25 196 hab. (2006)
Porcentaxe 100% de City of Albany (en) Traducir
Densidá 285,35 hab/km²
Más información
Fundación 1826
Estaya horaria UTC+08:00
Llocalidaes hermaniaes Tomioka
albany.wa.gov.au
Cambiar los datos en Wikidata

L'asentamientu fundose'l 26 d'avientu de 1826 como un puestu militar d'avanzada destináu a prevenir les ambiciones franceses na rexón[3]. Con esi envís, el 21 de xineru de 1827 el comandante del puestu, el mayor Edmund Lockyer, tomó formalmente posesión, en nome de la Corona británica, de la fastera de Nueva Holanda que nun fora entá reclamada polos británicos; esto ye, la tierra asitiada al oeste del meridianu 129º este[4]. Na cabera década del sieglu XIX la ciudá convirtióse nel puertu d'entrada de los Eastern Goldfields, la fastera d'Australia occidental rica n'oru. Amás, por bien de tiempu el d'Albany foi l'únicu puertu d'agües profundes de la colonia, lo que-y dio a la ciudá un papel importante nel comerciu de bienes ente Gran Bretaña y les sos colonies australianes. L'apertura del puertu interior de Fremantle, en 1897[5], traxo la decayencia portuaria d'Albany, y tres d'ello la tresformación de la so industria, que pasó a centrase nel sector primariu: agricultura, madera y, posteriormente, pesca ballenera.

Puertu d'Albany, vistu dende'l monte Melville.

Anguaño Albany ye'l centru dende'l qu'entamen los sos viaxes los turistes que visiten esta fastera suroccidental del estáu[6], conocida pol so fermosu entornu natural y pol procuru pola so herencia pasada. El puertu xugó tamién un papel nes guerres del sieglu XX. Na Primer Guerra Mundial yera'l caberu puertu australianu nel que paraben los barcos que colaben pa Europa a la guerra. Nesti contestu, el 1 de payares de 2014 los primeros ministros d'Australia y Nueva Zelanda inauguraron el Centru Nacional del ANZAC (Australian and New Zealand Army Corps)[7], nel monte Clarence, pa celebrar los 100 años que pasaran de magar los primeros soldaos del ANZAC colaron d'Albany pa Europa. Na Segunda Guerra Mundial, d'otra banda, hebo nel puertu una base auxiliar pa submarinos de la VII Flota de l'Armada d'Estaos Xuníos, preparada pa ser usada si se perdía o yera destruyida la base de submarinos del puertu de Fremantle, y tamién una instalación naval de repostaxe de buques de l'Armada australiana[8].

Referencies

editar
  1. ↑ «3218.0 – Regional Population Growth, Australia, 2017-18: Population Estimates by Significant Urban Area, 2008 to 2018». Oficina Australiana d'Estadística (27 de marzu de 2019). Consultáu'l 4 d'avientu de 2022. Estimación de la población residente a 30 de xunu de 2018.
  2. ↑ «About Albany». Web oficial de la ciudá d'Albany. Archiváu dende l'orixinal, el 2016-02-29. Consultáu'l 4 d'avientu de 2022.
  3. ↑ Battye, James Sykes (2005). Clarendon Press: Western Australia: A History from its Discovery to the Inauguration of the Commonwealth. Consultáu'l 4 d'avientu de 2022.
  4. ↑ «King George's Sound Settlement». State Records. State Records Authority of New South Wales. Archiváu dende l'orixinal, el 2014-06-24. Consultáu'l 2021-09-23.
  5. ↑ Hutchison, David (2006). Fremantle Arts Centre Press: Fremantle Walks. ISBN 1921064307.
  6. ↑ «Destination Albany». Consultáu'l 2017-10-07.
  7. ↑ «Anzac Albany | National Anzac Centre». Archiváu dende l'orixinal, el 2022-12-04. Consultáu'l 2020-02-15.
  8. ↑ Commander Seventh Fleet (1944-09-15), Base Facilities Report, United States Navy, https://commons.m.wikimedia.org/wiki/File:Base_Facilities_Report.djvu, consultáu'l 2021-09-26 

Enllaces esternos

editar
Sacáu de «https://ast.wikipedia.org/w/index.php?title=Albany_(Australia_occidental)&oldid=4296148»